Suriyada son həftələr güc nisbətinin Əsəd qüvvələrinin xeyrinə dəyişməsinə baxmayaraq, üsyançılar Hələb şəhərinin qərbini ələ keçirməyə müvəffəq olublar. “Azad Suriya Ordusu” Hələbin Xan əl-Assal bölgəsinə nəzarəti ələ keçirdiyini açıqlayıb. Üsyançılar iddia edirlər ki, Hələbin qərbi Əsəd qüvvələrinin nəzarətində olan yeganə bölgə idi və onun alınması ilə şəhər tamamilə üsyançıların əlinə keçmiş olub. “Hələbin qərbindəki giriş nöqtəsini Əsəd qüvvələrindən azad etməyi bacardıq. Xan əl-Assal tamamilə azadlığına qovuşdu, bununla da şəhəri tam ələ keçirdik. Əsəd qüvvələri, İran İnqilabı Keşikçiləri Korpusunun və Livanın “Hizbullah” hərəkatının qüvvələri üzərində qələbə qazandıq” – “Azad Suriya Ordusu”nun bəyanatında belə deyilir. İngiltərədə mərkəzləşən “Suriya İnsan Haqları Müşahidə Qrupu” isə üsyançıların bazar ertəsi Hələbin cənub-şərqindəki Übeyda və Həcirə kəndlərini də ələ keçirdiyini bildirmişdi.
Bu arada, Suriya hökuməti və müxalifət qüvvələri bir-birini Hələbin Xan əl-Assal bölgəsi uğrunda gedən və 25 nəfərin həlak olduğu döyüşlərdə kimyəvi silahdan istifadə etməkdə ittiham edib. BMT-nin Yaxın Şərq sülh prosesi ilə bağlı təmsilçisi Robert Serri ötən gün verdiyi açıqlamada Suriyada 13 dəfə kimyəvi silahdan istifadəyə dair məlumatlara malik olduqlarını bildirib.
Bu arada, Hələbdəki həbsxanalardan birində saxlanılan 80 üsyançı Suriya “Qızıl Xaç Komitəsi”nin vasitəçiliyi ilə hökumət qüvvələri ilə razılaşma çərçivəsində azad edilib. Razılaşmaya əsasən, hökumət qüvvələrinin nəzarəti altında olan bölgəni blokadaya alan “Əhrar əl-Şam” qruplaşması əsir üsyançıların azad edilməsi qarşılığında hökumət qüvvələrinə ərzaq yardımının çatdırılmasına icazə verəcək. Bu razılaşma Əsəd qüvvələri ilə müxalifət qüvvələri arasında nadir rast gəlinən xoş məram jesti olaraq qiymətləndirilir.
BMT-nin hesablamalarına görə, Suriyada 2 il yarımdır davam edən vətəndaş müharibəsi zamanı 100 mindən çox adam həlak olub (ans press).