Hüquq-mühafizə orqanlarının «ali qurumu» özünü rüsvay etdi
Naxçıvanın milli təhlükəsizlik orqanlarında çalışdığını deyən Ibrahim Musayevin ifşaedici etiraflarından düz 6 gün sonra cavab reaksiyası gəldi. MTN-nin “xeyli araşdırandan” sonra ortaya qoyduğu bu rəsmi münasibəti insanların təfəkküründə “əlahiddə qurum” statusu daşıyan bir təşkilatın səviyyəsini anlamaq baxımından olduqca heyrətamizdir – sözün bütün mənalarında. Əvvəlcə, açıqlamanı bir-bir incələyək.
6 gün, yoxsa 18 gün?
Ibrahim Musayev adlı şəxsin Naxçıvan MTN-nin biabırçı əməliyyatında iştirakı ilə bağlı etirafları 4 dekabrda işıq üzü görüb. Ancaq bundan bir müddət əvvəl, noyabrın 21-də (yeri gəlmişkən, Naxçıvan MTN-nin məlumatında 21 noyabr I.Musayevin ad günü kimi göstərilir) “Azadlıq” qəzetində milli təhlükəsizlik orqanlarının Naxçıvanda Ibrahim Musayev adlı “yoxa çıxmış” bir adamı axtardığı, amma bunu gizli şəkildə etdiyi, həmin şəxsi rəsmən axtarışa vermədiyi; gecələr onun doğmalarının evinə gələrək, sorğu-sual aparıldığı və s. barədə yazı dərc olunmuşdu. Naxçıvan MTN bu məlumatı heç bir şəkildə təkzib etmədi və hər hansı reaksiya göstərmədi.
Ancaq bu faktın özü birbaşa xəbərdarlıq idi: Ibrahim Musayevin “itmə” xəbəri qəzetlərə yol tapırsa, deməli, etirafları da mümkündür. Belə çıxır ki, Naxçıvan MTN-in “sərəncamında” araşdırma aparmaq üçün dekabrın 4-ə qədər 13 gün vaxt olub.
Faktiki olaraq MTN əməkdaşları həmin günlər ərzində heç nə deməməyə qərar verdilər. Görünür, deməyə (və ya hansısa fakt uydurmağa) ehtiyac görməyiblər (qeyri-peşəkarlıq!).
Yalnız dekabrın 4-ü tarixində I.Musayevin ifşaedici yazılarından sonra əl-ayağa düşməyə və “araşdırma” aparmağa başladılar. Altı günlük araşdırmanın nəticəsi isə ilk cümlədəncə “peşəkarların” həyəcanlandığından soraq verdi.
Kimdir maddi qazanc güdən?
Naxçıvan MTN açıqlamasının ilk cümləsində “Azadlıq” qəzeti və ona istinadla bəzi KIV-lərin “böhtan xarakterli” məlumat yayma səbəbi kimi “siyasi divident və maddi qazanc” əldə etmə istəkləri göstərilir.
O məqama heç toxunmayaq ki, Ibrahim Musayev adlı şəxsin “Azadlıq” qəzetinə göndərdiyi müraciətin dərci peşə etikasına uyğundur və bunu “siyasi dividend” adlandırmaqla MTN-nin məsələni siyasiləşdirmə cəhdi növbəti qeyri-peşəkarlıq göstəricisi, uğursuz əməliyyatı ört-basdır etmə istəyindən doğan çaşqınlığın nəticəsidir və “çekist” adına qətiyyən uyğun gəlmir.
Qəzetlərin “maddi qazanc” güdməsini bəyanlamaq isə MTN-in təkcə qeyri-peşəkarlığı və yaxud siftə cümlədəcə böhtana hazırlaşmasının yox, həm də savadsızlığının soraqçısıdır. Hansı maddi qazancdan söhbət gedə bilər? Bütün “əməliyyatlarda” yalnız maddi qazanc düşüncəsi ilə beyni məşğul olduğundan, bəyanat müəllifləri artıq hər yerdə “maddi” gəzməklə, öz-özlərini rüsvay etdiklərinin fərqində deyillərmi?
Ibrahim Musayevin “qovulma” oyunu
I.Musayev 22 yaşı olduğunu göstərsə də, MTN onun 1992-ci ildə anadan olduğunu yazır.
MTN-ə inanaq və Musayevin 20 yaşı olduğunu qəbul edək – yaxşı deyil, 6 gün zəhmət çəkiblər, araşdırma aparıblar və böyük bir fakt ortaya çıxarıblar…
Musayevin Heydər Əliyev adına hərbi liseydən “əxlaqi-mənəvi keyfiyyətlərinin aşağı olması” səbəbindən 2008-ci ildə qovulduğu qeyd olunur, amma “əxlaqi-mənəvi aşağılığın” nədən ibarət olduğu göstərilmir. Ancaq MTN-ə inansaq, “əxlaqi-mənəvi” baxımdan keyfiyyətsiz olan Musayev 2 ildən sonra Naxçıvanın ən mötəbər ali məktəbinə – Naxçıvan Dövlət Universitetinə daxil olub.
“Mənəviyyatsız” I.Musayevin savadlı və qabiliyyətli olduğunu MTN-in avtobioqrafik açıqlamasına əsasən qəbul etməliyik. Ancaq MTN-in fikri başqadır, yazır ki, 2012-ci il iyulun 8-də “davamiyyəti pozması və intizamsızlığı səbəbindən” Musayev universitetdən qovulub.
Əyani oxuyan tələbələr (MTN rəsmən bildirir ki, I.Musayev NDU-nun əyani tələbəsi olub) davamiyyəti iyun-iyul aylarında pozmurlar, tədris müddəti ərzində intizamsızlıq göstərirlər. Iyulda tələbənin qovulmasının iki səbəbi ola bilər: ya “intizamsızlığına görə” imtahanlara buraxılmır, ya da imtahanlardan kəsilir. Hər ikisində imtahan əsas amildir.
I.Musayevin imtahanları verib-verməməsinə qətiyyən toxunmayan MTN iyulun 8-dəki qovulma əmrini “nömrəsinə qədər” qeyd etmək, “intizamsızlıq” amilini göstərməklə bu qovulmanın hüquqi statusuna şübhə yaratdığını (məsələn, əmrin dekabrın 4-9-u arasında “köhnə tarixə” imzalanması kimi) bilmirmi?
Digər tərəfdən, “davamiyyəti pozma” məsələsi çox həssas məqamdır. MTN bu açıqlama ilə I.Musayevə “əməliyyatlarda” iştirakı səbəbindən dərslərə girə bilmədiyi kimi tutarlı arqumentdən bəhrələnmə imkanı tanıdığını da başa düşmək istəmir…
MTN nələri “kəşf” edib?
Altı günlük araşdırmalardan sonra Naxçıvan MTN bədahətən kəşf edib ki, sən demə, bu Ibrahim Musayev adlı 20 yaşı gənc “dələduz, şöhrətpərəst, mənəviyyatsız” adammış. Niyə?
MTN yazır ki, qız qaçırıbmış, qaçırdığı qız 2 aylıq hamilə olduğu üçün onunla evlənməyə məcbur olubmuş…
Azərbaycanda qız qaçırmaq, bir müddətdən sonra toy etmək və toya qədər el adətinə uyğun ər-arvad kimi yaşamaq nə vaxtdan əxlaqsızlıq sayılır? Toya “yaxın qohumların gəlməməsi” – yəni gəncin özbaşına ailə həyatı qurmasına etiraz olaraq doğmaların toydan imtinası Azərbaycan reallığında qayət normal hal deyilmi?
Bu hələ harasıdır? MTN-nin “özünüifşa” açıqlamasının pik nöqtəsi qarşıdadır…
Açıqlamanın fəci nöqtələri
MTN bildirir ki, I.Musayevin toyu “Xəyal” restoranında keçirilib, toyun pulunu verə bilmədiyinə görə babası Səyavuş Həsənovun evinin sənədlərini oğurlayaraq restoranda girov qoyub, 1500 manatlıq borcu restoran sahibinə ödəməkdən yayınıb, MTN-də yüksək vəzifə tutduğunu söyləməklə onu hədələyib.
I.Musayevin – babası S.Həsənova məxsus Qoçüstü məhəlləsi ev 2, mənzil 45-də rəsmi qeydiyyatda olduğunu da MTN bəyan edir. Adam qeydiyyatda olduğu evin sənədlərini girov qoyubsa, bunu “oğurlayaraq” niyə etməlidir? Bu “oğurluq” hadisəsi ilə bağlı babanın polisə hər hansı şikayəti yoxdursa, MTN niyə bunu oğurluq sayır? Yəni MTN adama şər atdığının anlaşılacağını bilməyəcək səviyyədə bir qurumdurmu?
“Dələduz” Musayev restoranın pulunu ödəmək istəmirdisə və restoran sahibinə “hədə-qorxu” gəlmək niyyəti ilə borcdan yayınmaq istəyirdisə, daha evinin sənədlərini niyə restoranda girov qoyurdu? Girov qoyan adamın borc sahibinə “hədə-qorxu” gəldiyini demək hansı məntiqə sığır?
Daha sonra: I.Musayevin “Gənclik” ticarət mərkəzindən 1200 manatlıq gəlinlik paltarını 350 manata kirayəyə götürdüyünü, əvəzində sürücülük vəsiqəsini girov qoyduğunu, ancaq pulu ödəyə bilmədiyini MTN “üzə” çıxarıb.
Azərbaycan hakimiyyətinin yeritdiyi siyasətin parlaq nümunəsidir bu; bu xarabada ailə quranların böyük əksəriyyəti həmin “girovlardan”, “borclardan” keçir və bu hal həmin gənclərin yox, dövlətin, xalqa qarşı bu cür iqtisadi sanksiya həyata keçirənlərin üz qarasıdır!
Görün, MTN hansı vəziyyətə düşür ki, toydan sonra qaytarılan gəlinlik paltarının “yararsız vəziyyətə salındığı” üçün “Gənclik” ticarət mərkəzi sahibinin 1200 manat ziyana düşdüyünü söyləyir. Hansı məntiqlə? Gəlin öz toyunda, gəlinlik paltarında güləşirdi, yoxsa qonaqlarla bir-bir davaya çıxmışdı? Gəlinlərin hansı şəkildə toy mərasiminə gəlib-getdiyini bu xalq bilmirmi? Gəlinlik paltarı niyə bir neçə saatın içində “yararsız hala” düşməlidir?
Girov qoyan dələduzdurmu?
MTN dərin araşdırmalar sayəsində I.Musayevin 380 manatlıq mobil telefon aldığı, ancaq pul əvəzinə şəxsiyyət vəsiqəsini girov qoymasından da bəhs edir və bunu da “dələduzluqla” əlaqələndirir.
Tam səmimi deyirəm, əslində, I.Musayevin ilkin açıqlamaları zamanı mən bu gəncin hansı çirkin əməliyyatlara alət olduğunu oxuyanda onu mənəviyyatsız, yaramaz, vicdansız adam saydım və tövbələrinə görə simasızlığını bağışlayacağımı (bir insan olaraq) ağlımın ucundan belə keçirmədim. Ancaq MTN öz açıqlaması ilə üzə çıxardı ki:
I.Musayev ləyaqətli gənc olub: sevdiyi qızı qaçırıb, toyunu öz gücünə etməyə çalışıb və hardan, nə əşya götürübsə, hara borclu qalıbsa, ya daşınmaz əmlak, ya da şəxsiyyət və ya sürücülük vəsiqəsini girov qoymaqla edib. Onun məqsədi dələduzluq olsaydı, ev və şəxsi sənədlərini girov qoymazdı, əksinə, MTN vəsiqəsindən yararlanmaqla hədə-qorxu gələr, ən azı, gəlinlik paltarını bir günlük pulsuz kirayə götürmək üçün ticarətçini razı sala bilərdi…
MTN araşdırma aparmağı da bacarmır
Kimdənsə meyvə alıb, ona borclu qalması səviyyəsinə enən bir gənci dələduz sayan MTN “araşdırmanın nəticəsi olaraq” insanların telefonlarını da məktuba əlavə edib. Özünə inam yaratmaq üçün “şahidləri” sıraya düzən MTN şəxsi həyata müdaxilə etdiyinin və bunun qanunsuzluq olduğunun fərqində belə deyil.
Əslində, “Azadlıq” radiosu əməkdaşını “Azadlıq” qəzetinin redaktoru kimi göstərməsi Naxçıvan MTN-in “apardığı araşdırmanın” səviyyəsini bilmək üçün kifayət edir. “Redaktor” Y.Həsənovun öldürülən Turac Zeynalovun xanımına zəng edərək, ona “şirnikləndirici” təkliflər verməsini açıqlamasıyla isə MTN “gül vurur”: “maddi qazanc” güddüyü iddia edilən bir qəzetin Naxçıvandakı “redaktoru”nun kiməsə “şirnikləşdirici” vədindən danışmaq MTN-dəki çekistlərin məntiq sarıdan dəhşətli qıtlıq çəkdiklərinin əyani sübutudur.
MTN-in cavablandıracağı suallar
MTN rəsmi açıqlamasında yazır ki, I.Musayev sentyabrın 2-də Heydər Əliyev adına hava alanından Bakı-Moskva reysi ilə ölkəni tərk edib.
Belə çıxır ki, I.Musayev əvvəlcə Naxçıvandan Bakıya gəlib, sonra da burdan çıxıb gedib, elədirmi?
Bəs, şəxsiyyət vəsiqəsi girovluqda olan adam Naxçıvandan Bakıya necə gələ bilib?
Təyyarə iləmi? Axı, şəxsiyyət vəsiqəsi olmadan Naxçıvan-Bakı reysinə minmək adi adam üçün mümkünsüz bir şeydir! Avtobuslamı? Axı, Irandan dolanıb Bakıya gəlmək üçün pasportla yanaşı, şəxsiyyət vəsiqəsinin də olması mütləqdir.
Əslində, MTN bu suallara aydınlıq gətirməlidir:
1) Sənədləri girovluqda olan I.Musayev Bakıya necə, hansı tarixdə gəlib?
2) I.Musayev dələduzdursa, demək, sənədlərini girovluğa verməyib və onun dediyi kimi, şəxsi sənədləri MTN-də olub. Bu sənədləri “girovluğa” dağıdan MTN özü deyil ki?
3) Özünü gah MTN, gah DIN-in “yüksək rütbəli” əməkdaşı kimi göstərən, o vaxt cəmi 19 yaşı olmuş bu gənc necə olub ki, hamını hədələyə-hədələyə gəzib? Bəs, Naxçıvanın MTN-i, DIN-i hara baxırmış, niyə bir tədbir görməyib vaxtında?
4) Hamıya borcu olan bu cavan uşaq öldürülən Turac Zeynalovun həyat yoldaşı üzərində qurulan əməliyyat zamanı bahalı geyim və maşını hardan tapırmış?
5) I.Musayev adlı birinin onun telefonuna zəng etdiyini, onu müxtəlif vədlərlə şirnikləşdirdiyini MTN-ə xəbər verən öldürülmüş Turac Zeynalovun xanımı Gülnar Ağayevanın “rəsmi ərizəsi”nə vaxt daxil olub? Bu ərizə ilə bağlı MTN hansı əməliyyat tədbirləri həyata keçirib? I.Musayevin toyu, nə vaxt və kimdən kirayəyə paltar götürdüyü təfərrüatlarını yazan MTN niyə bu ərizə və onunla bağlı aparılan əməliyyat barədə açıqlama vermir?
6) I.Musayevdə MTN vəsiqəsi nə gəzir? 20 yaşlı bir gəncdə Naxçıvan MTN-nin yetkililəri barədə bu qədər müfəssəl informasiyalar haradandır?
7) Turac Zeynalovun meyidində zorakılıq əlamətləri səbəbindən onun öldürüldüyü şübhəsi ciddiləşir. MTN buna və G.Ağayevanın bir-biri ilə ziddiyyət təşkil edən açıqlamalarına nə vaxt cavab verəcək? Və s.
MTN-ə təşəkkürlər
Əslində, Naxçıvan MTN bu siyasiləşmiş, məntiqsiz və ziddiyyətli açıqlaması ilə öz mahiyyətini I.Musayevdən daha mötəbər şəkildə ifşa etdi. Bir daha əmin olduq ki, milli təhlükəsizliyimizə cavabdeh olanlar milli təhklükəsizlikdən başqa hər işlə məşğul ola bilərlər – bu ağıl sahiblərindən başqa nə gözləmək olar?
Bəlkə kimsə şübhəyə düşə, I.Musayevin əfsanə danışdığını iddia edə, onu qaniçənlərin suç ortağı kimi təsəvvür edə bilərdi.
Naxçıvan MTN-ə təşəkkürlər – bu şübhələrin əsassız olduğunu bircə açıqlama ilə təsdiqlədi…
