Ədliyyə Nazirliyi talassemiya xəstəsi Zaur Qurbanlının təcridxanada saxlanmasını mümkün sayır
Ombudsman aparatının əməkdaşları Bakı təcridxanasında gənc fəallar Zaur Qurbanlı, Bəxtiyar Quliyev, Üzeyir Məmmədli, Rəşadət Axundov, Şahin Novruzlu, Rəşad Həsənov, Müsavat Partiyası sədrinin müşaviri Yadigar Sadıqov və digərlərinə baş çəkiblər.
Ombudsmanın nümayəndələri məhbusların saxlanma şəraiti, onların səhhəti, onlara qarşı davranışla maraqlanıblar. Təkbətək görüş zamanı həbsdə olanlar saxlanma şəraitindən və onlarla davranışdan şikayətlənməyiblər. Bu barədə ombudsman aparatının mətbuat xidməti bildirir.
Eyni zamanda NIDA hərəkatının fəalı Z.Qurbanlının anasının müraciəti əsasında təcridxananın tibbi-sanitar hissəsinin rəisi ilə söhbət aparılıb. Z.Qurbanlının vəziyyətinə dair tibbi arayış alınıb: təcridxanada saxlandığı müddətdə müayinələr, tibbi nəzarət, vəziyyətin stabil və qənaətbəxş olması, digər müalicəyə ehtiyacın olmaması barədə.
Bununla yanaşı ombudsman Ədliyyə Nazirliyi Müalicə Müəssisəsinin rəisinə müraciət edib. Z.Qurbanlı Elmi Tədqiqat Hemetologiya və Transfuziologiya Institutunda müayinə olunub, ultrasəs müayinəsindən keçib, qan analizi verib. Z.Qurbanlının qan göstəricilərinin və dalağının ölçüsünün normaya uyğun olduğu müəyyən edilib və diaqnoz qoyulub: beta-talassemiya geninin daşıyıcısı.
Ədliyyə Nazirliyi Baş Müalicə Müəssisəsindən bildirilib ki, Z.Qurbanlının səhhəti nəzarət altındadır və o, vaxtaşırı müayinədən keçiriləcək. Ombudsmanın mətbuat xidməti bildirib.
Z.Qurbanlının anası Səkinə Qurbanova isə Turan-a bildirib ki, ymke beta-talassemiya geni daşıyıcısı deyil, beta-talassemiya xəstəsidir. O, Zaurun həkim müayinəsində olması və ona lazımi yardımın göstərilməsi ilə bağlı ombudsman aparatının məlumatını şərh edərkən belə deyib.
Ananın sözlərinə görə, Zaurun vəziyyəti tez-tez pisləşir, azhərəkətli həyat tərzindən yenidən babasil kəskinləşib. MKX-dən dəvət olunan həkim cərrahiyyə əməliyyatının vacibliyini bildirib.
“Biz əməliyyatı etibarlı həkimin aparması ilə bağlı icazə almamışıq. Hələlik onu dərmanlarla saxlayırıq”, – S.Qurbanova qeyd edib. Onun sözlərinə görə, son günlər Zaurun ayaqları şişir, göyərir ki, bu da üç il əvvəl aldığı zədənin nəticəsidir. O zaman onu üç yerdən əməliyyat ediblər və indi də həmin zədələr kəskinləşib.
Lakin ən pis olan talassemiyanın kəskinləşməsidir. “O, talassemiya geni daşıyıcısı deyil, xəstədir. 15 yaşına qədər Şəkidə yaşamışıq, orada qeydiyyatda olub və ona müntəzəm qan köçürülüb”, – ana bildirib.
Təmiz havanın çatışmaması da onun səhhətinə mənfi təsir göstərir və xəstəlik inkişaf edir.
Iyulun 2-də vəkil Xalid Bağırov Penitensiar Xidmət rəhbərliyinə müraciət edib ki, Zaurun yanına müstəqil həkim buraxılsın, lakin cavab yoxdur.
Həmçinin ana Zaurun Hematologiya və Transfuziologiya ETI-də müayinədən keçməsi ilə bağlı ombudsmanın məlumatını təkzib edib.
Vəkil X.Bağırov da öz növbəsində qeyd edib ki, Nazirlər Kabinetinin 29 dekabr 2005-ci il 242 saylı qərarına əsasən talassemiya xəstələrinin həbs şəraitində müayinə və müalicəsi mümkün deyil.
