Emin Milli
Dünən gecə Rüstəm bəyin Avropaya səfəri bitdi. Bu günlər ərzində Rüstəm bəylə çox yaxından tanış oldum. Düşünürəm ki, sizinlə onun haqqında bəzi fikirlərimi paylaşsam, bunun ümümi işimiz üçün bir faydası ola bilər.
Rüstəm bəylə bağlı çoxlu şübhələrim, suallarım var idi. Amma bu günlər ərzində mənə aydın oldu ki, Rüstəm bəy öz niyyətlərində çox səmimidir. Bundan əlavə o, çox təcrübəli, müdrik və cəsarətli bir insandır.
Düşünürdüm ki, Rusiya oliqarxlarımız onun arxasındadır, amma bu yalan çıxdı. Əslində arxasında olmalıdırlar, amma Putindən qorxurlar. Bunun əksini düşünən bu yaxınlarda Putinin Bakıda Əliyevi necə dəstəkləməsini özləri görəcəklər. Rüstəm bəy haqqında daha bir yalan, mif dağılacaq.
Mən həm də düşünürdüm ki, Rüstəm bəyin siyasi bacarıqları güclü olmaz, amma yanıldım. Onun siyasi mübarizəyə gec qoşulması, bizim insanlarımızın əksəriyyəti kimi özünü mübarizədən kənar saxlaması tənqid olunası olsa da, amma anlaşılan idi. İnsanlar itirməkdən qorxur, yaxınlarına və qohumlarına görə qorxur, qorxu içində yaşayırlar. Əksəriyyət hələ də bu mövqedədir. Amma Rüstəm bəy axır ki, bu addımı atıb, qorxularına qalib gələ bilib. Bu isə əksəriyyətin də fikirlərinə təsir edə bilər.
Hər bir görüşdə o Sovet İttifaqı vaxtında kommunist olmadığını, amma eyni zamanda dissident də olmadığını bildirirdi. Sadəcə bacardığı qədər bir az həqiqəti deməyə çalışıb. Özünü heç vaxt qəhrəman hesab etməyib.
Rüstəm bəyin 74 yaşı var. Onun da hər bir başqa insan kimi nöqsanları var. Onu da hansısa məsəslələrdə tənqid etmək olar, razılaşmamaq olar. Amma bununla yanaşı hal-hazırda xalqımızın Rüstəm bəydən yaxşı və əksəriyyətin tanıdığı və qəbul edəcəyi başqa namizədi yoxdur.
Görüşlərin birində Avropa fondunun rəhbərlərindən biri Rüstəm bəyə dedi ki, Sizin filmlərinizə baxa-baxa böyümüşük. Dünyada çətin bu qədər hörməti olan ikinci azərbaycanlı tapa bilək. Rüstəm bəyin ölkənin özündə, Rusiyada və Qərbdə bu qədər tanınması da çox böyük üstünlüyümüzdür. Müxalifətin bu gün çox mediatik lideri var.
Rüstəm bəyin daha bir fikiri mənə çox maraqlı gəldi. O özünü siyasətçi kimi təqdim etmir. O öz missiyasını iki il ərzində dünyada yaşayan ən gənc, savadlı və bacarığlı menecerlərin, biznesmenlərin, bankirlərin, akademik və praktik bilikləri, idarəçilik təcrübəsi olan, dünyada və Azərbaycanda ən yaxşı təhsil alan, uğurlu və öz sahəsini bilən azərbaycanlıları hakimiyyətə gətirməkdə görür: “Mənim missiyam sizə yolu təmizləyib, yol açmaqdır. Bu ölkəni yeni bilikləri, müasir iş təcrübəsi olan nəsil idarə etməlidir. Mənim rolum isə iki il ərzində sizin üçün stabilliyi qoruyub saxlamaq və sizin özünüzün təşkil olunmağınıza imkan yaratmaqdır. Əliyevlər bu imkanı sizdən oğurlayıblar. Hamı qorxu içində yaşayır. Belə olmaz. Buna artıq dözmək mümkün deyil”.
Rüstəm bəyin mübarizəsi hökümətin özünü də həlledici anda içərdən parçalaya bilər. Hökümətin parçalanması isə demokratik keçidin baş verməsi üçün əsas şərtlərdən biridir.
Başqalarına etibar etməyənlər, sadə insanlar, hökümətin məmurları, polislər, əsgərlər, zabitlər, ordu generalları, biznesmenlər və s. Rüstəm bəyə çox böyük hörmət edirlər. Onu tanımıyan və hörmət eləməyən azərbaycanlı yoxdur. Bu isə daha bir vacib siyasi resursdur.
Rüstəm bəyin bu gün həyatı da, azadlığı da təhlükə altındadır. Bu işin içinə girərək onun itirə biləcəyi çoxdur. Amma o bunu edir. O iyulun 31-də Bakıya gəlir. Bu işi öz həyatının bir missiyası kimi görür. Öz həyatını qurban verməyə də hazırdır. Bunu hər kəs anlamalıdır və dəyərləndirməlidir, amma tək sözdə yox.
Ona görə şübhələrinizi qoyun kənara. Kimdənsə kömək gözləməyin. Olmayacaq. Kiminsə üstünə Rüstəm bəyin təbliğatını yıxmayın. Olmayacaq. Ondan pul gözləməyin, pulu bu mübarizəni qura bilməsi üçün çox azdır. Özünüz kiçik və böyük qruplar yaradın, fərdi və qrup şəkilində, açıq və gizli Rüstəm bəyin təbliğatına başlayın, onun müdafiəsinə qalxın, mübarizəyə qoşulun.
Vətəndaş borcunuzu siz də yerinə yetirin. Vətəndaş olun!
Bu dəfə ssenarini SİZ yazın!
