AXCP Gənclər Komitəsinin həbsdə olan üzvü Daşqın Məlikov səhhətinin pisləşməsi səbəbi ilə Penitensiar Xidmətin Böyükşordakı müalicə müəssisəsinə köçürülüb. Bu barədə Daşqının atası Əlisəfa Məlikov “Azadlıq”a xəbər verib.
Ə.Məlikov deyib ki, Şüvəlan təcridxanasından ona zəng edərək oğlunun vəziyyətinin ağırlaşdığına görə xəstəxanaya yerləşdirildiyini bildiriblər: “Bizə dedilər ki, Daşqının vəziyyəti ağırlaşıb və onu Böyükşordakı xəstəxanaya yerləşdirblər. Əlavə məlumatımız yoxdur. Xəstəxanadan da məlumat vermirlər ki, zəruri ehtiyaclarını aparaq. Bilmirik kimə zəng edək. Vəkili hazırda ölkədə olmadığı üçün əlaqə saxlaya bilmirik. Daşqının xəstəliyi ağırdı, həbsxana şəraitində onun həyatına təhlükə var”.
Ə.Məlikovun dediklərinə Ədliyyə Nazirliyinin Tibb Baş Idarəsinin rəis müavini Iftixar Qurbanov cavab verib. O, “Azadlıq”a deyib ki, xəstənin vəziyyətində ağırlaşma yoxdur və Daşqın müayinə üçün Pentensiar Xidmətin Böyükşor qəsəbəsində yerləşən Müalicə Müəssisəsinə göndərilib. “Mən özüm tapşırıq vermişəm ki, Daşqın Məlikovu müayinədən keçirsinlər. O, bronxial astma xəstəsidir və biz onun vəziyyətini bilməliyik. Tibbi sanitar hissəsində səhhəti nəzarətdə idi. Daşqını stasionar şəraitə keçirmişik, orada müayinə edəcəyik”.
Rəsi müavini əlavə edib ki, xroniki xəstələri plan üzrə stasionar şəraitdə müalicəyə göndərirlər. “Xroniki xəstənin səhhətində heç olmasa ildə bir dəfə dispanser nəzarəti olmalıdır. Daşqın Məlikovu mütəxəssislər müayinə edəcəklər. Bu müayinə ola bilər 1 həftə çəksin, ola bilər 2 həftə, 10 gün… Bu, müayinələrin nəticələrindən asılıdır”.
Daşqın Məlikov 2-ci qrup əlildir, astma xəstəsidir və məcburi müalicəyə ethtiyacı var. Daşqın Məlikovun Cinayət Məcəlləsinin 234.1-ci (narkotik saxlama, gəzdirmə) maddəsilə ittiham olunaraq 2il 6 ay müddətində azadlıqdan məhrum edilib.
Tibbi ekspertiza Daşqın Məlikovun narkotik asılılığı olmasını təsdiq etməsə də, siyasi sifariş nəticəsində xəstə gəncə qərəzli hökm çıxarılıb.
Hazırda Daşqın Məlikovun qondarma həbsi ilə bağlı sənədlər Avropa Məhkəməsinə göndərilib.
Informasiya şöbəsi
