«Lokomotiv» klubunun oyunçusu Azərbaycanı biabır etdi
“Lokomotiv” voleybol klubunun şərəfini qorumuş braziliyalı voleybolçu Ju Kosta Braziliya mətbuatına müsahibəsində Azərbaycanı biabır edib. Bu barədə xəbəri virtualaz.org saytı yayıb. Məlumata görə, Ju Kosta Azərbaycanda girov saxlanıldığını deyib: “Azərbaycanda 7 ay oldum. Bu ölkəyə getdiyim ilk gündən problemlərlə üzləşdim. Bu müddət ərzində elə hisslər keçirdim ki, heç vaxt belə halla üzləşməmişdim. Orada kişilər qadınlara qul kimi baxırlar. Azərbaycanda qadınların heç bir dəyəri yoxdur”.
Ju Kostanın əsas problemi ölkəsinə qayıtmaq istəyərkən yaranıb. Məlum olub ki, xanım voleybolçunun pasportunu vermək istəmirlər, belə demək mümkünsə, onu Bakıda girov götürüblər.
Voleybolçu iddia edir ki, Azərbaycanı tərk etməməsi üçün onun pasportunu əlindən alıblar: “Mən klub prezidentinə dedim ki, qulaq asın, cənab, mən daha burada qalmaq istəmirəm. Mənim üçün ilk növbədə ailəm, sonra işimdir”.
Ju Kosta deyib ki, pasportunu çox çətinliklə əldə edərək Braziliyaya qayıda bilib: “Vətənimə qayıtdığıma görə çox xoşbəxtəm”.
Məlumat üçün deyək ki, Azərbaycan Voleybol Federasiyasının prezidenti nəqliyyat naziri Ziya Məmmədovdur. “Lokomotiv” klubu də birbaşa Ziya Məmmədovun himayəsi altında fəaliyyət göstərir(kluba sponsorluğu “Azərbaycan Dəmir Yolları” edir. Bu qurum isə Ziya Məmmədovun tabeliyindədir). Beləliklə, Ju Kostanın sözlərindən belə anlaşılır ki, Ziya Məmmədovun adamları onu girov saxlayıbmış.
