«Azad Avropa» radiosu hökumətin jurnalistlərə ev paylaması haqda məqaləni bu cür təqdim edib
«Bir çox müstəqil jurnalistlər yəqin ki, Ilham Əliyevin ”dostu” olmasını istəməzdi»
Mətbuat azadlığı olan heç bir ölkədə jurnalistlərin mənzillə təmin olunması praktikası yoxdur. Bu addım jurnalistlərin satın alınması kimi qiymətləndirilir. Təsadüfi deyil ki, Azərbaycanda media nümayəndələrinə hökumətin ev paylaması birmənalı qarşılanmadı. “Azad Avropa” radiosunun hazırladığı “Xeyriyyəçilik, yoxsa rüşvət?” başlıqlı məqalə də bu mövzuya həsr olunub. Məqalənin tərcüməsini təqdim edirik:
***
Azərbaycan hakimiyyəti müstəqil mediaya qarşı hücumlara görə tez-tez tənqid olunur. Hökumət vəziyyətdən çıxış yolunu 155 jurnalisti çoxmənzilli binada evlə təmin etməklə tapdı.
Prezident Ilham Əliyev iyulun 22-də Milli Mətbuat Günündə binanın açılışını etdi. Bu, yazıçılar və digər incəsənət xadimlərinin mənzillə təmin olunmasına dair sovet praktikasını xatırladır.
Ilham Əliyev mətbuat azadlığının təmin olunmasına görə ölkəsini təriflədi. Hərçənd, Azərbaycan mətbuat azadlığının vəziyyətinə görə “Sərhədsiz Reportyorlar” təşkilatının siyahısında 179 ölkə arasında 156-cı yeri tutur.
Bibiheybətdə yerləşən binanın üstünə Ilham Əliyevin sitatının əks olunduğu plakat vurulub: “Jurnalistlərin dostu olmaq böyük şərəfdir”.
“Bütün dünyada olduğu kimi, Azərbaycanda da internet-jurnalistika inkişaf edir. Dövlət internet yayımı üzrə proqramlar həyata keçirir. Beləliklə, deyə bilərik ki, ölkəmizdə söz azadlığı tam təmin olunub”, – deyə Əliyev çıxışında bildirib.
Lakin bir çox müstəqil jurnalistlər yəqin ki, Ilham Əliyevin “dostu” olmasını istəməzdi. Bundan bir müddət əvvəl Jurnalistlərin Hüquqlarını Müdafiə Komitəsi Azərbaycan hökumətini mətbuata hücumları dayandırmağa çağırmışdı.
Məsələn, Hilal Məmmədov da daxil olmaqla, bir sıra jurnalistlər siyasi motivlərlə həbsdədir.
Keçən ay Azərbaycan prezidenti internetdə böhtana görə cinayət məsuliyyəti nəzərdə tutan qanunu imzaladı. Bu addım müstəqil media, jurnalist təşkilatları tərəfindən tənqid olundu. Çünki prezident seçkiləri ərəfəsində internet-mediada fərqli fikirliliyi məhdudlaşdırmaq, müstəqil jurnalistlərə maneə yaratmaq məqsədilə bu qanundan istifadə olunacağı ehtimalı var.
Binanın tikintisini maliyyələşdirən KIV-in Inkişafına Dövlət Dəstəyi Fondunun rəhbəri Vüqar Səfərli deyir ki, müstəqil jurnalistlər də mənzillə mükafatlandırılıb.
Azərbaycanda müstəqil jurnalistlərə peşə fəaliyyətilə əlaqədar tez-tez hücumlar olur. Bir çoxları hesab edir ki, jurnalistlərə mənzillərin verilməsi əslində, səxavətlilik yox, dövlət tərəfindən onların satın alınması cəhdidir.
“Azad media nə deməkdir? Azad media onu əhatə edən bütün qurumlardan, o cümlədən hökumətdən asılı olmamalıdır, müstəqil olmalıdır. Jurnalistikanın əsas missiyası hökumət üzərində ictimai nəzarəti asanlaşdırmaqdır. Hökumətdən mənzil alan jurnalist onu necə tənqid edə bilər? Ona görə hesab edirəm ki, hökumətdən mənzil alınmasına bəraət qazandırmaq üçün arqumentlər axtarmaqdansa, jurnalistikanı tərk eləmək daha yaxşıdır”, – deyə media eksperti, professor Qulu Məhərrəmli bildirib.
Informasiya şöbəsi
