Avropa Insan Haqları Məhkəməsi Ukraynanı 27 milyon avro məbləğində cərimələyib. Qərar milli məhkəmələrin “Aqrokompleks” şirkətinə qarşı qərəzli qərarlar qəbul etməsi barədə irəli sürülən iddialar əsasında qəbul olunub.
Məlumata əsasən, ötən əsrin 90-cı illərinin əvvəlində “Aqrokompleks” şirkəti o vaxt dövlət tərəfindən idarə olunan “Lisiçan” Neft Emalı Zavoduna 375 min ton xam neft göndərib, lakin emaldan sonra hazır malın cüzi miqdarını alıb. Sonradan Neft, qaz və neft emalı sənayesi Dövlət Departamentində zavodun öz öhdəliklərini yerinə yetirməməsi etiraf olunub. Bununla bağlı bir neçə məhkəmə instansiyası neft emalı zavodunun “Aqrokompleks” şirkətinə 19.5 milyon avro borclu olması barədə qərar qəbul ediblər, amma dövlət tərəfindən yaranan komissiya bu borcu 8 milyon avroyadək endirib. AIHM-nin qərarında deyilir ki, borcun azalması o vaxt ölkənin prezidenti Leonid Kuçmanın məhkəmə işinə qarışmasından sonra baş tutub(APA). Qeyd edək ki, bu, Ukraynanın tarixində AIHM tərəfindən qəbul olunan qərarla bağlı ödəniləcək ən iri cərimədir.
