«Rüstəm İbrahimbəyovun namizədliyini qeydə almamaqla, İlham Əliyev rəqibini özü təyin edəcək»
REAL Hərəkatının sədri və prezidentliyə namizədi, İsmayıllı hadisələrinə görə həbs edilmiş İlqar Məmmədov demokratik qüvvələrin qarşıdakı seçkilərdə vahid namizədlə çıxış etməsi barədə münasibətini açıqlayıb.
Hərəkatın rəsmi Facebbok səhifəsindən yayılan açıqlamada deyilir:
“Söz vermişdik ki, əgər hörmətli Eldar Namazov, Əli Kərimli və Isa Qəmbər vahid namizəd haqqında razılığa gəlsələr, biz mütləq belə birliyə dəstək verəcəyik. Ancaq ”vahid namizəd haqqında razılıq” nə deməkdir? Bu, təkcə Milli Şura tərəfindən hörmətli Rüstəm müəllimin şəxsində vahid namizəd müəyyən edilməsi deyil, həm də Milli Şuranın hər hansı digər üzvünün öz namizədliyini qeydə aldırmaq cəhdindən imtinasıdır. Əks təqdirdə:
1. Seçkilərdə Rüstəm Ibrahimbəyovun namizədliyini qeydə almamaqla, Ilham Əliyev öz rəqibini özü təyin edəcək.
2. Ibrahimbəyovun namizədliyini qeydə aldıra bilməməsi Milli Şuranı məhv edəcək və beləliklə də sözü gedən siyasi nəsil ölkə miqyaslı səsvermələrdə özünün dalbadal onbeşinci siyasi məğlubiyyətini yaşayacaq.
Biz hamımız Ibrahimbəyovun ardınca getməliyik, o da öz növbəsində geridə qalmamalıdır. Əks halda REAL seçkilərə doğru yolunu öz namizədiylə davam edəcək, sonra isə vəziyyətə uyğun olaraq Cümhuriyyətin marağında, yəni həmişəki kimi şahlığa qarşı addımlar atacaq”.
«Rüstəm müəllimin namizədliyi qanunsuz olaraq qeydiyyata alınmayacaqsa, hakimiyyətə rəqib kimi seçkiyə getmək alçalmaq deməkdir»
“Rüstəm müəllimi qeydiyyata alsalar mən sözsüz ki, onu dəstəkləyəcəm”. Bu fikirləri isə politoloq Zərdüşt Əlizadə Modern.az-a açıqlamasında bildirib.
Seçkiqabağı vəziyyəti şərh edən politoloq Milli Şuranın vahid namizəd seçiminin düzgün olduğunu deyərək hakimiyyətin Rüstəm Ibrahimbəyovdan çəkindiyini vurğulayıb. Zərdüşt Əlizadə daha sonra ölkənin iki aparıcı siyasi partiyası olan AXCP ilə Müsavat arasında son yaşanan seçki qalmaqalından söz açıb. Onun sözlərinə görə, Milli Şuranın vahid namizədi qeydiyyata alınmasa, AXCP və Müsavatın yolları ayrılacaq: “Müsavat Partiyası Milli Şuradan əvvəl Isa bəyin namizədliyini elan eləmişdi. Milli Şura yaranandan sonra Müsavat Partiyası sonradan Rüstəm Ibrahimbəyovun namizədliyini dəstəklədiyini açıqladı. Qaldı ki, digər problemlər hökumətin problemləridir. Hökumət real rəqabətdən çəkinir. Ona görə, ikili vətəndaşlıq məsələsini qabardırlar ki, Rüstəm Ibrahimbəyovu qeydiyyatdan keçirməsinlər. Rüstəm müəllim faktiki olaraq Rusiya vətəndaşlığından imtina edib. Sabah-biri gün onun vətəndaşlığı ləğv ediləcək. Isa Qəmbərin namizədliyinə gəlincə, Milli Şuranın layihəsi alınmasa bu ideya iflasa uğrayacaq. O zaman Müsavat öz namizədi ilə seçkiyə gedəcək”.
Zərdüşt Əlizadə hesab edir ki, Milli Şuranın vahid namizədi qeydiyyata alınmasa, müxalifətin seçkiyə getməsi alçaqlıqdır: “Rüstəm müəllimin namizədliyi qanunsuz olaraq qeydiyyata alınmasa, o zaman AXCP istər seçkiləri boykot edər, Müsavat da istəyərsə seçkilərə gedər. Amma belə olan halda hakimiyyətə rəqib kimi seçkiyə getmək alçalmaq deməkdir.
Vahid namizədin qeydiyyata alınmaması ilk növbədə gələcək rəhbərliyin legitimliyini şübhə altına alacaq. Boykota gəlincə, bu siyasi partiyaların mövqeyindən asılıdır. Elə partiyalar var ki, onun seçkini boykot eləməsi heç nəyi dəyişməyəcək. Amma Milli Şurada təmsil olunanlar cəmiyyətdə nüfuzu olan adamlardır”.
«Milli Şura vahid namizədlə seçkidə iştirak edəcək və vahid namizəd Rüstəm İbrahimbəyov olacaq»
Müsavatın başqan müavini Gülağa Aslanlı Ilqar Məmmədovla Zürdüşt Əlizadənin fikirlərinə münasibət bildirib. O, “Azadlıq”a açıqlamasında deyib ki, Ilqar Məmmədov bu fikirləri səsləndirməkdə bir qədər tələsib: “Müsavat Partiyası əmindir ki, Milli Şura vahid namizədlə seçkidə iştirak edəcək və vahid namizəd Rüstəm Ibrahimbəyov olacaq. Biz sadəcə Rüstəm bəyin gəlişini gözləyirik. Müsavatın məqsədi Isa Qəmbəri vahid namizəd etmək deyil. Heç Isa bəyin də belə iddiası yoxdur. Amma biz tanınmış ziyalılardan birinin ehtiyat namizəd kimi saxlanmasını doğru sayırıq. Isa bəyin namizədliyinin saxlanmasına gəlincə, hesab edirik ki, bu Rüstəm Ibrahimbəyovun namizdəliyinin qeydə alınmasına yardımçı olacaq”.
Zərdüş Əlizadənin fikirlərinə gəlincə, Gülağa Aslanlı deyib: “Zərdüşt Əlizadənin fikirlərinə şərh verməyi özümə əziyyət hesab edirəm. Çünki o, artıq bütün xətləri keçib. Bir halda ki Zərdüşt Əlizadə iddia edir ki, Müsavatda ağıllı yoxdur, onun fikirlərinə şərh vermək yersiz olar”.
Azad
