Ələt-Astara yolunu inşa edən «Todini»n işinə Rövnəq Abdullayev mane olub
Xəbər verildiyi kimi Dünya Bankının maliyyə dəstəyilə Ələt-Astara yolunu inşa edən Italiyanın “Todini” şirkəti Azərbaycanı tərk etməyə hazırlaşır. Demokratiyaya Yardım Ictimai Birliyinin sədri Emil Məmmədov şirkətin bu addımının səbəbini Turan-a şərh edərkən bildirib ki, “Todini”nin bitumun Azərbaycandakı monopoliyasından təngə gələn rəhbərliyi Rusiyadan bitum gətirmək üçün müqavilə bağlayıb. Bu yuxarılarda qəzəblə qarşılanıb. Bu işlərdən isə xeyli vəsait mənimsəmək mümkün olduğundan “Todini” sıxışdırılaraq çıxarılıb”.
Məlumat üçün deyək ki, bitum problemi çoxdan mövcuddur. Azadlıq hələ bir müddət əvvəl məlumat yaymışdı ki, yolların qısa müddətdə yararsız hala düşməsinin bir səbəbi də bitumun keyfiyyətsizliyi ilə bağlıdır. Azərbaycanda yol çəkilişinə istifadə edilən bitum isə Azərbaycan Dövlət Neft Şirkətindən (ARDNŞ) alınır. Bitumun keyfiyyətsiz olması barədə yol idarələrinin müdirləri dəfələrlə şikayətlənib.
Lakin problem həllini tapmayıb. Əldə etdiyimiz məlumatlara görə, “Todini” şirkətinin Rusiyadan bitum alması da məhz yerli məhsulun keyfiyyətsizliyi ilə bağlıdır. Şirkət imicinə zərbə dəyməsin deyə Azərbaycan tərəfinin istədiyi kimi başdansovdu yol çəkmək niyyətində olmayıb. Bunun üçün də ilk növbədə bitum problemini həlli qərara alınıb. Və şirkətin bu addımı Rövnəq Abdullayevi qəzəbləndirib. Nəticədə “Todini”nin işindən imtina edilməsi gündəmə gəlib.
