ali kerimli3

Əli Kərimliyə sui-qəsd məsələsində yeni məqamlar

ali kerimli3Planı icra etmək üçün adamı həbsxanadan çıxarıblar?

Bəhlul Muradov həbsdə ola-ola necə mətbuat konfransı keçirib?

Xəbər verildiyi kimi, dekabrın 13-də “İnsan Haqları Uğrunda” İctimai Birliyinin sədri Eynulla Fətullayev AXCP sədri Əli Kərimliyə qarşı sui-qəsd planı ilə bağlı bir neçə gün öncə müraciəti yayılmış, sonra da “karsa” salınmaqla təkzib məktubu alınmış Bəhlul Muradovla görüşüb. B.Muradov hazırda 7 saylı cəzaçəkmə müəssisəsində (CM) saxlanılır. E.Fətullayev həmçinin həmin müraciətdə adı keçən, “Millətim” qəzetinin təsisçisi və baş məsləhətçisi, hazırda 12 saylı CM-də saxlanan Ramiz Tağıyevlə də görüşüb (R.Tağıyev əvvəl 7 saylı CM-də saxlanılıb, B.Muradovun müraciəti yayılandan sonra isə 12 saylı CM-ə göndərilib).
Xatırladaq ki, B.Muradov “Millətim” qəzetinə göndərdiyi və ölkə mediasında tirajlanan müraciətində MTN-in 2006-cı ildə AXCP sədri Əli Kərimliyə sui-qəsd hazırladığı və özünün bu əməliyyata cəlb olunduğunu təfərrüatı ilə açıqlamışdı.

E.Fətullayevin apardığı araşdırma zamanı isə bəlli olub ki, B.Muradov 2000, 2002, 2004 və 2009-cu illərdə müxtəlif cinayətlərə görə məhkum edilib və nəql etdiyi hadisə zamanı da həbsdə olub. E.Fətullayevə verilən rəsmi məlumatlara görə, B.Muradov 2006-cı il noyabrın 12-nə qədər 9 saylı CM-də cəza çəkib və 12 noyabr 2006-cı ildə şərti olaraq vaxtından əvvəl cəzadan azad edilib.

Hüquq müdafiəçisinə yalan məlumat veriblər

Lakin “Azadlıq”ın araşdırmaları zamanı Bəhlul Muradovun həmin vaxt azadlıqda olduğu üzə çıxıb. 2006-cı ilin noyabrın 12-nə qədər 9 saylı CM-də cəza çəkdiyi iddia edilən B.Muradov 2006-cı ilin avqustun 2-də Azadlıq Hərəkatçıları Birliyinin Gənc Hərəkatçılar Təşkilatının sədri kimi Beynəlxalq Mətbuat Mərkəzində mətbuat konfransı keçirib. “İndiki ipoteka krediti gənclərin problemini həll etmək iqtidarında deyil” mövzusunda keçirilən həmin mətbuat konfransı bir sıra media quruluşlarında, o cümlədən “azerphoto.com” saytında işıqlandırılıb. Tədbirdən fotolar da verilib. Bu onun həmin dövrdə azadlıqdakı ictimai-siyasi fəaliyyəti ilə bağlı ötəri araşdırmanın üzə çıxardığı bir faktdır və yəqin ki, yeganə olanı deyil

Bundan başqa, Azadlıq Hərəkatçıları Birliyinin sədri Təhmasib Novruzov “telegraf.com”a bildirib ki, Bəhlul Muradov təşkilata 2006-cı ilin iyununda gəlib: “2005-ci ildə Azadlıq Hərəkatçıları Birliyi yox idi. Birlik 2006-cı ilin yanvarında təsis olunub, apreldə qeydiyyata alınandan sonra fəaliyyətə başlayıb. Bəhlul Muradov isə 2005-ci ildə həbsxanada idi. 2006-cı ilin iyun ayında onu İdarə Heyətinin üzvlərindən biri yanıma gətirib və onun məsləhəti ilə gənclər təşkilatına sədr seçmişik”.
Bütün bunlar göstərir ki, Eynulla Fətullayevə verilən məlumatlar həqiqətə uyğun deyil.

«Bu biabırçılıqla bağlı tədbir görmək üçün Baş Prokurorluğun əlində konkret fakt var»

“Azadlıq”a açıqlamasında E.Fətullayev məsələ ilə bağlı yenidən araşdırma apardığını deyib: “Penitensiar Xidmətin məsul əməkdaşları ilə birgə məsələni araşdırdım. Məlum oldu ki, Bəhlul Muradov 2006-cı il fevralın 18-də məhkəmənin qərarı ilə 11 saylı cəzaçəkmə müəssisəsindən 1 saylı məntəqə tipli cəzaçəkmə müəssisəsinə köçürülüb. Yəni saxlanma rejimi vaxtından əvvəl yüngülləşdirilib. ”Azadlıq”ın üzə çıxardığı yeni detallardan belə çıxır ki, bu adam həmin müəssisədən qanunsuz olaraq buraxılıb. Bu məqam mütləq araşdırılmalıdır. Ortada konkret fakt var, bu fakta əsasən 1 saylı məntəqə tipli cəzaçəkmə müəssisəsin rəisi cinayət məsuliyyətinə cəlb edilməlidir. Çünki bu şəxs ciddi cinayətə yol verib. Çünki qanunvericiliyə və daxili rejim qaydalarına əsasən bu müəssisədə cəza çəkən məhkum azadlığa müstəsna hallarda, o da rəisin icazəsi ilə buraxıla bilər. Amma bu müəssisədə cəza çəkən məhkumun aktiv siyasətə, ictimai proseslərə qoşulması, mətbuat konfransları keçirməsi birbaşa qanun pozuntusudur. Əvvəlcə o araşdırılmalıdır ki, bu məhkumun buraxılması haqda kim göstəriş verib”. E.Fətullayev artıq məsələ ilə bağlı yeni situasiyanın yarandığını və şübhələrin artdığını deyir: “Bu biabırçılıqdır. Artıq Baş Prokurorluğun əlində konkret fakt var. Bu fakta əsasən həmin şəxsi qanunsuz olaraq müəssisədən buraxan rəisi birbaşa cinayət məsuliyyətinə cəlb etməlidir”.
Hüquq müdafiəçisi AXCP sədrinə sui-qəsd planı ilə bağlı həqiqətləri üzə çıxarana qədər araşdırmalarını davam etdirəcəyini bildirib.

İnformasiya şöbəsi