Avropa İnsan Haqları Məhkəməsinə ifadə azadlığı hüququnun pozuntusundan daha bir şikayət göndərilib. Şikayətçilər “Azadlıq” qəzetinin əməkdaşı Natiq Ədilov, Reportyorların Azadlıq və Təhlükəsizlik İnstitutunun əməkdaşı Nizami Cəfərov, siyasi fəallar Kamilə Aslanova, Eldar Hüseynov və Ağaverdi Rüşanovdur. Onlar 2010-cu ildə keçirilmiş parlament seçkiləri zamanı müşahidəçi statuslarının ləğv edilməsinin, iş üzrə çıxarılan məhkəmə qərarlarının qanunsuz olduğunu iddia edirlər.
Ərizəçilərin hüquqlarının Media Hüququ İnstitutunun (MHİ) vəkilləri müdafiə edir. Vəkillərin Avropa Məhkəməsinə göndərdikləri şikayətdə qeyd olunur ki, yerli məhkəmələr müşahidəçi statusu ləğv edilən jurnalistlərin və fəalların iddiası üzrə qərarlar verərkən onların Avropa Konvensiyasında təsbit olunmuş azadlıq və toxunulmazlıq (maddə 5), ədalətli məhkəmə araşdırması (maddə 6), ifadə azadlığı (maddə 10), səmərəli hüquqi müdafiə vasitələri (maddə 13), ayrı-seçkiliyin qadağan olunması hüquq və azadlıqlarına müdaxilə ediblər. Avropa Məhkəməsindən ərizəçilərin hüquqlarının pozulmasının tanınması, onların işlə bağlı çəkdikləri xərclərin, habelə onlara dəymiş maddi və mənəvi zərərlərin əvəzinin ödənilməsinin təmin olunması xahiş edilir.
Yada salaq ki, ərizəçilər 07 noyabr 2010-cu il tarixdə keçirilən parlament seçkilərini müşahidə qrupunun özvləri olublar. Onlar Suraxanı rayonunda seçki prosesini müşahidə ediblər. Müşahidəçilər səslərin sayılması zamanı pozuntulara yol verildiyini iddia edərək seçki komissiyası sədrindən tədbir görməsini tələb ediblər. Seçki komissiyası rəhbərliyi isə akt tərtib edərək polis əməkdaşlarını məntəqəyə dəvət edib. Polis əməkdaşları müşahidəçiləri Suraxanı Polis İdarəsinə aparıblar. Bir neçə saat qapalı hasarlar arasında saxlanılan ərizəçilərin müşahidəçi statusu Suraxanı Məhkəməsi tərəfindən ləğv edilib. Ərizəçilər polis əməkdaşları tərəfindən izahat verilmədən qanunsuz tutulmalarından, jurnalist və müşahidəçi fəaliyyətlərini həyata keçirməyə imkan verilməməsindən Daxili İşlər Nazirliyinə, Baş Prokurorluğa, Suraxanı Prokurorluğuna şikayət ediblər. Şikayətlərin heç biri təmin olunmayıb. Məhkəmələr prokurorluğun araşdırma aparmamasından verilən şikayətlərin heç birini təmin etməyiblər.
