Vəfa Quluzadə: «Cənubdakı soydaşlarımızın mübarizəyə qaldırılması Tehran rejiminin çökdürülməsinə hesablanıb»
Qərbin Iran problemini məhz Azərbaycanın, daha doğrusu Iranda yaşayan soydaşlarımızın vasitəsilə çözmək niyyətində olduğu bir müddətdir hiss edilir. Bir neçə gün əvvəl ABŞ Konqresinin Avropa və Avrasiya üzrə alt komitəsi “Iranın Cənubi Qafqaza təsiri və ətraf region” mövzusunda dinləmələr təşkil edib.
Görüş zamanı əsas olaraq Azərbaycan-Iran münasibətlərinə də toxunulsa da, konqresmenlər Iranda azərbaycanlı əhalinin hüquqlarının kobud şəkildə pozulduğunu bildiriblər.
Müzakirələr zamanı birmənalı şəkildə vurğulanıb ki, Iran azərbaycanlılarının da başqa xalqlar kimi azad yaşamaq hüququ var.
Maraqlıdır ki, Qərbdən Iranda azərbaycanlıların hüquqlarını müdafiə edən bəyanat birinci dəfə deyil ki, səslənir. Bundan qabaq da oxşar tezisli açıqlamalar Qərb diplomatlarının dilindən söylənilib. Bu açıqlamalar xüsusilə ABŞ-dan daha intensiv şəkildə səslənir. Bəs bu cür yanaşma perspektivdə nə vəd edir?
Politoloq Vəfa Quluzadə hesab edir ki, hazırda müşahidə olunan proses Iran probleminin çözülməsinə edilən cəhdlərdir. Irandakı soydaşlarımızın hüquqları uğrunda mübarizəyə qalxmalarına yardımçı olmanın Tehrana qarşı seçilən mübarizənin bir forması kimi dəyərləndirən V.Quluzadə vurğuladı ki, bu daha münasib bir yoldur: “Bu təşəbbüslər Iranın daxildən parçalanmasına və bu yolla zəiflədilməsinə yönəlib. Əslində Iran probleminin əsgəri yol ilə həlli əvvəlcədən yanlış fikir idi. Irana tətbiq olunan iqtisadi sanksiyalarla yanaşı Cənubdakı soydaşlarımızın mübarizəyə qaldırılması Tehran rejiminin çökdürülməsinə hesablanıb. Iranda həqiqətən də azərbaycanlıların hüquqları pozulur. Ona görə Irana qarşı bu istiqamətdə bir psixoloji tərəf var”.
Cərəyan edən proseslərdə Azərbaycan dövlətinin üzərinə hansı məsuliyyətin düşdüyünə gəlincə, V.Quluzadə bildirdi ki, rəsmi Bakı cənubda proseslər qızışmayana qədər hadisələrə müdaxilə etməməlidir. Çünki Iran təhlükəli qonşudur və bu rejim rasional siyasət yürütmür: “Azərbaycan Iranda proseslər baş qaldıranda onlara müdaxilə edib azərbaycanlıların hüquqlarının müdafiəsini dünyaya təqdim etməlidir. Hələlik isə sərt reaksiya sərgiləməyə dəyməz. Digər tərəfdən, onsuz da Azərbaycan dövlətinin müasir, Avropaya meyilli olması Irandakı soydaşlarımızı cəlb edir. Bu isə oradakı azərbaycanlılara ciddi təsir mexanizmidir”.
Xəyal
