Vidadi Mirkamal: «Bunlar ictimai siyasi həyatı gərginləşdirəcək faktlar ola bilər»
Eldar Namazov: «Ona məxsus olan mülkləri və maliyyə imkanlarını açıq şəkildə göstərməlidir»
Beynəlxalq hesabatlarda, Qərb mətbuatında ölkə başçısı Ilham Əliyev və ailəsinə məxsus sərvətlərin açıqlanması ictimaiyyətdə də geniş müzakirələrə səbəb oldu. Prezident seçkiləri ərəfəsində isə bu mömzu bir daha gündəmə gəlir. Prezidentin ailəsinə məxsus sərvətlərlə bağlı məlumatları hakim ailə tərəfindən təkzib edilməməsi isə deyilənlərin həqiqət olduğunu bir daha təsdiq edir.
Ancaq hakim partiyanın prezidentliyə namizədi olan Ilham Əliyev təqdim etməli olduğu gəlir bəyannaməsində sərvətləri ilə bağlı məlumat verəcəyi inandırıcı deyil. Bu halda öz namizədini irəli sürət Milli Şura bununla bağlı hansı addımlar atacaq?
Milli Şuranın üzvü Vidadi Mirkamal normal ölkədə namizədin gəlir bəyannaməsini qaydası olmayanda Mərkəzi Seçki Komissiyasının namizədliyi ləğv etməyə borclu olduğunu deyir. Amma Azərbaycanda bunu gözləməyə dəyməz: “Ilham Əliyevin əmlakları ilə bağlı davamlı olaraq məlumatlar gedib. Əliyev bunu təkzib etməyib. Əgər o məlumatlar öz təsdiqini taparsa, MSK-ya bununla bağlı məlumat verilməlidir və namizəddən bunun hesabı sorulmalıdır. Amma güman etmirəm ki, MSK Ilham Əliyevi çağırıb nəsə soruşsun”.
V.Mirkamal dəfələrlə Ictimai Palatanın ailənin sərvətləri ilə bağlı dinləmələr keçirdiyini yada salaraq seçki ərəfəsində bu məsələ ilə bağlı aksiyaların keçiriləcəyini də istisna etmədi. Ancaq bunun nə dərəcədə təsirli olacağını indidən demək çətindir: “2013-cü il fərqlidir. Vəziyyət də tam başqa ola bilər. Güman edirəm ki, bunların hamısı ictimai siyasi həyatı gərginləşdirəcək faktlar ola bilər”.
Milli Şura Aparatının rəhbəri Eldar Namazov isə təmsil olunduğu qurumun ölkə başçısının sərvətləri ilə bağlı Baş Prokurorluğa, Mərkəzi Seçki Komissiyasına, Ali Məhkəməyə, Konstitusiya Məhkəməsinə müraciət etdiyini xatırlatdı. Həmin müraciətdə bu məsələ konkret faktlarla qaldırılır. Hakimiyyət namizədinin haqqında dünya mətbuatında çap olunan jurnalist araşdırmalarında gedən bütün sənədli, arqumentli ittihamların araşdırılması tələb edilir. Eyni zamanda bu qarşıdan gələn prezident seçkiləri ilə bağlıdır ki, hər bir namizəd maliyyə bəyannaməsində ona məxsus olan mülkləri və maliyyə imkanlarını açıq şəkildə göstərməlidir: “Bu tələbi artıq irəli sürmüşük. Rəsmi olaraq dövlət orqanlarına müraciət etmişik. Bir müddətdən sonra qanuna uyğun olaraq onlardan cavab gəlməsə, bu məsələni təkrar qaldırcağıq”.
Fizzə
