Mətbuatı, ekspert rəyini gözləməməkdə ittiham edən qurumun sözçüsü özü niyə tələsir?
“Bizim üçün hər bir əsgərin ölümü itkidir və buna görə məsluliyyət daşıyan da, ittihamlara məruz qalan da bizik. Axı maraq nə ola bilər ki, bıçaqla intihar edən əsgərin güllə ilə öldüyünü deyək?”. Bunu “Qafqazinfo”nun sorğusuna cavab olaraq müdafiə Nazirliyinin mətbuat xidmətinin rəisi Eldar Sabiroğlu bir neçə gün əvvəl intihar edən əsgər Elman Imanovla bağlı mətbuatda yayılan məlumatlara münasibət bildirərkən deyib.
Mətbuatda yayılan məlumatlarda bildirilir ki, əsgər “ştıknojla” vurulub və qətlə yetirilib. Iddiaya münasibət bildirən nazirlik rəsmisi deyir ki, intihar edən əsgər Elman Imanov başqa biri tərəfindən vurulubsa bunu nə üçün gizlətməliyik: “Valideyinlərin dərdini, acısını başa düşürük. Lakin əsgər ölümündən başqa məqsədlər üçün istifadə edənlərin və buna nəyin bahasına olursa-olsun don geyindirənlərin əməlləri başa düşülmür. Əsgərin ölmünü nazirliyin daxili təhqiqat idarəsi, hərbi tibbi ekspertiza, hərbi polis və nəhayət prokurorluq araşdırır. Bu qurumlar niyə yalan danışmalı və məsuliyyətin altına girməlidirlər? Əlində heç bir dəlil-sübutu, ekspertiza rəyi olmadan və araşdırma aparan qurumların mövqeyini öyrənmədən belə məlumatı vermək nə həmin mətbuat orqanına, nə ordumuza, nə də dövlətimizə xeyir gətirmir, əksinə düşmənə əlavə impuls verir”.
Müdafiə Nazirliyinin yaydığı məlumatda bildirilir ki, Tərtər rayonunda yerləşən N saylı hərbi hissənin əsgəri Imanov Elman Yaqub oğlu postda olarkən tabeliyində olan avtomat silahdan açılan atəş nəticəsində həlak olub.
Elman Imanovun ölümü ilə bağlı xəbəri ilk olaraq “Azadlıq” yayıb. Mərhum əsgərin yaxınları qəzetimizə açıqlamalarında iddia ediblər ki, o, baş nahiyəsindən “ştıknojla” vurularaq qətlə yetirilib. Yəni, “Azadlıq” bu xəbəri özündən uydurmayıb və burada hər hansı marağı yoxdur. Ekspert rəyi olmadan belə iddiaların ortaya çıxmasına gəlincə, maraqlıdır ki, bəs Eldar Sabiroğlu belə bir rəy olmadığı halda nəyə əsasən Elman Imanovun intihar etdiyini iddia edir?
