"Qış parkı"na döşənən qranit plitələr sıradan çıxıb
Bu ilin mayın 10-da açılan, Heydər Əliyev Sarayından Füzuli meydanına kimi uzanan “Qış parkı”nın bir hissəsi iyulun 15-də təmirə bağlanıb. Yeni açılan parkın təmirə bağlanmasının səbəbi isə parka döşənən qranit plitələrin sıradan çıxmasıdır. Ancaq bir gün keçməmiş Bakı şəhər Icra Hakimiyyətinin abadlıq idarəsinin əməkdaşları çəkən hissələri lentlə “hasara” alıblar. Və bir günün içində sıradan çıxan plitələri yeniləriylə əvəzləyiblər.
Parkın ot örtüyü də sıradan çıxıb, əkilən ağacların çoxu quruyub. Ağaclar çıxarılmasa da, ot örütüyü yeniləri ilə əvəz edilir. Iş orasındadır ki, parkın bütün ot örtüyü dəyişdirilməlidir.
Bundan başqa, ərazidəki fəvvarələrin yanında tikilən komplekslərdə də təmizləmə işləri gedir.
Fəhlələr isə günün istisində işləməli olurlar. Ilk baxışdan belə görünür ki, onlara işlərini tez icra etmələri barədə əmr veriblər. Ancaq söhbət zamanı bunu dandılar. Bizimlə söhbət edən fəhlələr deyirlər ki, onlara heç bir yerdən göstəriş gəlməyib: “Bizim işimiz budur. Deyilməyib ki, tez bitirin, sadəcə özümüz işin tez qurtarmasında maraqlıyıq”.
Fəhlə bizə belə desə də, iş yoldaşları tez-tez parkda ağacların kölgəsinə gedib istirahət edirdilər.
Qeyd edək ki, yeni salınan bu park kompleksi şəhərin içərisində ən böyük parkdır. Ərazisi 7 hektar olan parkın uzunluğu 1 km, eni isə 150 metrdir. Istirahət parkının 20 min kvadratmetrlik sahəsinə qranit və keramit plitələr döşənib. Burada 5 fəvvarə kompleksi quraşdırılıb. Kompleksdə 7 yeraltı keçid inşa olunub. Keçidlərdə 24 eskalator quraşdırılıb. Dayanacaqda piyadaların parka çıxışı üçün də 32 keçid var.
Xatırladaq ki, Füzuli və Mirzağa Əliyev küçəsində yerləşən evlər sökülüb, burada yaşayan sakinlərə isə bazar qiymətlərindən qat-qat aşağı kompensasiya verilib və bundan sonra “Qış parkı” salınıb.
Ramin DEKO
