“Bursa” MTK tikinti şirkətinin Mir Cəlal Paşayev küçəsində inşa etdyi binanın gələcək sakinləri çıxılmaz vəziyyətdə qalıb. Təxminən 100-ə yaxın mənzilin suvaq və sairə kimi tamamlanma işlərindən imtina edən şirkət rəhbərliyi bu işləri gələcək sakinlərin üzərinə yıxmaq istəyir. İstifadəyə verilməsi hələ 2010–cu ildə vəd edilən binada görüləsi işlər çox olsa da, şirkət rəsmisi bu işlərin onlara aid olmadığını israrla bildirir. Bu, müqavilə ilə nəzərdə tutulan və dəyəri hər mənzil üçün təxminən 3 min manata yaxın olan işlərdir. Bu günədək narazı sakinlərin qarşısına çıxan, şirkətin Mübariz adlı işçisi “Bursa” MTK-nın Rusiyanın Minvod şəhərində yaşayan Həsən adında bir iş adamına məxsus olduğunu deyir və sakinlərə məsləhət görür ki, havayı yerə özlərini yormasınlar, onsuz da heç nəyə nail ola bilməyəcəklər. Açıq şəkildə şirkətin prezident İlham Əliyevin mühafizə idarəsi tərəfindən himayə olunduğunu bildirən Mübariz, onlara “əlinizdən gələni beş qaba çəkin, əziyyətiniz özünüzə qalacaq” deyir.
Bir neçə sakini çıxmaq şərti ilə, qalanlar öz haqqlarını tələb etməkdə israrlıdır. Şirkət rəsmisi Mübariz isə müştərilərə “yola gəlməyəcəkləri” tədqirdə, ümumiyyətlə ev verməyəcəklərini deyir. Qardaşının da Bəylər Əyyubovun yanında işlədiyini iddia edən Mübariz, bundan vətəndaşlara qarşı təyziq vastəsi kimi istifadə etməyə çalışır.
Bir faktı da nəzərinizə çatdıraq ki, gələcək sakinlərin bütün çabalarına rəğmən şirkətin mərkəzi ofisinin harada yerləşməsi müəyyən olunmayıb.
Xaqani Əliyev
