Şərq Tərəfdaşlığı Vətəndaş Cəmiyyəti Forumunun daimi komitəsinin həmsədri Kristof Bobinski Avropa Parlamentində təmsil olunan siyasi fraksiyaların rəhbərlərinə müraciət ünvanlayaraq Azərbaycanda keçiriləcək 2013 Prezident seçkilərinə Avropa Parlamentinin müşahidəçi qrupunun göndərilməsinə dəstək verməyə çağırıb. Gozetci.az portalının məlumatına görə, adıçəkilən müraciətdə qeyd olunur ki, beynəlxalq müşahidəçilər seçki pozuntularının qarşısının alınmasında mühüm rol oynayır və Avropa Parlamentinin müşahidə qrupunun seçkilərdə iştirakı həm də Azərbaycanda seçkiləri müşahidə edən yerli qruplara dəstək olacaq.
Xatırladaq ki, iyulun 13-də Avropa Parlamentinin Demokratiyaya Dəstək və Seçki Qrupu Azərbaycanda keçiriləcək Prezident seçkilərinə müşahidə qrupunu göndərilməsi məsələsini gündəlikdən çıxarıb. Bununla bağlı qərara isə sentyabrın 5-də – Avropa Parlamentinin Prezidentlər Konfransında baxılacaq.
Bobinski vurğulayıb ki, Demokratiyaya Dəstək və Seçki Qrupu tərəfindən qəbul olunmuş bu qərar Azərbaycan vətəndaş cəmiyyəti tərəfindən narazılıq və təəssüflə qarşılanıb. Eyni zamanda Azərbaycan parlamentin üzvləri qərarı sevinclə qarşılayaraq, bunu ölkənin demokratik inkişafının seçkilərin müşahidəsinə ehtiyac olmadığı bir səviyyəyə çatması kimi qiymətləndiriblər.
Müraciət məktubu Avropa Parlamentinin Prezidenti, Avropa Parlamentinin Demokratiyaya Dəstək və Seçki Koordinasiyası Qrupunun həmsədrlərinə, Avropa üçün Liberallar və Demokratların Alyansı qrupuna, Yaşıllar/Avropa Azad Alyans qrupunun həmsədrlərinə, Sosialist və Demokratların Proqressiv Alyansı qrupuna və Avropa Xalq Partiyası qrupuna ünvanlanıb.
