«Sevinərdim ki, Müsavat rəhbərliyinin İbrahimbəyovla danışmaq istəyi gələcək hökumətə aid məsələlərlə bağlı olsun»
Sülhəddin Əkbər: «Müxalifətdən ikinci namizədin olması İlham Əliyevə imkan verir ki, rəqibinin kim olacağını özü müəyyən etsin»
Son zamanlar Milli Şurada təmsil olunan Açıq Cəmiyyət və Müsavat partiyaları arasında gərginlik yaşanır. Hazırda qarşılıqlı ittihamların ən son həddə çatdığını söyləmək olar. Belə ki, ACP lideri Rəsul Quliyevin Müsavat başqanı Isa Qəmbəri prezidentliyə layiq bilmədiyi haqda açıqlamasına qarşı tərəfdən Arif Hacılı çox sərt və ACP liderini aşağılayan ifadələrlə cavab verib.
Yaranmış vəziyyətə münasibətini bildirən ACP sədri Sülhədin Əkbər baş verənlərin arxasında təmsil etdiyi partiyanın vahid namizədlə bağlı prinsipial və aydın mövqeyinin durduğunu deyib. Onun fikrincə, belə sərt və etikadan kənar üslubun seçilməsində məqsəd müzakirələri Milli Şuranın vahid namizədi ilə bağlı əsas mövzudan yayındırmaqdır.
“Milli Şuranın vahid namizədi ilə bağlı məsələdə ACP açıq, aydın, prinsipial mövqedədir. Biz bu mövqeyi istər mətbuat konfranslarında, istərsə də rəsmi toplantılarda vurğulamışıq. Bu da istər-istəməz Müsavat Partiyasının irəli sürdüyü namizədi ictimai rəydə xoşagəlməz duruma salır. Müsavat Partiyası da bu suallara cavab vermək, düzgün addımlar atmaq əvəzinə, təəssüf ki, siyasi etikadan kənar, təhqirlə, söyüşlə, yalan-böhtanla cavab verir. Bununla müzakirə olunan məsələnin müstəvisini dəyişməyə cəhd göstərirlər. Gündəmə öz aləmlərində aktual mövzu vermək istəyirlər ki, kəskinliyilə duran məsələlər, Milli Şuranın vahid namizədi ilə bağlı məsələ ikinci planda qalsın”.
Milli Şuranın vahid namizədi olduğu halda təşkilat üzvlərindən bir başqasının namizəd olmasını yolverilməz sayan ACP sədri vurğulayıb ki, birincisi, bu, siyasi-fəlsəfi baxımdan yanlışdır. Milli Şuranın yaranma konsepsiyasının Azərbaycanın bütün demokratik qüvvələrinin bir koalisiyada birləşməsindən ibarət olduğunu deyən S.Əkbər qeyd edib ki, təşkilat yarananda qarşısına vahid namizədlə seçkilərə qatılmağı da məqsəd qoyub: “Milli Şura qarşıdan gələn seçkilərdə vahid namizəd kimi Rüstəm Ibrahimbəyovu irəli sürüb. Milli Şuranın başqa üzvünün namizədliyini irəli sürməsi təşkilatın siyasi fəlsəfəsinə ziddir. Ikincisi, bu, strateji baxımdan yanlışdır. Milli Şuranın qarşıdan gələn seçkilərdə strategiyası birləşmiş müxalifətin vahid namizədi ətrafında xalqın etirazını səfərbər, beynəlxalq basqını təşkil etmək və demokratik seçki yolu ilə hakimiyyət dəyişikliyinə nail olmaqdır. Milli Şuradan ikinci bir namizədin ortaya çıxması bu strategiyaya ziddir. Üçüncüsü, bu addım taktiki cəhətdən də yanlışdır. Əgər əvvəllər hakimiyyət Rüstəm Ibrahimbəyovun ölkəyə qayıtmasına əngəl törətmək barədə düşünürdüsə, hazırda artıq onun namizədliyinin qeydə alınmaması niyyəti qabardılır. Rüstəm Ibrahimbəyovla yanaşı ikinci namizədin ortada olması hakimiyyətə qeydiyyatla bağlı manevr imkanı verir”. Ibrahimbəyovun qeydə alınmaya biləcəyinə dair arqumentləri əsaslı saymayan S.Əkbər bunu belə izah edib ki, hazırda beynəlxalq təşkilatların hakimiyyətdən əsas tələbi azad və ədalətli seçkilərə qədər bu seçkidə real müxalifət namizədinin iştirakına imkan yaratmaqdır. Əgər demokratik qüvvələrin koalisiyası seçkilərə vahid namizədlə gedirsə, hakimiyyətin onu qeydə almaqdan başqa yolu qalmır. Çünki yeganə alternativ namizədi qeydə almamaq bəri başdan ölkədə, ümumiyyətlə, seçkinin olmayacağı anlamına gəlir. O zaman gərək Ilham Əliyev indidən etiraf etsin ki, ölkədə seçki keçirmək niyyəti yoxdur və o, açıq şəkildə sülalə hakimiyyəti qurur. Belə bir halda müxalifətdən ikinci bir namizədin olması ona bir tərəfdən manevr, digər tərəfdən də rəqibinin kim olacağını müəyyən etmək imkanı verir. Bu namizəd isə artıq birləşmiş müxalifətin deyil, yalnız siyasi partiyalardan birinin namizədi olacaq.
S.Əkbər hesab edir ki, hadisələrin belə gedişində Ilham Əliyev beynəlxalq güclər qarşısında özünü müdafiə etmək şansı qazanır: “Ilham Əliyev bəyan edir ki, artıq onun real müxalifətdən rəqibi var və həmin namizəd Milli Şurada da təmsil olunur. Nə fərqi var? Amma bu fərqin nədən ibarət olduğunu Azərbaycanda bilməyən varmı? Müxalifətin birləşməsi, vahid namizədlə çıxış etməsi məhz Rüstəm Ibrahimbəyova görə baş tutub”.
S.Əkbər bildirib ki, müxalifətdən iki namizədin olması, eyni zamanda vahid namizədin təbliğat imkanlarını və ona bəslənən ümidləri də azaldacaq. Çünki ictimai rəyin tələbi ondan ibarətdir ki, müxalifət vahid namizəd və komanda ilə seçkilərə getsin.
“Nəhayət, belə bir mənzərə yarana bilər ki, Milli Şuranın vahid namizədi qeydə alınmır, Müsavat Partiyasının namizədi isə qeydə alınır və Milli Şura vahid namizədinin qeydiyyatı uğrunda mübarizəyə başladığı halda, Müsavat namizədinin təbliğat kampaniyasına başlayır. Biz bütün bunlarla bağlı ortaya aydın siyasi mövqe qoyuruq. Amma bu siyasi mövqeyə təhqiramiz, yalan, böhtanla dolu cavab verilir. Mən ACP sədri olaraq bəyan edirəm ki, biz bu xoş olmayan niyyətləri başa düşürük və qoymayacağıq ki, Milli Şura daxilində intriqalar salınsın. Bu məsələ həllini tapmayana qədər onun gündəmdə qalmasına çalışacağıq. Bizim siyasi etikadan kənar intriqalarda iştirak etmək niyyətimiz yoxdur. Biz bunun demokratik qüvvələrin birliyi üçün nə qədər ziyanlı olduğunu dərk edirik”.
S.Əkbər eyni zamanda Müsavat rəhbərliyinin R.Ibrahimbəyov vətənə qayıtdıqdan sonra onunla vahid namizəd məsələsini müzakirə edərək yekun qərar verəcəkləri ilə bağlı bəyanatlarını da şərh edib: “Mən sevinərdim ki, Müsavat rəhbərliyinin Rüstəm Ibrahimbəyovla danışmaq istəyi elə gələcək hökumətin formalaşdırılması məsələlərilə bağlı olsun. Təki Müsavat Partiyası xalqın böyük ümidlə baxdığı Milli Şuranın qorunub-saxlanılmasında ondan gözlənilən addımları atsın”.
Hikmət
