Hadisədən sonra 1-ci qrup əlil olan Məsim Rüstəmova Icra Hakimiyyəti «müalicəyə pulumuz yoxdur» deyir.
Samux rayonu Ziyadlı kənd sakini Məsim Rüstəmov Göygöldə ölkə başçısı Ilham Əliyevin villasını təmir edərkən yıxılaraq ağır xəsarət alıb. Bu barədə onun xanımı Rəmziyyə Rüstəmova “Azadlıq”a məlumat verib. O deyib ki, yoldaşı Gəncənin keçmiş icra başçısı Eldar Əzizovun müavini Şahmalı Cavadovun qardaşı oğlunun yaratdığı fəhlə qrupunda işçi olub. 2011-ci ilin aprelində I.Əliyevin Göygölə səfəri zamanı villanı təmir etmək üçün M. Rüstəmovu ora göndəriblər. Onunla əmək müqaviləsi bağlanmayıb. M. Rüstəmov təhlükəsizliyi üçün heç bir avadanlıqla təmin olunmadan villanın dam örtüyünü təmir edib. Həmin vaxt ayağı sürüşərək 15 metr yüksəklikdən ağzı üstdə yerə düşüb.
“Demişdilər ki, içəri yağış düşür və villanın damın düzəltmək lazımdır. O da bu işi görəndə ayağı sürüşüb ağzı üstdə yerə dəyib. Üçüncü dərəcəli şok vəziyyətində Gəncədə 3 saylı xəstəxanaya gətirdilər. Bir gün reanimasiyada qaldı. Həkimlərin yazdığı xəstəlik tarixçəsində yoldaşımın yıxılarkən beynində böyük travma yarandığını, iki qolunun sındığını, dalağının partladığını, qarnında qrica yarandığı göstərilib. Yoldaşım bu hadisədən sonra 1-ci qrup əlillik aldı. Indi 44 manat təqaüd alır” – Rəmziyyə Rüstəmova deyib.
Məsim Rüstəmovun əmək müqaviləsi olmadığından heç bir dövlət qrumu ona kömək etmir. R. Rüstəmova rayonun icra hakimiyyətinə müraciət etdiyini, amma hər dəfə “baxacağıq” deyib keçdiklərini bildirib. Qadın deyib ki, evə yeganə gəlir gətirən yoldaşı olub. O, indi Gəncə şəhər Vərəm Əleyhinə Dispanserdə müalicə alır. Bir il olar onda vərəm xəstəliyi aşkarlanıb. R. Rüstəmova ailənin maddi durumunun pis vəziyyətdə olduğunu bildirib. O, ailəsinə və yoldaşının müalicəsinə köməklik göstərilməsini istəyib. “Yoldaşımın halı yoxdur, nəfəsin zorla alır. 21 gündür Dispanserdə yatır. Köməyə ehtiyacımız var”.
Göygöl rayon Icra Hakimiyyətinin başçısı Arif Seyidovun mobil nömrəsi sönülü olduğundan, onun köməkçisi Elxan Hüseynovla əlaqə saxladıq. O bildirdi ki, icra hakimiyyəti büdcə təşkilatıdır və büdəcədən pul ayrılarkən bu məsələlər nəzərdə tutulmayıb. “Büdcədən elə bir yardım ayrılmır ki, pis gündə olanlara pul verək. Biz göstəriş verə bilərik ki, o, rayonun Mərkəzi Xəstəxanasında pulsuz müalicə alsın. Bizim rayonumuzda onun günündə olan o qədər adam var… Amma bizim onlara kömək etməyə pulumuz yoxdur”.
Sevinc Vaqifqızı
