«Dedim ki, bu haqda danışmaq tezdir…»
Avropa Ittifaqının Bakıdakı səfiri Roland Kobianın Azərbaycanda gələn il keçiriləcək prezident seçkisində Ilham Əliyevin şansı ilə bağlı açıqlaması ictimai-siyasi kəsimdə narahatlıqla qarşılanmaqla yanaşı, həm də kəskin reaksiyalara səbəb oldu.
Avropa Ittifaqının özünün də mütəmadi olaraq, ölkədə insan hüquqları və demokratiyanın vəziyyətinə görə Azərbayan hökumətini kəskin tənqid etməsi, hətta bu ilin mayında Avropa Parlamentində qəbul olunmuş qətnamədə insan hüquqlarını pozan məmurlara qarşı sanksiya çağırışlarının fonunda səfirin belə bir açıqlaması cəmiyyətdə məyusluq və çaşqınlıq yaratdı. Avropa Komissiyasının vitse-prezidenti Neelie Kroes və digər parlamentarilərin Azərbaycanda vəziyyətin acınacaqlı olduğuna dair bəyanatının mürəkkəbi qurumamış belə bir fikrin səslənməsinin sözsüz ki, izaha ehtiyacı vardı.
Roland Kobia dünən “Azadlıq” qəzeti və “BBC Azərbaycanca”nın əməkdaşlarıyla görüşdə məsələ ilə bağlı mövqeyini belə ifadə etdi:
– Bir çoxları mənim söylədiklərimi dəqiq bilmədən yanlış şərhlər verirlər…
– Fikrinizin təhrif olunduğunu bildirirsiz, bəs niyə operativ reaksiya verib ötən iki gün ərzində təkzib tələb etmədiniz və ya təkzib xarakterli açıqlama yaymadınız? Çünki xəbər təkzib olunmursa, belə rəy yaranır ki, deməli, doğrudur…
– Haqlısınız. Amma əgər mən bütün günü oturub haqqımda deyilən, yazılanlara reaksiya versəm, vaxtım elə buna gedər.
– Amma nəzərə alaq ki, söhbət hansısa xırda məsələdən yox, Avropa İttifaqına etimadı sarsıdan bir məlumatdan gedir…
– Mən bir görüşdə masa arxasında verilən sualları cavablandırmışam. Mən ümumiyyətlə, hər zaman jurnalistlərə açıq adamam. Orada da sual verdilər və mən onları cavablandırdım. Mənə ünvanlanan ilk sual belə oldu ki, növbəti ildə keçiriləcək prezident seçkilərilə bağlı fikrim nədən ibarətdir? Mən də cavab verdim ki, Avropa Ittifaqı Azərbaycanda siyasi plüralizmin, seçkilər üçün açıq məkanın olmasını, seçkidə mümkün qədər daha çox namizədin iştirak etməsini istəyir. Sonra dedim ki, seçki kampaniyası hələ 7 aydan sonra başlanacaq. Ona görə də bu haqda danışmaq tezdir. Onun ardınca soruşdular ki, prezident Əliyevin şansını necə dəyərləndirirsiz? Mən də dedim ki, prezident Əliyev yaxşı tanınıb. Mən Azərbaycanda keçirilən sorğulara əsaslandım, o sorğularda onun çox yaxşı şansının olduğu öz əksini tapıb. Məsələn, “Azadlıq” radosu, “Regnum” informasiya agentliyi, “Caspian” Sorğu Mərkəzi tərəfindən keçirilən sorğuların nəticələri… Bunların hamısında Ilham Əliyev daha şanslı namizəd kimi göstərilib.
Həm də qeyd elədim ki, bir çox sahələrdə yaxşı iş görülüb. Ona görə də onun yaxşı şansı var.
Biz Avropa Ittifaqı olaraq, dəfələrlə bəyanatlar vermişik ki, Azərbaycanda insan hüquqları və demokratiya sahəsində daha çox iş görülməlidir, vəziyyət daha da yaxşılaşdırıla bilər. Eyni zamanda, vurğulamışıq ki, digər sahələrdə də işlər görülür.
– Digər sahələrdə vəziyyətin yaxşı olduğunu, iş görüldüyünü deməklə nəyi nəzərdə tutursunuz? Hökumət rəsmi təbliğatda əsasən ölkədə yolların çəkilməsi, hündürmərtəbəli binaların tikilməsi tipli məsələləri inkişafın göstəricisi kimi qabardır. Belə çıxmırmı ki, cənab səfirin çıxışı hökumətin rəsmi təbliğatı ilə üst-üstə düşür?
– Avropa Ittifaqı Azərbaycanda insan hüquqları və demokratiyanın vəziyyətilə bağlı çox işlər görüb. Indi siz mənim bir sözümlə o işləri şübhə altına alırsınız?
– Bu bəyanat həm də ona görə sərt reaksiyalara səbəb oldu ki, həmin açıqlamanı Rusiya və ya Çinin yox, Avropa İttifaqının səfiri vermişdi…
– Bu, bəyanat deyildi. Bu, mənim verdiyim açıqlamanın şərhi idi.
– Amma Siz özünüz də etiraf elədiniz ki, Ilham Əliyevin şansının daha çox olduğunu demisiniz…
– Mən demədim ki, onun şansı daha çoxdur. Mən dedim ki, onun yaxşı şansı var.
– Ümumiyyətlə, Avropa Ittifaqının səfirinin belə bir açıqlama verməsi, ad çəkib kiminsə şansını dəyərləndirməsi nə dərəcədə doğrudur?
– Axı sualı verən jurnalist konkret ad çəkərək soruşmuşdu… Mən də ifadə azadlığına hörmətlə yanaşıram. Verilən sualı cavablandırıram.
Aytən Məmmədova
