İran və İndoneziyanın imtina etdiyi İslamiadaya Azərbaycan razılıq verdi
Səudiyyə Ərəbistanın Ciddə şəhərində İslam Həmrəyliyi İdman Federasiyasının (İHİF) 8-ci hesabat-seçki Baş Assambleyası keçirilib. Məlumata görə, iclasda Azərbaycan Respublikası Milli Olimpiya Komitəsinin (MOK) və İHİF-nın vitse-prezidenti Çingiz Hüseynzadə, Beynəlxalq Əlaqələr İdarəsinin rəisi və Bakı-2017 İslam Həmrəyliyi Oyunlarının Təşkilat Komitəsinin icraçı direktoru Könül Nurullayeva, MOK-nin Beynəlxalq proqramlar üzrə mütəxəssisi və İslam Həmrəyliyi Oyunlarının işçi qrupunun üzvü Mehman Kərimov şəhərin təqdimatı ilə çıxış ediblər. İslam Həmrəyliyi İdman Federasiyasına üzv olan MOK-lar 2017-ci ildə 4-cü İslam Həmrəyliyi Oyunlarına ev sahibliyi etmək üçün Azərbaycana səs veriblər və tam səs çoxluğu ilə Azərbaycanın 2017-ci ildə 4-cü İslam Həmrəyliyi Oyunlarına ev sahibliyi etməsi haqda qərar qəbul edilib.
Azərbaycanın bu cür idman tədbirinə belə canfəşanlıqla ev sahibliyi etməsi və bunun iqtidarın böyük uğuru kimi təqdim olunması əslində olduqca gülüncdür. Çünki İslam Həmrəylik Oyunları, başqa cür İslamiada adlanan bu idman tədbiri o qədər qeyri-ciddidir ki, iki dəfə ümumiyyətlə keçirilməyib. Yəqin sizə qəribə gəldi ki, necə yəni keçirilməyib? Təəccüblənməyin, bir az bu oyunların tarixinə ekskurs edək.
Demək, ilk İslamiada 2005-ci ildə Səudiyyə Ərəbistanında keçirilib. Özü də Səudiyyə Ərəbistanı kralı Fəhdin təşəbbüsü ilə. Elə həmin ildə də qərara alınıb ki, növbəti oyunlar 2009-cu ildə İranda keçirilsin. Amma 2009-cu il İran oyunları baş tutmayıb. İran bəyan edib ki, iqtisadi böhrandı və belə bir əhəmiyyətsiz oyunları keçirməyə maliyyə ayıra bilməz. 2009-da İslam Həmrəylik Oyunlarının Təşkilat Komitəsi növbəti üçüncü oyunların İndoneziyada keçirilməsi qərarını verib. Amma keçən ilin sonunda İndoneziya rəsmən elan edib ki, 57 islam dövlətinin idmançılarını qəbul etməyəcək. Yenə də bildirilib ki, oyunların heç bir əhəmiyyəti yoxdur. Adi olimpiada lisenziyası vermir. Təşkilat komitəsi İslamiadanın, özü də bir dəfə keçirilməklə tarixə qovuşacağından narahat olmağa başlayıb. Belə bir anda Azərbaycan peyda olub. Azərbaycandan başqa 2017-ci il İslamiadasının keçirilməsi üçün heç bir ölkə namizədliyini verməyib və ölkəmizin namizədliyi təsdiqlənib. İndi bu mənasız oyunlara, adı 4-cü, özü isə 2-ci dəfə keçiriləcək İslamiadaya nə qədər pul silinəcəyi maraq doğurur. Yaşayarıq, görərik.
Azad
