Fəridə Məmmədova: «Bizə bir tikə çörəyimizi qazanmağa imkan vermirlər»
Dekabrın 8-də Sədərək keçid məntəqəsində hücuma məruz qaldıqdan sonra orada saxlanılan, sonraki taleyindən xəbər çıxmayan sahibkar Məhəmməd Qurbanovun, eləcə də həmin vaxt 30-dan artıq mülki geyimli şəxslər tərəfindən vəhşicəsinə döyülən və şərlənərək həbs edilən Nadir Məmmədovun yaxınları onların taleyindən narahatdır. Dünən qohumları onlara yemək aparsalar da, Sədərək rayon Polis Şöbəsinin rəisi onları təhqir edərək, şöbədən uzaqlaşdırıb. Polis rəisi bildirib ki, şöbədə Məhəmməd Qurbanov və Nadir Məmmədov adlı adamlar yoxdur.
“Biz şöbədə Nadiri gördük. Siqret çəkirdi. Bizi görən kimi onu yuxarı çıxardılar. Amma buna baxmayaraq, onların şöbədə olmadığını bildirdilər”, – deyə sahibkarın kürəkəni Toğrul Abbasov bildirib.
Onun sözlərinə görə, Məhəmməd Qurbanovun yük maşını Sədərək keçid məntəqəsinin həyətində, “Toyota” markalı avtomobili isə polis şöbəsinin qarşısında olub.
Sahibkarın həyat yoldaşı Fəridə Məmmədova deyir ki, həyat yoldaşı Məhəmməd Qurbanov haqqını tələb etdiyi üçün həmişə təzyiqlərlə üzləşib. 22 ildir ki, bu hakimiyyət onlara əziyyət verir. Hətta bir dəfə Məhəmməd Qurbanov 15 sutka həbs olunub. 2009-cu ilin sentyabrında 28 gün psixi dispanserdə yatırılıb: “Bizə bir tikə çörəyimizi qazanmağa imkan vermirlər. Yoldaşıma sənəd vermirlər, rüşvət alırlar., tutub döyürlər. 8 min manatlıq malı gömrükdə heç bir əsas olmadan saxlayıblar. Həyat yoldaşım həbs olunarkən cibində 4 min manat pul olub”.
F.Məmmədova əlavə edib ki, həyat yoldaşı və kürəkəni heç bir cinayət törətməyib: “Onlar mallarını almağa getmişdilər. 30-40 nəfər onlara hücum edib. Kürəkənlərimin hər ikisini vəhşicəsinə döyüblər. Indidə tutub qoyublar içəri. Harada olduqlarını, niyə həbs olduqlarını deyən yoxdur”.
Nadir Məmmədovun anası Zülfinaz Məmədova da oğlunun bundan əvvəl də zorakılığa məruz qaldığını bildirib: “Bundan əvvəl dırnaqlarını kəlbətinlə çəkmişdilər. Indi də gömrükdə 30-40 nəfər yığışıb döyüblər. Evə qan içində gəldi. Özündə deyildi. Bu azmış kimi, şərləyib aparıblar, iki gündür xəbər yoxdur. Biz də bu ölkənin vətəndaşlarıyıq axı… Girov saxlayıblar. 10 nəfər polis evə soxulanda 2 yaşında uşaq qan-bağır oldu…”
Xatırladaq ki, Naxçıvanda yaşayan kiçik sahibkar Məhəmməd Qurbanov Türkiyədən satmaq üçün gətirdiyi ərzaq mallarının qanunsuz olaraq gömrükdə saxlanılması, ondan artıq rüsum tələb edilməsi barədə Naxçıvanda fəaliyyət göstərən jurnalistlərə şikayət edərək, məsələni araşdırmağı xahiş edib. Dekabrın 8-də jurnalistlər məsələni araşdırmaq və qarşı tərəfin münasibətini öyrənmək üçün Sədərək Gömrük Keçid Məntəqəsinə gedəndə gömrük işçiləri onlara peşə fəaliyyətlərini yerinə yetirməyə icazə verməyiblər. Qısa müddətdə hadisə yerinə toplaşan 40-a yaxın mülki geyimli sahibkara, eləcə də işçiləri və eyni zamanda kürəkənləri olan Nadir Məmmədovla Toğrul Abbasova hücum edərək, onları vəhşicəsinə döyüblər. Həmin vaxt hadisəni çəkməyə çalışan curnalistlərdə hücuma məruz qalıblar. Hücumçular jurnalistlərin olduğu avtomobili əzərək, media nümayəndələrini çıxarıblar. Jurnalistlərin mobil telefonları, video kameraları və diktafonları zorla əllərindən alınıb.
Xilas olmaq üçün sahibkar Məhəmməd Qurbanov avtomobili işə salaraq, hücumçuların əhatəsindən çıxmağa çalışıb. Bu zaman onun avtomobili böyük yük maşınları və avtomobillərlə 4 tərəfdən mühasirəyə alınıb. Jurnalistlər 3 saatdan artıq mühasirədə saxlanılıblar. Yerli hüquq müdafiəçiləri, Azərbaycandakı xarici ölkə səfirliklərinin müdaxiləsindən sonra jurnalistlərə hadisə yerini tərk etməyə imkan verilib.
Elman Abbasov