Beynəlxalq universitetin keçmiş (hamı ərəbcə – “sabiq” yazır) rektoru Elşad Abdullayevin daha bir açıqlaması – əliyevçi rejimin başlıca ideoloqu, administrator-filosof-akademik Ramiz Mehdiyevlə bağlı. Bu, ötənlərdəki kimi dolayısıyla deyil, birbaşa R.Mehdiyevlə bağlı açıqlamadır. Görünür, buna görə administrator-filosofun bu açıqlamaya reaksiyası çox sərt oldu. Onun reaksiyasında fakta, dünyaya, yaşama filosofcasına yanaşmanın işartısı belə yoxdur. Bu, özünün leksikonu ilə desək, SIRF xarakterik rejim olayına əliyevçi ADMINISTRATOR… yetkili reaksiyasıdır. Yeri gəlmişkən, R.Mehdiyev deyir: “Guya biz sırf Müsavat Partiyasını dəstəkləyirik…”. Görəsən, bu ikibaşlı sözün arxasıında nələr dayanır?
R.Mehdiyev Elşad Abdullayev QORXUSUNU sovuşdurmaq üçün özü də bilmədən 19 ildən bəri daşıdığı, bu illərdə ona milyardlar qazandıran bir görəvi ayaq altına alıb tapdayır: “Elşad Abdullayev özü-özlüyündə kimdir ki, mən onunla belə bir məsələni müzakirə edim. Özü də bir-iki dəqiqə ərzində, ayaq üstə dura-dura”. “Bir-iki dəqiqə” doğrudur, ancaq bizlərdə olan bir çox informasiyalardan, eləcə də Gülər Əhmədova videosundan göründüyü kimi, bu bir-iki dəqiqə E.Abdullayev kimilərini inandırıb şirnikləndirmək üçün Gülər Əhmədova kimi araçı-əlaltıların böyük bazarlığına yol açmaqdan ötrüdür.
“Elşad Abdullayev öz-özlüyündə kimdir” deməyinə gəlincə, E.Abdullayev 14 il idi ADI bütün Azərbaycanı dolaşan bəlli bir universitetin rektoru idi – ona lisenziya vermirdilər, üstəlik, 2003-cü ildə onun MTN mayoru olan qardaşını oğurlamışdılar. Bu adam göstərilən üç faktın hər birinə görə (rektor, lisenziya, qardaşının oğurlanması) ölkənin baş administratoru ilə görüşə bilərdi. Birinci baş administratorla görüşmək hüququndan yararlanmağa çalışırkən, ikinci qanunları pozaraq özünün görəv borcundan qaçır, ta “hansısa nüfuzlu şəxsin” ortaya çıxmasınadək. Bununla R.Mehdiyev ölkənin baş administratoru olaraq qanunları necə tapdadığını, qanunçuluğa necə tüpürdüyünü açıb ortaya qoyur!
E.Abdullayev danışdıqca bu hakimiyətin üç üzü açılır. Birinci video yayılanda baş prokuror Z.Qaralov da, R.Mehdiyev də demişdi: “E.Abdullayev düz adam idisə, bu faktların üstünü çoxdan açmalı, dövlət orqanlarına müraciət etməli idi”. Sonra yayılan faktlardan bəlli olduğu kimi, E.Abdullayev indi yaydığı kriminal görsənişlərlə bağlı uzun illər DÖVLƏT ORQANLARININ qapılarını yağır eləyib. Son güman yeri olaraq prezidentə, onun xanımına… 230!!! məktub yazıb. Özünün “təmiz adını” qorumağa qalxan xalqsız xalq yazıçısı Elçinin dediyinə baxın: “Məni belə işlərə qatmayın, mənim indi lisenziya alverinə görə tutulan köməkçim üç il qabaq işdən çıxarılıb”. Lisenziya alveri haçaqlar olub? Köməkçi köməkçiliyində olan çağlarda…
R.Mehdiyev E.Abdullayevi görün necə aşağılayır: “Şəxsiyəti və əməlləri isə yüzlərlə saxta diplom vermiş gənclərə və onların valideynlərinə, dələduzluq yolu ilə aldatdığı insanlara bəllidir”. E.Abdullayev 14 il rektor olub, onun universitetində baş verənlər günü bu gün də Bakıdan Gəncəyədək bütün universitetlərdə baş verməkdədir. R.Mehdiyev onları niyə demir? Onlar böyük rüşvət-gəlir qaynaqları olaraq bu gün də Prezident Administrasiyası üçün FUNKSIONALLIQ daşıdıqlarına görə!
Bir MTN əməkdaşı mənə ikinci məktubunu göndərib. Onun məktubunda bildirildiyinə görə, R.Mehdiyev kürəkəninin qardaşı, MTN polkovniki Fikrət Əliyevi ABU-ya prorektor qoyubmuş – ABU-dakı hamıya bəlli böyük gəlir qaynağına ortaq olmaq üçün. Demək, R.Mehdiyev qabaqca özünə E.Abdullayevlə gəlir ortağı statusu qazandırıb. Sonra universitetə təkbaşına yiyələnmək istəyində bulunub. Onun istəyi Paşayevlərin də universitetə yiyələnmək istəyi ilə toqquşduğundan, ABU çağımızın iki siyasi KAMAZı arasında qalmaqla KATASTROFA uğrayıb…
Ramiz Mehdiyev – uçurumun qırağında
•
