Eyyub Hüseynov: «Avtobusun içində zədə alan sərnişinə sığorta şirkəti pul ödəməlidir»
Xeyli müddətdir ki, yol qəzalarının sırasına avtobuslar da qoşulub. Ictimai nəqliyyatda baş verən yol qəzaları, hadisələrin ucbatından sərnişinlər artıq bu xidmət növündən ehtiyatla istifadə edilir. Maraqlıdır ki, avtomobil, avtobus və onun aid olduğu şirkətlər sığortalansa da bundan sərnişinlər istifadə edə bilmir. Avtobusda baş verən qəzalarda xəsarət alan, yaralanan sərnişinlərə hansısa formada kompensasiya verilmir. Onlar öz hesablarına müalicəyə göndərilir və sığorta şirkəti həmin insanların taleyilə faktiki olaraq maraqlanmır.
Qanunvericilikdə bu məsələnin necə nəzərdə tutulmasını aydınlaşdırmaq üçün Azad Istehlakçılar Birliyinin (AIB) sədri Eyyub Hüseynova müraciət etdik. Eyyub bəyin söylədiyinə görə, sərnişinlərin sığortalanması barədə keçən parlamentdə məsələ müzakirəyə çıxarılıb. AIB bütün cidd-cəhdlə həmin qanunun qəbul olunmasına çalışsa da, məsələ nəticəsiz olub: “Orada istehlakçıların, sərnişinlərin xeyrinə olan maddələr vardı. Həmin qanunda nəzərdə tutulmuşdu ki, vətəndaş dayanacaqda dayanıbsa, artıq o gözlədiyi avtobus sığortalanıb. Avtobusun içərisində hansısa bir yeri zədələnən, əzilən sərnişin olsa, sahibkar həmin şəxsə kompensasiya ödəməlidir. Təəssüf ki, həmin qanun qəbul olunmadı. Kimlərinsə marağı ucbatından qanun uzaq, dərin bir küncə atıldı. Bu gün də sərnişin-istehlakçıların həyatı sığortalanmır və onların həyatı təhlükə qarşısında qalıb”. AIB sədri söyləyir ki, qurum parlamentdə həmin qanunun qəbul olunmasına nail olmaq üçün iş aparır. Həmsöhbətimizə görə, avtobuslar, sərnişindaşıma biznesi məmurların himayəsinə keçəndən sonra həmin qanun arxa plana keçib. Əslində, avtobus dayanacağında, onun içində, metroda, təyyarə və qatarda sərnişinlər avtomatik şəkildə sığortalanmalıdır. Bir çox ölkələrdə bu qanun var. Amma Azərbaycanda belə qanun yoxdur: “Azərbaycandakı yol qəzalarında gündə dörd adam ölür, doqquz nəfər yaralanır. Bu sahədə bir sıra işlər görülməlidir. Misal üçün, sərnişindaşıma və sairədə ”102″ telefon xəttinin fəaliyyəti sıfıra bərabərdir. Bu barədə DIN-ə dəfələrlə müraciət etmişəm. Elə özüm 2011-ci ilin mayında Şirvana qədər hərəkət qaydalarını pozan, qəza vəziyyəti yaradan bir maşın barədə “102″ xidmətinə məlumat verdim. Mənə dedilər ki, gəlib Qaradağ polis məntəqəsində ərizə yaz. Guya, mən yolumu dəyişib ora getməli və ərizə yazmalıydım. Əslində məlumatı vermişəm və qəzanı yaradan sürücü də postlardan maneəsiz keçə-keçə gedir. Dediyim odur ki, ”102″ xidməti trassda əhəmiyyətini itirir. Istehlakçıların mindiyi avtobusda mütləq “qaynar xətt”, öz təhlükəsizliyi üçün məlumatları çatdırma mexanizmi olmalıdır. Təəssüf ki, bu yoxdur”.
Nigar
