Fazil Əhməd: «1000 işarəlik xəbər yaza bilməyənlərin özünüqoruma instikti ilə verdikləri kəskin reaksiyalar, bizim düz yolda olduğumuzu göstərir»
Xəbər verildiyi kimi, bir qrup jurnalist iyulun 22-də jurnalistlərə ayrılan evlərin bölüşdürülməsi zamanı ədalətsizliyə yol verildiyi ilə bağlı prezident Ilham Əliyevə müraciət edib.
Müraciət müəlliflərindən Fazil Əhməd (“Reytinq” qəzetinin baş redaktor müavini, mia.az-ın baş direktor müavini), Zahid Nurəliyev (Teleqraf.com saytının redaktoru), Bəxtiyar Əlirzayev (Publika.az portalının redaktoru), Azər Hüseynbala (“Gündəlik Teleqraf” qəzetinin baş redaktorunun birinci müavini), Aygün Muradxanlı (“Yeni Müsavat” qəzeti ), Kamil Həmidov (Gun.az saytı), Ramil Məmmədli (APA), Ədalət Əliyev (jurnalist), Röya Rəfiyeva (“Yeni Müsavat” qəzeti), Fariz Quliyev (jurnalist), Kənan Hacı (kulis.az saytı) və digərləri mənzillərin kirayə həyatı yaşayan jurnalistlərə deyil, əsasən yüksək şəraiti olan baş redaktorlar və jurnalistlərə paylanmasına etiraz etməklə, bu prosesin şəffaf və ədalətli aparılmamasından hədsiz narazılıqlarını ifadə ediblər.
Bu müraciətlə bağlı “Azadlıq”a açıqlama verən Fazil Əhmədin sözlərinə görə, günü-gündən sıraları genişlənir: “Artıq bizə müraciət edən narazı jurnalistlərin sayı hər gün genişlənir. Qərara gəlmişik ki, narazılardan ibarət komitə yaradaq və fəaliyyətimizi sistemləşdirməklə vahid mərkəzdən idarə edək. Inşallah, qarşıdakı həftədə 40-a yaxın narazı jurnalist toplanacaq və gələcək addımlarımızı birgə müzakirə edəcəyik. Mümkündür ki, narazı jurnalistlər 2005-ci ildə evsiz jurnalistlərin probleminin həlli məqsədiylə yaratdığımız ”Jurnalist” MTK-nın “çətiri” altında da birləşsin”.
Jurnalist deyib ki, bütün bunlarla bərabər, dövlət başçısına ikinci bir müraciətin hazırlanması üzərində də iş aparılır: “Yaxın iki gün ərzində prezidentə daha bir müraciətimiz olacaq. Həmin müraciətdə mənzillərin hansı prinsiplər arasında bölünməsinin və haqq etmədiyi halda kimlərin mənzilə mükafatlandırılmasının detallarına da toxunulacaq. Bu bir faktdır ki, qoyulan şərtlərin ziddinə olaraq, ortada çox böyük yalan və saxtakarlıqlar var. Bütün bunlara görə də prezidentin qəbuluna yazılmaq niyyətimiz də var”.
Fazil Əhməd müraciətlərinə bəzi baş redaktorların reaksiyasını da təbii saydığını deyib: “Əlbəttə, bu, təbiidir, gözləniləndir. Əslində, vicdanları qarşısında hesabat verə bilməyənlərin nə deməsinin, şəxsən, mənim üçün heç bir əhəmiyyəti də yoxdur. Bu açıqlamalar mətbuata ”arxa qapıdan” gələn və əli qələm tutmayanları qorxuda bilər. Şəxsən mənə “Mən ev üçün sənəd verməmişdim. Mənə evi prezident verib” deyə, isterik vəziyyətlə prezidenti hədəf göstərən bəzi baş redaktorların açıqlamaları, əlavə güc verir. Eyni zamanda, 1000 işarəlik xəbər yaza bilməyənlərin özünüqoruma instikti ilə verdikləri kəskin reaksiyalar, bizim düz yolda olduğumuzu göstərir”.
Bəyim
