Gülağa Aslanlı: “Piketin keçirilməsində israrlı olduğumuzu bildirdik”
İctimai Palatanın (İP) dekabrın 10-a Milli Məclisin binası qarşısında keçirməyi planlaşdırdığı piketlə bağlı aksiya təşkilatçıları Bakı Şəhər Baş Polis İdarəsinə çağırılıb. İP katibi, piketin Təşkilat Komitəsinin üzvü Gülağa Aslanlı bildirib ki, onunla yanaşı, piket təşkilatçısı kimi Bakı Şəhər İcra Hakimiyyətinə ünvanlanan müraciətə imza atan daha bir nəfər Müsavat üzvü paytaxt polisində olub. Saat 17-də keçirilən görüşdə BŞBPİ-nin rəis müavini Səhləb Bağırovun və Bakı Şəhər Prokurorluğunun nümayəndəsi Fəzil Həsənəliyev də iştirak edib: “Bakı Şəhər İcra Hakimiyyətinin piketə razılıq vermədiyini əsas gətirərək aksiyanın keçirilməsini qanunauyğun olmadığını bildirdilər. Xəbərdarlıq etdilər. Biz Bakı Şəhər İcra Hakimiyyətinin cavabının qanuna tamamən zidd olduğunu və piketin təxirə salınmasına əsas vermədiyini onların diqqətinə çatdırdıq. Yenidən bildirdilər ki, piketə cəhd etmək qanunsuz əməl kimi sayılacaq və onun qarşısı alınacaq. Biz də piketin keçirilməsində israrlı olduğumuzu bildirdik”.
