Son məlumata görə toqquşmalar nəticəsində həyatını itirənlərin sayı 210-a çatıb.
***
İyulun 27-si səhər saatlarında Qahirədə Misirin devrilmiş prezident Məhəmməd Mursi tərəfdarları ilə təhlükəsizlik qüvvələri arasındakı qarşıdurmada 100 nəfərə yaxın adamın öldüyü, mindən çox adamın yaralandığı bildirilir. Bu barədə “BBC” məlumat yayıb.
Hazırda «Müsəlman qardaşları»nın Mursinin prezident səlahiyyətlərinin qaytarılması tələbilə oturaq aksiya keçirdiyi bildirilir.
«Al-Jazeera» telekanalı isə 120 nəfərin öldüyü, 4500-ə yaxın adamınsa yaralandığını xəbər verir. Məlumatda bildirilir ki, qarşıdurma polisin islamçıları düşərgəsindən çıxarmağa cəhdindən sonra başlayıb.
İyulun 26-sı gecə paytaxt Qahirədə Mursi tərəfdarları ilə əleyhdarlarının nümayişi keçirilib. Həmin vaxt Misirin daxili işlər naziri Mohamed İbrahim yaxın vaxtlarda qanun çərçivəsində Mursi tərəfdarlarının nümayişinə son qoyulacağını deyib.
Daxili İşlər Nazirliyinin yüksək səviyyəli rəsmisi bildirib ki, Mursi tərəfdarlarına qarşı odlu silah işlədilməyib. Əksinə onların arasından meydanı boşaltmaq istəyən təhlükəsizlik qüvvələrinə daş və ov tüfəngləri ilə cavab verilib. Bunun qarşılığında etirazçılara yalnız gözyaşardıcı qazdan istifadə olunub.
