«Hakimiyyət qəzeti məhkəmələrin əliylə boğmaqda israrlıdır»
“Azadlıq” qəzetinin “Binə” ticarət mərkəzinin rəhbəri Kəbirə Məmmədovanın iddiası əsasında 32 min manat cərimələnməsi barədə qərar bu dəfə də qüvvədə saxlanıldı. Apelyasiya Məhkəməsindən sonra Ali Məhkəmə də ilkin instansiyanın – Yasamal Rayon Məhkəməsinin cərimə qərarını dəyişmədi.
Yada salaq ki, K.Məmmədova “Azadlıq” qəzetini ticarət mərkəzində baş verən qanunsuzluğu işıqlandırdığına görə məhkəməyə vermiş, məhkəmə də qəzetin 30, məqalə müəllifinin 2 min manat cərimələnməsi haqda qərar qəbul etmişdi. “Azadlıq” qəzetinin baş redaktorunun birinci müavini Rahim Hacıyevin fikrincə, hakimiyyət bununla “Azadlıq”ı məhkəmələrin əliylə sıradan çıxarmaq siyasətində israrlı olduğunu bir daha sübut etdi: “Məhkəmə predmetinə səbəb olan məqalədə ”Eurovision” ərəfəsi “Binə” ticarət mərkəzindəki sahibkarlardan qanunsuz olaraq pul yığılmasından, rəhbərliyin işçilərə yaratdığı dözülməz vəziyyətdən bəhs olunurdu. Bu il “Binə”də kütləvi etirazların keçirilməsi bizim məlumatların doğru olduğunu göstərdi. Təəssüf ki, məhkəmə qanunla müəyyən edilmiş qaydada heç bir ciddi araşdırma aparmadan “Azadlıq” qəzetinin yüksək məbləğdə cərimələnməsi haqda qərar verdi. “Binə”dəki məlum etiraz aksiyasından bir müddət sonra Apelyasiya Məhkəməsi işə baxsa da, baş verən etirazları nəzərə almadan birinci instansiyanın qərarını qüvvədə saxladı. Bütün bunlar onu göstərir ki, məhkəmələr siyasi hakimiyyətin “Azadlıq” qəzetinə qarşı sanksiyalaşdırılmış qərarlarını elan etməklə məşğuldular. Qəzetin belə böyük məbləği ödəmək imkanında olmadığı hamıya bəllidir. Görünür, hakimiyyət bu yolla seçki öncəsi dövrdə qəzetin fəaliyyətinin dayandırılmasına nail olmaq istəyir”.
“Azadlıq”a olan basqıların bununla məhdudlaşmadığını deyən R.Hacıyev xatırladır ki, ölkədə təmtəraqla Milli Mətbuat Gününün qeyd olunduğu vaxtda bir tərəfdən qəzetin üzərinə 32 min manat məbləğində cərimə qoyulur, digər tərəfdən “Azadlıq”ın baş redaktoruna qarşı iki məhkəmə iddiası qaldırılır: “Ən maraqlısı odur ki, Ali Məhkəmə işə iyulun 22-də – Milli Mətbuat Günündə baxıb və aşağı instansiya məhkəmələrinin qərarlarını dəstəkləməyi vacib hesab edib.ÿ
Bütün bunlar hakimiyyətin “Azadlıq” qəzetinə qarşı total hücumda olduğunu göstərir”.
