“Onun əlində yüksək vəzifəli şəxslər barəsində etibarlı sübutlar var”
“Zakir Qaralovun baş prokuror təyin edilməsi ilə prokurorluq orqanının başına böyük bir fəlakət gətirildi”
Müzəffər Baxışov: «Əli Kərimliyə qarşı qanunsuz hərəkətlərə yol verənlərin hamısı bir gün öz cəzasını alacaqlar»
Naxçıvan MTN-də baş verən olay hələ də mətbuatın gündəmində olan məsələlərdəndir. Turac Zeynalovun ailəsinə qarşı aparılan çirkin kampaniyanın fonunda MTN-dən gələn cavab heç də baş verənlərə adekvat reaksiya sayıla bilməz. Tanınmış vəkil Müzəffər Baxışovla söhbətə bu məqamla başladıq. M.Baxışovun fikrincə, T.Zeynalovla bağlı mətbuatda gedən məqamlar ciddi araşdırılmalıdır:
– Mən əvvəllər hüquq-mühafizə orqanlarından çalışmış bir şəxs kimi Turac Zeynalovla bağlı mətbuatda gedən məqamlara inanıram. Baş verənlərlə bağlı Naxçıvan MTN-i bir bəyanat yaydı. Bu bəyanata çox təəccübləndim. Bəyanatdakı araşdırmalar bir daha təsdiqləyir ki, Ibrahim Musayev MTN-lə əməkdaşlıq edib. Istər polis, istərsə də prezidentin MTN haqqında təsdiqlədiyi əsasnaməyə əsasən, həmin orqanlar Azərbaycan vətəndaşları və əcnəbilərlə əməkdaşlıq edə bilərlər. Yəni qanun buna imkan verir. Çünki hüquq-mühafizə orqanları törədilən və ya törədiləcək cinayətlərin açılmasını təmin etmək üçün hökmən bu imkanlardan istifadə etməlidirlər. Amma bu orqanlar səlahiyyətlərindən qanuni fəaliyyətlərini həyata keçirmək, vətəndaşların hüquqlarını qorumaq üçün istifadə etməlidirlər. Təəssüf ki, bu məsələlərin meydana çıxması bir daha təsdiqləyir ki, bu orqanlar bu imkanlardan dövlətin təhlükəsizliyini, ictimai asayişi qorumaq məqsədilə deyil, özlərinin törətdikləri qanunsuz hərəkətlərini ört-basdır etmək üçün yararlanıblar. Əslində bu bəyanat televiziyada ictimai müzakirəyə çıxarılsa, həmin sənədin hər bir sözü üzrə bu orqanı ifşa etmək mümkündür. Çox basit şəkildə hazırlanmış sənəddir. Bu bir daha göstərir ki, həqiqətən də Azərbaycanda dövlət idarəetməsi ilə bağlı ciddi problemlər mövcuddur. Bu problemlər hər dəqiqə vətəndaşlarımızın hüquq və azadlıqlarının pozulmasına gətirib çıxarır. Təhlükəli tendensiya bundan ibarətdir ki, Azərbaycan cəmiyyəti bütün bu özbaşnalığın qarşısını almaq üçün nə etməlidir.
Günahkarlar cəzasın alacaq
– Gündəmdə olan daha bir olay AXCP sədri Əli Kərimliyə qarşı MTN-in hazırladığı sui-qəsd planıdır. Bu məlumat bir daha hakimiyyətin siyasi rəqiblərinə qarşı hansı üsullarla mübarizə apardığını göstərdi. Mətbuatda dərc olunan faktlar hüquq-mühafizə orqanlarının araşdırma predmeti olmalıdırmı?
– Hər bir törədilmiş və ya hazırlanan cinayətlər barəsində hüquq-mühafizə orqanlarına məlumatlar daxil olursa, əlbəttə, o araşdırma predmeti olmalıdır. Düzdür, bu məlumat Bəhlul Muradovun müraciəti əsasında KIV-də dərc olunub. Cinayət Prosesual Məcəlləsinin 206-cı maddəsinin müddəalarına görə, KIV-də dərc olunan məlumatları həmin KIV hüquq-mühafizə orqanına təqdim etsə, bu məsələlər araşdırılmalıdır. Qanunda belə bir hal nəzərdə tutulub. Düşünürəm ki, Əli Kərimlinin həyatına sui-qəsdlə bağlı məlumatlar prokurorluğa təqdim olunmalıdır. Azərbaycanda ən böyük siyasi partiyalardan biri olan, cəmiyyətdə böyük nüfuzu olan, siyasi fəaliyyəti, əqidəsi, təmkinliliyi ilə seçilən və toplumun böyük ümidlər bəslədiyi Əli Kərimliyə qarşı istər açıq, istər gizli şəkildə hakimiyyət təqiblər həyata keçirir. Dəfələrlə Əli Kərimlinin evinin qarşısında Azərbaycan əxlaqının qəbul etmədiyi şüarlar səsləndirilərək, aksiyalar təşkil olunub. Və ya polis orqanlarının əməkdaşları gecə saat 2-də onun evinə göndərilib. Bu, Konstitusiyanın və Azərbaycanın tərəfdaş çıxdığı beynəlxalq hüquq normalarının kobud şəkildə pozulması deməkdir. Eyni zamanda Əli Kərimlinin qaynı Elnur Seyidovun həbsi AXCP sədrinə təzyiqdir. Yəni Əli Kərimliyə qarşı çoxlu sayda insan ağlına sığmayan belə qanunsuzluqlara yol verilir. Baş verənlərlə bağlı bir şeydə təksinlik tapmaq olar ki, Əli Kərimliyə qarşı bu cür hərəkətlərə yol verənlərin hamısı bir gün öz cəzasını alacaq. Çünki bu əməllərin hamısı qanunsuzdur. Nə Allah, nə də ki, Azərbaycanın düşünən insanları həmin şəxslərin qanunsuz hərəkətlərinin cəzasız qalmasına imkan verəcək. Bu, Azərbaycanın indiki reallığıdır. Hansı vəzifədə çalışmasından asılı olmayaraq bu qanunsuz hərəkətləri edən insanlar nifrətə layiqdir.
– Nigar Yaqublu ilə bağlı baş verənlər də maraqlıdır. Çünki demək olar ki, hər gün oxşar olay baş versə də, yalnız Nigar Yaqublu həbs edilib. Nigar Yaqublunun azadlığa buraxılması üçün millət vəkillərinin, tanınmış ictimaiyyət xadimlərinin müraciətləri nəzərə alınmır?
– Tamamilə doğrudur. Cinayət Prosesual Məcəlləsinin 263.2 maddəsilə nəzərdə tutulan cinayət əməlinin törədilməsinə, yol hərəkəti və nəqliyyatdan istifadə qaydalarının pozulması nəticəsində bir şəxsin vəfat etməsiylə nəticələnən yol nəqliyyat hadisəsinə görə istintaq dövründə vətəndaş barəsində həbs-qətimkan tədbiri seçilmir. Il ərzində təqribən bu qəbildən olan cinayətlər nəticəsində 800, bəlkə də bir qədər də çox insan vəfat edir. Nigar Yaqublu gənc, ali təhsili, ictimaiyyətdə tanınan gənc bir xanımdır. Birdən-birə heç bir hüquqi əsas olmadan barəsində həbs-qətimkan tədbiri seçilir. Çünki bunun üçün hüquqi əsaslar mövcud olmalıdır. Bu hüquqi əsasların nədən ibarət olduğu Cinayət Prosesual Məcəlləsinin 155-ci maddəsində təsbit edilib. Həmin maddədə Nigar Yaqublu barəsində həbs-qətimkan tədbirinin seçilməsi üçün heç bir əsas yoxdur. Amma baş verən göstərir ki, Nigar Yaqublu barəsində yüksək səviyyədə siyasi göstəriş verilib. Mən bu barədə hakimiyyətdə təmsil olunan istənilən şəxslə polemikaya girməyə hazıram. Belə halları pisləyirəm. Qanunlar hər bir şəxsə eyni cür tətbiq edilməlidir.
Gülər Əhmədova ilə bağlı prokurorluq sadəcə sifariş icra edir
– Gülər Əhmədova Elşad Abdullayevin məlum videolarından sonra özünə qarşı başladılan kampaniyanı “ağzımı açdırmayın” mesajı ilə dayandırdı. Ümumiyyətlə, işlə bağlı ötən müddət ərzində aparılan istintaq tədbirlərini necə qiymətləndirirsiniz?
– Açıq aydın görünür ki, Gülər Əhmədovaya münasibətdə bir siyasi göstəriş mövcuddur. Çünki Gülər Əhmədovadan daha az təhlükəli insanlar barəsində həbs-qətimkan tədbiri seçilib. Amma Gülər Əhmədova epizodunun daha çox ictimai maraq kəsb etməsinə baxmayaraq, o saxlanılmır. Bu isə yüksək göstərişin olmasından xəbər verir. Azərbaycan reallığını olduğu kimi təsvir etmək lazımdır. Tam məsuliyyətim ilə bildirirəm ki, 2000-ci ilin aprelin 26-da Zakir Qaralovun baş prokuror təyin edilməsi ilə prokurorluq orqanının başına böyük bir fəlakət gətirildi. Prokurorluq adi orqan deyil. Prokurorluğun böyük səlahiyyətləri var. Prokurorluq qanunların düzgün və dəqiq icrasına nəzarət etməli müstəqil bir orqan olmalıdır. Vaxtilə kimsə desəydi ki, Zakir Qaralov baş prokuror olacaq, həmin adam özünü asardı. Bu çox böyük təhlükədir. Ona görə prokurorluq bu və ya başqa cinayətin araşdırılması ilə deyil, ona verilən sifarişin icrası ilə məşğuldur. Guya müstəqil istintaq qrupu yaradılıb. Əslində bu addımın özü çox biabırçı bir şeydir. Fikrimcə, Gülər Əhmədovanı məsuliyyətə cəlb edə bilməyəcəklər. Çünki belə görünür ki, Gülər Əhmədova da işlərini çox etibarlı tutub. Gülər Əhmədovanın əlində yüksək vəzifəli şəxslər barəsində etibarlı sübutlar var. Hakimiyyətdəki mövcud vəziyyət dəyişməsə, Gülər Əhmədovanın işini hətta məhkəməyə göndərsələr belə, o, şərti cəza alacaq və həbsxana üzü görməyəcək. Amma klanlararası müharibə bir nəticə versə və Gülər Əhmədovanın əməkdaşlıq etdiyi klan məğlubiyyətə uğrasa, onun həbsi reallaşa bilər.
Gülər Əhmədova saxta rəylə cəmiyyəti aldatmaq istəyir
– Belə bir məlumat yayıldı ki, Gülər Əhmədova barəsindəki videoların montaj olduğunu sübut etmək üçün saxta ekspert rəyi almağa cəhd edib. Amma Rusiyadan belə bir rəy almaq alınmayıb. Sizcə, sonda bu işi videogörüntülərin saxta olmasını “sübuta” yetirməklə yekunlaşdıra bilərlərmi?
– Ictimai ittiham qaydasında olan işlər üzrə müdafiə tərəfinin belə bir hüququ yoxdur ki, xarici ölkədə ekspertiza rəyi təyin etsin və onu istintaqa təqdim etsin. Belə bir hüquq qüvvədə olan Cinayət Prosesual Məcəlləyə görə, yalnız Baş Prokurorluğunun yanında yaradılan müstəqil komitəyə məxsusdur. Amma görünür, Gülər Əhmədova ictimaiyyətdə fərqli təsəvvür yaratmaq üçün belə bir cəhdlər edib. Amma hamı bu videoların həqiqət olduğunu bilir. Məndə olan məlumata görə, videolarla bağlı ekspertiza rəyi onların saxta olmadığını ortaya çıxarıb. Düşünmürəm ki, hər hansı ağlı başında olan ekspert belə bir rəy versin. Hətta bu cür rəy alınsa belə, onun heç bir əhəmiyyəti olmayacaq.
– Elşad Abdullayev bildirib ki, hüquqlarının müdafiəsinə ölkə daxilində nail olmasa, Avropa Məhkəməsinə müraciət edəcək. Bu addım ölkənin imicinə necə təsir edəcək?
– Elşad Abdullayevin dediklərində bir həqiqət var. Azərbaycan məhkəmələrinə müraciət etmək imkanları tükənsə, hər bir halda Elşad Abdullayevin Avropa Məhkəməsinə müraciət etmək hüququ var. Hər hansı əməllərindən asılı olmayaraq Azərbaycan vətəndaşı Elşad Abdullayevə qarşı cinayət törədilib. Bunu Konstitusiya, Cinayət Prosesual Məcəlləsinin müddəalarına görə araşdırmaq lazımdır. Dövlətçilik prinsipinə görə hər hansı şəxsə qarşı cinayət törədildikdə dövlət üzərinə vəzifə götürüb ki, mən bu cinayəti araşdırıb, günahkarların cəzalandırılmasını təmin edəcəm. Elşad Abdullayevə qarşı cinayətlər göz önündədir və dövlət öz vəzifəsini həyata keçirərək, günahkarları cəzalandırmalıdır.
– Parlament icazəsiz aksiyalarda iştirak və məcburi şəkildə partiyalara üzv qəbul olunan şəxsin şikayəti nəticəsində müvafiq təşkilatın cəzalandırılmasını özündə ehtiva edən sərt, mürtəce dəyişiklikləri qəbul etdi. Bu dəyişikliklər hüquqi baxımdan Konstitusiyaya nə dərəcədə uyğundur?
– Sərbəst Toplaşmaq Haqqında Qanunu çox biabırçı vəziyyətə gətiriblər. Faktiki olaraq heç kim, heç nəyə etirazını bildirə bilmir. Normal cəmiyyətlərdə axı belə olmur. Ona görə Milli Məclisin qəbul etdiyi son qərarlar Konstitusiyaya uyğun deyil və qanunsuz tədbirlərdir. Hamı bilir parlament hansı vəziyyətdədir və orada qanunların qəbuluna kim rəhbərlik edir. Bu tip qadağaların qəbulu Konstitusiyaya ziddir.
Xəyal
