“Bloomberg” Hindistan rəsmilərinə istinadən Dehlinin Rusiyadan silah alışını dayandırdığını yazır.
Buna səbəb silah tədarükündə iki ölkənin ABŞ-ın sanksiyalarından yan keçən ödəniş üsulunu tapa bilməmələri olub.
Hindistan silaha görə 2 milyard dollardan çox vəsaiti bir ildir Rusiyaya ödəyə bilmir. Rusiya da öz növbəsində təxminən 10 milyard dollar dəyərində ehtiyat hissələri, eləcə də iki S-400 raketdən müdafiə sisteminin alınması üçün kredit tədarükünü dayandırıb.
Moskva qeyri-sabitliyi əsas gətirərək Hindistan rupisi ilə ödəniş istəmir, Hindistan da rublla sövdələşmədən qaçır. Digər valyutalarla bağlı danışıqlar da nəticəsin bitib.
İki ölkə arasında ödənişin avro və dirhəmlə aparılması da müzakirə olunub. Amma ABŞ-ın diqqətini çəkə biləcəyi səbəbindən bu da müzakirələrdən çıxarılıb.
Hindistan malları ilə ödəniş ideyasını həyata keçirmək çətindir. Çünki Rusiyanın Hindistana ixracı oradan idxalı əhəmiyyətli dərəcədə üstələyir.
Rusiya istehsalı olan 250-dən çox SU-30 döyüş təyyarəsi, 1200-dən çox T-90 tankı və yeddi sualtı qayığa sahib olan Hindistanın bu silahlara komponentlər və ehtiyat hissələri tədarük edə bilməməsi ciddi problemdir.
Hindistan rəsmiləri Rusiyanın hərbi texnikaya müntəzəm texniki qulluq göstərməyə davam edə biləcəyinə də əmin olmadıqlarını bildirirlər.
Rusiya Hindistanın Pakistan və Çinlə sərhəd mübahisələrində lazım olan ən böyük silah tədarükçüsüdür.
Azadlıq radiosu
