“Mənim ortalığa çıxartdığım faktlar dünyanı lərzəyə gətirib”
Fəaliyyəti dayandırılmış Azərbaycan Beynəlxalq Universitetinin keçmiş rektoru, hazırda Fransada mühacirətdə yaşayan Elşad Abdullayevin işi ilə əlaqədar tutulan iş adamı Arzu Kazımov bir neçə gün öncə məhkəmədə şok faktlar açıqladı. Çıxış zamanı Arzu Kazımov bildirdi ki, Elşad Abdullayevin danışdıqları nağıldır.
Onun sözlərinə görə, keçmiş rektor qardaşından narazı olduğunu söhbət zamanı ona deyib: “Elşad deyirdi ki, mənim Mahir adlı qardaşım yoxdur. 20 milyon dollar pulumuzu götürüb aradan çıxıb. Özü də deyirdi, həmin pul onun arvadı və qayınatasındadır. Təsəvvür edin ki, qardaşı itəndən ay yarım sonra Elşad bütün obyektləri öz adına keçirdi. Hətta söhbət o qədər yayılmışdı ki, rəhmətlik Zahid Dünyamalıyev də dedi ki, Elşad özü qardaşının başına oyun açıb, getsin tapsın”.
Arzu Kazımov çıxışında Mahir Abdullayevlə bağlı danışıb: “Bir bazar günü Elşad mənimlə görüşərək Mahir barədə danışdı. Dedi ki, Mahir yaxın kəndlərdən birindədir. Mən Mahiri üzə çıxarsam, təzyiq ola bilərmi? Mən bu söhbəti Zahid Dünyamalıyevə 2 gün sonra dedim. O da dedi, getsin qardaşını gətirsin, bu söhbət bitsin. Mən bunu Elşada deyəndə qayıtdı ki, artıq gecdir”.
Elşad Abdullayev “Azadlıq”a açıqlamasında Arzu Kazımovun məhkəmədə səsləndirdiyi fikirlərə münasibət bildirdi. Onun sözlərinə görə, Arzu Kazımovun dedikləri ilə Müstəqil Istintaq Komissiyasının araşdırması arasında ziddiyyət var: “Onun bu cür ifadələr verməsi Müstəqil Istintaq Komissiyasına hörmətsizlikdir. Bu bir daha göstərir ki, adam oğurluğu ilə bağlı mütəşəkkil dəstə Ilham Əliyevin sərəncamı əsasında yaradılan komissiyaya hörmət eləmir”.
Keçmiş rektor deyir ki, o əvvəllər də Ilham Əliyevi “bandit dəstəsinin əhatə etdiyini” söyləyib: “Məhkəmə hakimiyyəti cinayətkarlarla əlbirdir. Bu, artıq hüququn böhranıdır. Əgər bu gün mənə qarşı belə davranırlarsa, görün adi vətəndaşlarla necə rəftar edirlər. Mən özümdən söz demirəm. Video fakt ortalığa qoyuram. Arzu Kazımovun dedikləri həqiqəti əks etdirmir. Bu qədər əxlaqsızlıq olar? Avtoritar rejimləri əxlaqsızlıq yıxdı. Liviyadakı, Misirdəki, Tunisdəki, Suriyadkı hadisələrin olması, xalqın ayağa qalxması bu cür əxlaqsızlıqların nəticəsidir”.
Elşad Abdullayev Zakir Qaralovu, MIK-i məhkəməyə verəcəyini söylədi: “Bunlar Ilham Əliyevi saymırlar. Onun tapşırıqlarına məhəl qoymurlar. Mənim ortalığa çıxartdığım faktlar dünyanı lərzəyə gətirib.
Bizim işimiz Avropa Birliyinin xarici işlər və təhlükəsizlik siyasəti üzrə ali nümayəndəsi Ketrin Eştonun, ABŞ Dövlət Departamentinin, “Freedom House” təşkilatının hesabatlarında əks olunub. Arzu Kazımov ABŞ-dan çox bilir? Bu yalan olsaydı bütün dünya bundan danışardı? SSRI zamanı belə şey yox idi. Oğurlayırlar, üstəlik də sərbəst gəzirlər. Bir kimsə də onlara söz demir. Arzu Kazımov mənimlə söhbətində gah dedi ki, Mahiri hökmdar qadın oğurlatdırıb, sonra Kəmaləddin Heydərovun, Ramiz Mehdiyevin adını çəkdi. Hər dəfə bir ad deyirdi”.
Elşad Abdullayev Ilham Əliyevi Haaqa Məhkəməsinə verəcəyini də qeyd etdi: “Ya Ilham Əliyevin bu olanlardan xəbəri yoxdur, ya da onlarla əlbirdir. Necə ola bilər ki, 2010-cu ilin oktyabrın 4-də Müstəqil Istintaq Komissiyasının yaranması barədə sərəncam verir, ancaq indiyə kimə heç bir iş görülmür. Iki həftə də keçsin, bir şey olmasa Ilham Əliyevi məhkəməyə verəcəm”.
Ramin DEKO
