İTV-çilər bir-birinin səsini telefona yazır, «danos»bazlıq edirlər
Aprel ayında Ictimai televiziyaya baş direktor təyin ediləndən sonra Cəmil Quliyev sovetdənqalma geniş istehsalat müşavirəsi keçirib. “Mətbuatdan qorxmuram. Nə qədər yazırlar yazsınlar, heç kimdən, heç nədən çəkinmirəm, mənə heç nə edə bilməzlər. ITV-dən çıxarılanlar geri qaytarılmayacaq”- deyə o, müşavirə iştirakçılarına, fikrincə, həm də mətbuata mesaj yollayıb.
Televiziya rəhbəri və mətbuat qorxmalıdırmı?
Ultimativ tonda səslənən mesaja bizim də cavabımız var: “Hörmətli, Cəmil müəllim, mətbuatdan qorxmaq gərək deyil. Haqlısız, düz deyirsiz. Mətbuatı izləmək, ona inanmaq, yazılanlara şübhə ilə yanaşmamaq gərəkdir. Vəzifə, kreslo itirməkÿsizin kimi birisi üçün qorxulu deyil. Amma sizi bu kürsüyə əyləşdirənlər hər an büdrəyə biləcəyinizdən çox qorxurlar. EUROVISION səsverməsi barədə tələsik və əsassız bəyanatınız unudulmayıb.ÿMüşavirədə şəxsiniz barədə deyilənləri dilə gətirməyiniz sadəliyinizdən xəbər verir. Deyirlər, mülayim, ziyalı insansınız. Amma bu azdır. Rəhbər olaraq sizin vəzifəniz təmiz, doğrucul, ədalətli olmaq, yaxşını-pisi dəyərləndirmək, düzgün seçim etmək, yaradıcı peşəkarları dəyərləndirmək, zamanında doğru qərar qəbul etməkdir. Mətbuatda yer alan tənqidi yazılara diqqətlə, səbrlə yanaşmaq, nəticə çıxarmaq, səhvləri aradan qaldırmaq, tərəzinin əyilən gözünü tarazlamaqdır. Bir zamanlar ”xaç atanız” – Arif Alışanovun etdiyi kimi “mənbə” axtarmaq deyil. Media işçisisiniz, bilirsiniz ki, mətbuat informasiyanı havadan, sudan almır. Od olmayan yerdən tüstü çıxmır. Biz yazırıqsa ki, ITV AzTV-nin filialına çevrilib, bilirik ki, yazırıq. Son üç ayda dövlət televiziyasının 20-dən çox əməkdaşı ITV-yə rəhbər vəzifəyə gətirilib. Onlar Ictimaidə çalışan köhnə işçilərə nəzarət funksiyası yerinə yetirir, televiziyadakı hörmətli, gəlirli işlərə rəhbərliyi ələ keçirməyə çalışırlar. Bunların heç biri yalan və qərəz deyil. Bunların çoxunu müşavirədə özünüz etiraf edibsiz”.
Müşavirə, yoxsa “razborka”?
Əsəbi, bir qədər də gülməli keçən müşavirədə baş direktor televiziyada işin aşağı səviyyədə olduğunu qeyd edib. O, son aylar Ictimainin reytinqinin kəskin şəkildə aşağı düşdüyünü səmimi etiraf edib. Əməkdaşların yaradıcılıq düşüncəsindən, yenilik axtarışlarından, fərqlilik tapıntılarından çox pul qazanmağın yolları barədə “baş sındırdığını” deyib. Dediklərində haqlıdır da. AzTV-də “əli öyrənmişlər”in ovcunun içi gicişir. Qazanclı çəkilişləri ələ keçirmək uğrunda gizli savaş gedir.
Hər kəs bilir ki, kim direktora birinci xəbər çatdırsa, həmkarını “baqaja qoysa” hörməti artacaq, imkanları genişlənəcək. Bunun sınanmış, AzTV-də özünü doğrultmuş yolu ədalətsizlikdən şikayətlənən, səmimiyyətlə fikirlərini bölüşən “dostunun” səsini telefona yazıb direktora təqdim etməkdir. Belədə əlahəzrət fakt danılmaz olur. Gəl özünüÿöldür ki, fikirlərin konteksdən çıxarılıb, ünvanı dəyişdirilib. Bununla intriqalara şərait yaradılır. Intriqalar çoxaldıqca rəhbərlik yaddan çıxır.
Cəmil Quliyev ilk müşavirədə bir çox incə mətləblərə də toxunub. “Yeni gün” departamentində departament rəhbəri Səidə Ibrahimli ilə böyük redaktor Şamama Qəhrəmanova arasında qarşıdurmada o, birincini dəstəklədiyini bəyan edib. Adətən iki tərəfdən hansı rəhbərliyə “danos”u birinci çatdırırsa, qalib də o olur. Direktor hamının qarşısında etiraf edib ki, Səidə xanıma daha çix etibar edir, Şamama xanım onu “şara, filə, manyaka” bənzətdiyinə görə ITV-də çalışa bilməz. Xanım əməkdaşlar arasında konflikt isə Qəhrəmanovanın yazıçı Elçin və Ilyas Əfəndiyevlər barədə veriliş hazırlamasından sonra başlayıb. Səidə xanım rəhbər olduğu halda belə “gərəkli” adamlar haqqında işçisinin veriliş hazırlamasına qısqanclıqla yanaşıb. Baş direktorun yanında Şamama Qəhrəmanovanın “torbasını tikib”. Cəmil Quliyev də baş verənlərə müşavirədə kəskin reaksiya verib. Ismayıl Ömərovun zamanından qalma müşahidə kameraları vasitəsilə hər şeyi izlədiyini də açıqlayıb. “Elşad Abdullayevin ”kamera” siyasətindən həvəslə yararlandığını” dilə gətirib.
Kim güclüdür? Direktora arxalananlar
“Yeni gün” redaksiyasında qarşıdurma ITV üçün xarakterik duruma çevrilib. Məsələn, bu günlərdə Kino-Dublyaj departamentinin rəhbəri, baş direktorun sevimlisi Füzuli Ismayılovla rejissor Vaqif Cabbarov şillə, yumruq davasına çıxıblar. Heç bir əsas gətirmədən rejissoru işdən uzaqlaşdırmaq qərarı verən Ismayılovun yaratdığı gərgin situasiyada hər iki tərəf şahidlərin yanında bir-birini təhqir edib, əl qaldırıb. Vaqif Cabbarov səlahiyyət həddini aşan departament rəhbərindən şikayət etməyə hazırlaşır. Departament rəhbərinin işçisilə yumruq davasına çıxması direktora güvəndiyini göstərir. Efirdən insanlara mədəniyyət, əxlaq dərsi keçənlərin özünün belə dərsə ehtiyacı var. Cəmil Quliyev baş direktor olandan sonra birinci işinin “televiziyaya mədəniyyət gətirmək” olacağını demişdi. Şillə mədəniyyət göstəricisi sayılırsa, vay tamaşaçıların halına.
Səidə Ibrahimli, Füzuli Ismayılov kimi rəhbərlərin işçilərinə qarşı qanunsuz davranışlarının bir səbəbi də baş direktorun özünün qanunlara əməl etməməsidir. Şirkətdə çalışan ITV-çilərdən boş müqaviləyə qol çəkmək tələb olunur. Buna etiraz edənlər işdən uzaqlaşdırılır.ÿMəqsəd onları qorxu altında saxlamaqdır. Özünü güvəndə bilənlər Cəmil Quliyevin gətirdiyi kadrlar, A.Alışanovun Ismayıl Ömərovun vaxtında bura yerləşdirdiyi “desantlardır”. Amma hamı tezliklə Cəmil Quliyevi məhz onların bada verəcəyini düşünür. Bu sırada birinci yeri direktor müavini Əliabbas Quliyevlə Kadrlar idarəsinin rəisi Mansur Bayramov tutur. Sonra Nazim Mürsəlov, Zaur Məmmədov, Zaur Hüseynzadə, Fuad Əlixanov, Oqtay Bayramov gəlir. Çünki onların heç biri Cəmil Quliyevlə hesablaşmırlar. Cəmil Quliyev isə başqalarından çox Əliabbas Quliyevə etibar edir.
Milyonlarla hesablanan reklam asan qazanc yoludur
Maliyyəçilər arasında təsdiqlənmiş bir fikir var: televiziya sahəsində maliyyə fırıldaqları üzrə ən yaxşı mütəxəssis Arif Alışanovdur. Hələ A.Alışanov AzTV-də maliyyə idarəsinin rəisi olanda (onda sədr Nizami Xudiyev idi) onun təklifi ilə dövlət televiziyasında reklam işi “Miraj-media” adlı özəl qurumaÿtapşırıldı. Bununla reklam gəlirləri bir əldə cəmləşdi, nəzarətdə saxlanıldı. “Miraj-media”ya eks-deputat Gülər Əhmədovanın həyat yoldaşı Fikrət Əhmədov başçılıq etsə də, qazancın gizlədilməsinə və bölüşdürülməsinə nəzarət o zamankı maliyyə direktorunda idi. Indən belə ITV-də reklam da bir mərkəzdən idarə olunacaq, bir əldə cəmləşəcək. “Teleport” adlı şirkət ITV-də reklam işlərinə nəzarət edəcək. Deyilənə görə, bu, çirkli pulları yumaq üçün yaradılmış şirkətdir. Ona rəhbərlik Şamil Şərifova tapşırılıb. Sərbəstlik üçün şirkət rəhbəri reklam işində çalışan köhnə əməkdaşlarla vidalaşmaq fikrindədir. “Teleport”un H.Əliyev fonduna bağlı olduğu barədə xəbərlər yayılır, narazıları birinci xanım Mehriban Əliyevanın adıyla qorxudurlar. Əslində AzTV-dəki kimi burda da reklam bazarının gəlirləri şəxsi ciblərə axacaq. Telekanallara reklam sifarişi üzrə ümumi bazara görə Ictimainin reklam gəlirini 4-5 milyon manat civarında hesablamaq olar. Bu vəsait ITV-yə veriləcəkmi? AzTV-dən gələn idarəçilərin təcrübəsini, hərisliyini nəzərə alsaq, adamın buna heç inanmağı gəlmir.
A.Akifoğlu
