İP Avropa Məhkəməsinə şikayət edəcək

Bakı Apellyasiya Məhkəməsində Ictimai Palatanın Bakı Şəhər Icra Hakimiyyətinə qarşı iddiası üzrə apelyasiya şikayətinə baxılıb.
Ictimai Palatanın üzvü Mustafa Hacıbəylinin APA-ya verdiyi məlumata görə, hakim Habil Xəlilovun sədrliyi ilə keçirilən prosesdə IP adından iddia qaldıran qurum üzvləri, Müsavat Partiyası başqanının müşavirləri Hüseyn Məlikov, Mustafa Hacıbəyli və AXCP təşkilat şöbəsinin müdiri Rafiq Daşdəmirovun 1 saylı Bakı Inzibati-Iqtisad Məhkəməsinin qərarından verdikləri apelyasiya şikayəti təmin olunmayıb və birinci məhkəmə instansiyasının qərarı qüvvədə saxlanılıb. M.Hacıbəyli bildirib ki, Bakı Apelyasiya Məhkəməsinin qərarından Ali Məhkəməyə və Insan Hüquqları üzrə Avropa Məhkəməsinə şikayət ediləcək.
Qeyd edək ki, Ictimai Palatanın 2011-ci il aprelin 22-də piket keçirmək üçün meriyaya etdiyi müraciət mənfi cavablandırılıb. Verilən cavab məktubunun əsassız olduğunu hesab edən IP isə məhkəməyə müraciət edib.