Əli Kərimli: “Artıq həbslər belə, xalqımızı öz haqları uğrunda mübarizədən çəkindirmir”
AXCP sədri Əli Kərimli hakimiyyətin fəal gənclərə qarşı repressiyasından və gənclərin bu repressiyalar qarşısında geri çəkilməməsindən yazıb. AXCP lideri rəsmi Facebook səhifəsində paylaşdığı qeydə bu günlərdə həbsxanadan aldığı bir məəktubdan söz açmaqla başlayır. Əli Kərimli yazır:
“Bu günlərdə həbsxanadan qeyri-adi məktub aldım. Artıq siyasi fəaliyyətinə görə həbsdə olan vicdan məhbusu Rəsul Mürsəlov həbsxanadan da siyasi mühiti izləyirmiş. AXCP-nin rejimlə ardıcıl mübarizəsi Rəsul bəyi sövq edib ki, həbsdə ikən ərizə yazıb, AXCP sıralarına qoşulsun. Onu da qeyd etməliyəm ki, Rəsul Mürsəlovun AXCP sıralarına qəbul olunmaq üçün həbsxanadan müraciəti ilk belə hal deyil. Bir neçə ay qabaq başqa bir vicdan məhbusu İlqar Rzayev də həbsxanadan partiyamızın sıralarına qəbul olunmaq üçün müraciət göndərmişdi. Bir tərəfdən cəsarətli gənclərimiz mübarizə əzmi nümayiş etdirir, digər tərəfdən də İlham Əliyev hakimiyyətinin gənclərlə savaşı davam edir. İndi də rejimin hədəfində AXCP Gənclər Komitəsinin fəalı Rahib Hacıyevdir.
Rahib bəyi bir neçə ay idi ki, siyasi fəaliyyətinə görə hədələyirdilər. Rəsmən polisə də dəvət etmişdilər. Tələb edirdilər ki, müxalifətçilikdən əl çəksin. Rahib bəy isə nəinki bu hədələrə gorə siyasi mübarizəsindən imtina etmədi, əksinə ona olan hədələri ictimailəşdirirdi, hədələrdən qorxmadığını bildirirdi. Bu günlərdə hədələrini gerçəkləşdirdilər. Rahib bəyi də qondarma narkotika ittihamı ilə həbs etdilər. Qəddar və ədalətsiz cəzalar cəmiyyətdə qorxu əvəzinə nifrət yaradır. Artıq siyasi fəaliyyətinə görə bir dəfə həbs olunmuş vicdan məhbusları həbsxanada ikən belə AXCP sıralarına qoşulurlarsa, deməli hökumətin repressiyaları öz məqsədinə çata bilmir. Həbslər belə xalqımızı artıq öz haqları uğrunda mübarizədən çəkindirmir. Rahib bəyin həbsinə cavab isə bu dəfə həbsxanadan gəldi”.
