.jpg)
ABU rektoru məhkəmənin hakimi Əlövsət Abbasova göndərdiyi məktubda nələr yazıb?
Hazırda Bakı Ağır Cinayətlər Məhkəməsində külli miqdarda ziyan vurmaqla dələduzluqda təqsirləndirilən iş adamı Arzu Kazımovun məhkəməsi gedir. Cinayət işinin materiallarına görə, Arzu Kazımov Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayevin pulunu ələ keçirib.
Elşad Abdullayev özü də bildirir ki, 2003-cü ilin oktyabrında oğurlanmış qardaşı, MTN zabiti Mahir Abdullayevin geri qaytarılmasına yardımçı olmaq adıyla Arzu Kazımov ondan üst-üstə 3 milyon dollar pul alıb. Amma sonra nəticədə nə qardaşı qaytarılıb, nə pul.
Arzu Kazımov isə məhkəmədə ifadəsində Elşad Abdullayevin bu haqda söylədiklərinin yalan olduğunu deyib.
Onu da qeyd edək ki, iş materiallarında Arzu Kazımovun məhz Elşad Abdullayevə münasibətdə dələduzluq etdiyi yazılsa da, ABU rektoru zərərçəkmiş qismində tanınmayıb.
Dünən Elşad Abdullayev Bakı Ağır Cinayətlər Məhkəməsində sözügedən məhkəmə prosesinə sədrlik edən hakim Əlövsət Abbasova məktub göndərib. Keçmiş rektor məktubuna əlində olan videomaterialı da əlavə edib. Həmin videogörüntülərin surətini prokurorluq və MTN-ə də göndərdiyini deyən Elşad Abdullayev qeyd edir ki, bu kadrlarda Arzu Kazımovun oğlu, hazırda polis zabiti olan Zaur Kazımovla Mahir Abdullayevin geri qaytarılması haqda söhbətlər öz əksini tapıb. Bu kadrlar 21 iyul 2004-cü ildə qeydə alınıb.
Elşad Abdullayev bildirir ki, Arzu Kazımovun onun yanına vasitəçi kimi göndərdiyi Rövşanə Əliyeva (Arazxanlı) ona Zaur Kazımovun yolda olduğunu – Xaçmazdan Bakıya gəldiyini və Mahiri tezliklə gətirib təhvil verəcəyini deyib. Bu, Elşad Abdullayevin gizli lentə aldığı videokadrlardan da görünür. Rövşanə Əliyeva daha sonra öz telefonu ilə Zaur Kazımova zəng eləyib və onunla Elşad Abdullayev arasında əlaqə yaradıb. Həmin telefon danışığında Zaur Kazımov Elşad Abdullayevə deyir: “Bu gün Mahirlə birlikdə yanınıza gəlirəm, məni gözləyin”.
Elşad Abdullayev qeyd edir ki, telefon danışığında Zaur Kazımov özünü “Interpol”un polis zabiti kimi təqdim edib.
Elşad Abdullayev daha sonra yazır:
“Mütəşəkkil cinayətkar təşkilatın cinayətlərini gizlətmək, həmçinin mənə qarşı daha effektli mübarizə aparmaq üçün Zaur Kazımovu Binəqədi rayonu, IV polis bölməsinə rəis müavini təyin olundu. Bununla da faktiki Zaur Kazımov Azərbaycan Beynəlxalq Universitetini nəzarətə götürdü, çünki ABU o bölmənin ərazisində yerləşirdi. Demək olar ki, hər gün universitetin əleyhinə saxta iş açaraq, tədris müəssisəsinin normal fəaliyyətini pozurdu. Universitetə qarşı bilavasitə təxribatla məşğul olurdu, məqsədi məni təhdid edib susdurmaq idi. ABU bağlandıqdan sonra Nərimanov Rayon Polis Idarəsinə göndərildi və bu günə qədər orada işləyir.
Azərbaycanda adam oğurluğu ilə məşğul olan mütəşəkkil cinayətkar təşkilatı ört-basdır etməkdə bilavasitə maraqlı olan paqonlu əcinnələr ABU-nu bilavasitə nəzarətə götürmüşdülər. Fikir verin, daxili işlər nazirinin müavini Zahid Dünyamalıyev dünyasını dəyişəndən sonra oğlu Vəli Dünyamalıyev MTN-in Binəqədi şöbəsində ABU-nun kurasiyası üzrə işə təyin edildi.
Prezidentin Icra Aparatının rəhbəri Ramiz Mehdiyevin əsəbləri tab gətirməyərək, yaxın qohumunu, heç bir elmi dərəcəsi olmayan, MTN-in polkovniki Fikrət Əliyevi 2008-ci ildə ABU-ya prorektor təyin etdi və universiteti içəridən dağıtmağa başladılar”.
Elşad Abdullayev hakimə məktubunda onu da qeyd edir ki, Arzu Kazımova dələduzluq maddəsilə ittiham verilməsilə razılaşmır. Üstəlik, istintaq orqanı qanuna zidd olaraq, onu zərərçəkmiş qismində tanımaqdan imtina edir: “Məsələni belə qoyublar ki, onlar mənə qarşı dələduzluq edib, mən isə guya, yalvararaq zorla rüşvət verməyə cəhd etdiyim üçün zərərçəkən deyiləm. Belə cıxır ki, mən mütəşəkkil cinayətkar təşkilata yalvararaq, könüllü rüşvət vermişəm. Cinayətlərin bu cür qiymətləndirilməsində məqsəd Ramiz Mehdiyev və Ramil Usubovu məsuliyyətdən kənarda saxlamaqdır.
Bu günə qədər Azərbaycanın “şanlı” hüquq-mühafizə orqanları MTN-in oğurlanmış zabiti Mahir Abdullayevin işinə aydınlıq gətirə bilmir. Çünki onlar adam oğurluğu ilə məşğul olan mütəşəkkil cinayətkar təşkilatı ifşa etmək iqtidarında deyil”.
Informasiya şöbəsi
