Azərbaycanda səfərdə olan ABŞ dövlət katibinin demokratiya, əmək və insan haqları üzrə köməkçisinin müavini Tomas Melia dekabrın 10-da Bakıda hüquq müdafiəçiləri ilə görüşüb. Görüşdə hüquq müdafiəçilərindən Əsabəli Mustafayev, Arzu Abdullayeva, Leyla Yunus, Elçin Behbudov, Səidə Qocamanlı iştirak ediblər.
Ə.Mustafayev “Media forum” saytına açıqlamasında deyib ki, görüşdə Azərbaycandakı ictimai-siyasi vəziyyət, insan hüquqlarının durumu müzakirə olunub. Hüquq müdafiəçiləri Azərbaycanda siyasi fəaliyyət üçün şəraitin olmamasını, hakimiyyətin müxalif fəalları təqib etməsini, insanları siyasi mövqeyinə görə həbs etməsini amerikalı diplomatın nəzərinə çatdırıblar: “Tomas Meliaya dedik ki, əsas müxalifət partiyalarının liderlərinin əksəriyyəti həbsdə olub, bəzilərinin üzərində bu gün də cinayət işi var. Əsas müxalifət partiyası olan AXCP-nin Bakıda mərkəzi qərargahı əlindən alınıb, yeni qərargah verilmir, rayonlarda müxalif partiyaların ofisləri əllərindən alınır. Bundan başqa, sərbəst toplaşmaq azadlığının faktiki olaraq qadağan edildiyini, Bakı Şəhər İcra Hakimiyyətinin aksiyalarla bağlı müraciətləri rədd etdiyini, məhkəmələrin bununla bağlı şikayətləri təmin etmədiyini diqqətə çatdırdıq, meriyanın aksiyalarla bağlı son qərarının surətini ona təqdim etdik. Xüsusi diqqətə çatdırdığımız məsələlərdən biri də siyasi məhbuslar problemi oldu”.
Hüquq müdafiəçiləri bildiriblər ki, 2013-cü ildə Azərbaycanda prezident seçkisi keçiriləcək, ona görə də demokratiyanın genişləndirilməsi, insan hüquqlarının müdafiəsi, siyasi məhbusların azadlığa buraxılması, sərbəst toplaşmaq azadlığının, söz və mətbuat azadlığının təmin olunması, seçki islahatlarının aparılması, hakimiyyətin beynəlxalq təşkilatlar qarşısında götürdüyü öhdəlikləri yerinə yetirməsi məsələlərində Azərbaycana dəstək istəyiblər.
