Həcər Pənahlı: «Bir var ki, adamı birbaşa vurub öldürəsən, bir də var, bu cür yollarla…»
Səməd Pənahlı: «Nemətin qaldığı həbsxana köhnə mal tövləsinə oxşayır»
Milli Azadlıq Hərəkatının öncüllərindən olan Nemət Pənahlının həyat yoldaşı Həcər Pənahlı onun sağlıq durumunun yaxşı olmadığını bildirib.
Qobustandakı qapalı həbsxanada saxlanılan Nemət Pənahlı ilə iyulun 14-də görüşən Həcər xanım növbəti görüşün üç aydan sonra olacağını bildirib. Həyat yoldaşının vəziyyətinin acınacaqlı olduğunu deyən Həcər Pənahlı onun şəkər xəstəliyindən əziyyət çəkdiyini və bu səbəbdən müalicəsinin vacib olduğunu deyib: “Neməti məqsədli şəkildə öldürmək istəyirlər. Bir var ki, birbaşa vurub öldürəsən, bir də var, bu cür yollarla. Nemət 17 saylı cəzaçəkmə müəssisəsində saxlanılanda mətbuata açıqlama vermişdim ki, onu öldürmək istəyirlər. O, bir neçə dəfə ölüm təhlükəsilə üzləşib. Üstünə hücum çəkiblər, təhdid ediblər”.
Bugünlərdə mətbuatda 12 saylı cəzaçəkmə müəssisəsində məhbusların qiyam qaldırılması barədə yayılan məlumatlara toxunan Həcər Pənahlı qeyd etdi ki, bu, cəzaçəkmə müəssisələrindəki acınacaqlı vəziyyətdən irəli gəlir: “Cəzaçəkmə müəssisələrində vəziyyət çox bərbaddır. Nə tibb məntəqəsi var, nə tibbi yardım…”
Nemət Pənahlının qardaşı Səməd Pənahlının da fikirlərini öyrəndik: “Nemətin saxlanıldığı həbsxana köhnə, sovet dönəmindən qalma mal tövləsinə oxşayır. Nemətlə görüşümüz üç aydan sonra olacaq, ondan sonra dəyişikliyin olub-olmadığını biləcəyik. Bu məsələ ilə bağlı müraciət etmədiyimiz yer qalmayıb. Penitensiar Xidmət, başqa qurumlar eyni cavabı verir, eyni münasibət göstərir. Müraciətlərimizə aldığımız cavablar şablon olduğundan daha heç bir yerə müraciət etmək fikrində deyilik. Bir ölkədə ki qayda-qanun yoxdur, orada bundan artığını gözləməyə dəyməz”.
Nigar
