EN| RU 2023 2022 2021 2020 2019 2018 2017 2016 2015 2014 2013 2012 2011 2010 2009 2008 2007 2006 2005 2004 2003 2002 2001 2000 1999 1998 1997 1996 1995 1994 1993 1992 1991 HƏR YERDƏ AXTAR Siyasət İqtisadiyyat Maliyyə Enerqetika Analitika İcmallar (Bazarların icmalı, İqtisadiyyat icmalı, Siyasi monitorinqi) Mövqe (Müsahibə, Deməyə sözüm var, ÇƏTİN SUAL, Tanımalı Azərilər) Cəmiyyət (Cəmiyyət, Mədəniyyət, Dünyada) Multimedia (Foto sessiyalar, Aktual reportaj, Tanimali Azərilər) VƏ YA İFADƏ 
Açiq mənbələrdən foto.
Mediada deputata sui-qəsdlə bağlı saxlanıdlığı bildirilən İlkin Süleymanova qarşı narkotik ittihamı irəli sürülüb
Cəmiyyət
2023 Aprel 06 ( Cümə axşamı ) 10:57:48
Bakı/06.04.23/Turan: Mediada bir neçə gün əvvəl Milli Məclisin deputatı Fazil Mustafaya silahlı hücumda şübhəli şəxs kimi təqdim edilən İlkin Süleymanovu narkotiklərin satışında ittiham edirlər. Bu barədə Turan-a İlkin Süleymanovun əmisi Elnur Süleymanov məlumat verib.
Süleymanov qeyd edib ki, qardaşı oğlu aprelin 2-də saxlanılıb.
“Saytlar paylaşıblar ki, Fazil Mustafaya sui-qəsddə 6 nəfər ittiham olunur, köməkçilərdən biri də İlkindir. Ancaq biz bunu qəbul etmirik və bu, qeyri-mümkündür. Deyirlər ki, hadisə martın 28-də saat 21 radələrində olub, amma İlkinin Xocasən qəsəbəsində 20.15-də müşahidə kamerasında görüntüləri var, çörək alıb evə gedir. Bu mümkündür ki, fiziki olaraq o, özünü saat 21 üçün Zabrata çatdırsın?”.
O qeyd edib ki, İlkin Süleymanovun harada olduğu barədə 3 gün məlumat ala bilmirdilər.
“Yalnız dünən axşam bizə zəng gəldi, həmin şəxsə İlkin nömrə verib ki, bizə zəng vursun desin ki, narahat olmayaq, Nərimanov Rayon Polis İdarəsinin müvəqqəti saxlanma yerində saxlanılır, amma işinə Binəqədi Rayon Polis İdarəsində baxılır”.
Süleymanovun sözlərinə görə, bir müddət əvvəl dövlət tərəfindən İlkin Süleymanova təyin olunan vəkil onlarla əlaqə saxlayaraq onun Cinayət Məcəlləsinin 234.4.1 (Qabaqcadan əlbir olan bir qrup şəxs tərəfindən və ya mütəşəkkil dəstə tərəfindən satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma) və 234.4.3 (Satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri külli miqdarda satma) maddələri ilə ittiham olunur.
“Biz bu ittihamların heç biri ilə razılaşmırıq və qəbul etmirik. Əgər bu adamın günahı varsa, qanun qarşısında biz kimik ki, nəsə deyək? Ancaq onun qətiyyən narkotikə aidiyyəti yoxdur. Aparsınlar, yoxlasınlar, qanında narkotik var? Qətiyyən mümkün deyil. İlkin sadəcə dindar olduğuna görə belə məsələlərdə ittiham olunur”.
Vəkil Zibeydə Sadıqova bildirib ki, 2 gün bütün aidiyyəti qurumlara müraciət etsə də, müvəkkili İlkin Süleymanovu tapa bilmirdi.
“Yalnız dünən gecə Süleymanov İlkin Elçin oğlunun yerini müəyyən etdik. Nərimanov RPİ MSY-də saxlanılır. Cinayət işini Binəqədi RPİ başlayıb. Sadəcə Binəqədi RPİ-nin MSY-də təmir işləri getdiyi üçün təqsirləndirilən şəxsləri başqa MSY-də saxlayırlar. Davamlı olaraq 102 Xidməti və Ombudsman Aparatının qaynar xətti olan 916 xidməti ilə danışıb, yerini müəyyən etmək üçün kömək etmələrini istəsəm də, heç bir qurum bu işdə köməklik etmədi”.
Vəkil qeyd edib ki, aprelin 3-də səhər saatlarında Nərimanov Rayon Polis İdarəsinə müraciət edib.
“Dedilər ki, bizdə yoxdur. Binəqədi rayon polis bölmələrindən də mənə İlkin Süleymanovun onlara daxil olmadığını dedilər. Ombudsman Aparatına təkrar müraciət etmişəm, dedilər axtarırıq, sonra da mənə zəng vurub “tapmısız?” deyib sual veriblər. Axır ki, gecə məlum olub ki, İlkin Süleymanov Nərimanov Rayon Polis İdarəsindədir”.
Sadıqovanın sözlərinə görə, bu gün də bütün cəhdlərə baxmayaraq, öz müvəkkili ilə görüşə bilməyib.
Daxili İşlər Nazirliyinin Mətbuat Xidmətinin KİV və İctimaiyyətlə əlaqələr şöbəsinin rəisi Elşad Hacıyev Turan-a bildirilib ki, İlkin Süleymanovla bağlı cinayət işi var.
“İstintaq hərəkətləri aparıldığı üçün əlavə məlumat vermək səlahiyyətimiz yoxdur”, deyə o qeyd edib.
Contact.az
