Nabranda istirahət mərkəzlərindən birində baş verən dəhşətli hadisə nəticəsində xəsarət alan və ayaqlarından birini itirən, o birisini isə itirmək təhlükəsi qarşısında qalan 2 yaşlı İmran Cəfərzadəyə görə Mərkəzi Kliniki Xəstəxananın saytı hakerlər hücumuna məruz qalıb. İmran Cəfərzadə bu xəstəxanada müalicə olunur. Xəstəxananın saytına hücum edənlər körpənin müalicəsi üçün pul tələb olunmasına etirazlarını bildiriblər. Hakerlər xəstəxananın saytını dağıdaraq, ora İmran Cəfərzadə ilə bağlı məlumat yerləşdiriblər. Məlumatda qeyd olunub: “Buradan Mərkəzi Klinikanın böyüklərinə səslənirik. Sizdə insaf varmı? Bu balaca canını sizə əmanət edib. Ondan hər gün 800 AZN alırsınızsa, hansı insanlıqdan danışırsınız? Bir xəstədən pul almamaqla siz kasıblamayacaqsınız!”.
Hücum aradan qaldırılıb və sayt normal fəaliyyətini bərpa edib.
Bu arada körpənin müalicəsinin dövlət səviyyəsində nəzarətə götürüldüyü xəbər verilib. Körpənin anası Nuridə Cəfərova “day.az” saytına deyib ki, onunla ölkə başçısı İlham Əliyev və onun xanımının adından əlaqə saxlayaraq, İmranın müalicəsinin nəzarətə götürüldüyünü deyiblər və onun Almaniyada müalicəsinə söz veriblər.
Bundan başqa, müğənni Emin Ağalarov da özünün facebook səhifəsində İmran Cəfərzadənin müalicə xərclərini üzərinə götürdüyünü yazıb. Bu barədə “lent.az” məlumat yayıb.
