Hakimiyyət Əli Kərimlidən qisas alır

AXCP sədrinin qaynı törətmədiyi cinayətə görə cəzalandırılır

“Texnikabank” işi üzrə Bakı Ağır Cinayətlər Məhkəməsində dörd aydır davam edən məhkəmə prosesinin 3 gün əvvəl  utancverici bir şəkil alması haqda məlumat vermişdik. Ötən dörd ay ərzində ittihamları sübut edəcək faktlar ortaya qoyulmasa da, prokuror məhkəmə qarşısına çıxarılan şəxslərə ağlasığmaz cəzalar istədi və təqsirləndirilən şəxslər üçün 9-11 il arası həbs cəzası tələb edildi.
Mühakimə olunanlar arasında AXCP sədri Əli Kərimlinin qaynı, “Texnikabank”ın Yasamal filialının müdir müavini olmuş Elnur Seyidov da var və prokuror bu adama 11 il iş istəyib.
“Texnikabank” məsələsi hər dəfə gündəmə gələndə nədənsə hər kəsin yadına Əli Kərimli düşür. 
Əslində bu təbii haldı və hər kəs başa düşür ki, Elnur Seyidova 11 il iş istəmək, Əli Kərimlidən qisas almaq, onun yaxın adamına işgəncə vermək məqsədi güdür. Uzun illərdi ki, bu ölkədə qanun qisas alətinə çevrilib, məhkəmə oyuncaq qurum təsiri bağışlayır. Əli Kərimlinin prinsipial mövqeyi, hakimiyyəti sərt tənqid etməsi, rəhbərlik etdiyi təşkilatın  ölkədə ən təşkilatlanmış müxalifət partiyası olması hakimiyyəti narahat edir.
Əslində hakimiyyət belə bir mövqe tutmaqla ölkədə qanunun heç bir qüvvəsinin olmadığını etiraf etmiş olur. Elnur Seyidovla bağlı baş verənlərə tanınmış hüquqşünaslarda münasibət bildirdi.

«Elnur Seyidovun həbsi Azərbaycan tarixində hüquqi nonsensdir»

Hüquqşünas Vidadi Mirkamal hesab edir ki, Elnur Seyidovun həbsi Azərbaycan tarixində hüquqi nonsensdir: “Ittihama görə, bu adam saxta müqaviləyə imza atıb. Məsələ burasındadır ki, Elnur Seyidov müştəri ilə müqavilə bağlayıb, müştəri kreditin 80 faizini ödəyib və bank bu işdən mənfəət götürüb. Bu işdə nəinki cinayət tərkibi, hüquqi pozuntu da yoxdur. Yəni müqavilə üzrə öhdəliklər icra olunub. Hüququn üstün olduğu heç bir dövlətdə bu hal üzrə həbs qətimkan tədbiri seçilə bilməz. Prokurorun 11 il iş istəməsi Elnur Seyidova yox, seçkidən öncə Əli Kərimliyə təzyiqdir. Bu, siyasi sifarişdi. Baş verməmiş cinayətlə bağlı istintaq işi aparılması hakimiyyətin yuxarı eşelonunun göstərişidir”.

«Elnur Seyidov siyasi məqsədlərlə həbs olunduğu üçün biz onun siyasi məhbus sayırıq»

Hüquq müdafiəçisi Rəsul Cəfərov hesab edir ki, bu həbs sifarişlidir və hüququn bütün normalarına ziddir: “Artıq bu cür hallar dəfələrlə təkrarlanıb və ədalətsiz hökmlər icra olunub. Biz Elnur Seyidovla bağlı baş verənləri siyasi həbs kimi qiymətləndiririk. Bu adamın yaxın qohumu müxalifət lideri olduğu üçün siyasi təzyiq vasitəsi kimi istifadə edilir. Biz bununla bağlı beynəlxalq təşkilatları məlumatlandıracağıq. Azərbaycana siyasi məhbuslarla bağlı yeni məruzəçi təyin olunmalıdır və bu şəxsin fəaliyyətinə maneə törədilməməsinə nail olmaq lazımdır. Əgər siyasətlə məşğul olmayan bir insanı, siyasi məqsədlərlə həbs edirlərsə, bu şəxsi siyasi məhbus adlandırmaq lazımdır”.

«Elnur Seyidov Cinayət Məcəlləsində nəzərdə tutulmuş əməllərin heç birini törətməyib»

Hüquqşünas Müzəffər Baxışov bildirdi ki, Azərbaycanda müstəqil məhkəmə hakimiyyəti yoxdur və bu çox mühüm amildir: “Elnur Seyidovla bağlı cinayət materiallarını tam şəkildə oxumuşam və bütün məsuliyyətimlə deyə bilərəm ki, bu adamın heç bir günahı yoxdur. Bu, siyasi sifarişdir və məhkəmə də həmin ittihama uyğun olaraq hökm çıxarır. Elnur Seyidov Cinayət Məcəlləsində nəzərdə tutulmuş əməllərin heç birini törətməyib. Bura Azərbaycan olduğu üçün cinayət törədənlərin hamısı həbs edilmir, ancaq cinayət törətməyən insanlar məhkəmə qarşısına çıxarılır, ədalətsiz hökmlərin qurbanına çevrilir”.

İlham Hüseyn