Təşkilatçılar meriyanın cavabından asılı olmayaraq aksiyanı keçirməkdə israrlıdırlar
Ictimai Palatanın 10 dekabr aksiyası ilə bağlı hazırlıqlar davam edir. AXCP sədrinin müavini Gözəl Bayramlının sözlərinə görə, hələ ki aksiya ilə bağlı müraciətə Bakı Şəhər Icra Hakimiyyətindən cavab gəlməyib: “Aksiyanı 10 dekabr Beynəlxalq Insan Haqları Günü ilə bağlı təyin etmişik. Ünvan kimi də, Milli Məclisin qarşısını göstərmişik. Meriyanın cavabından asılı olmayaraq aksiyanı keçirməkdə israrlıq.
Amma ünvanı dəyişə bilərik. Ola bilsin ki, Fəvvarələr Meydanında keçirdik. Hazırlıq işləri yaxşı gedir, əhval-ruhiyyə də yüksəkdir. Fəallarla, tərəfdarlarımızla işləyirik. Güman edirik ki, bu aksiya da əvvəlkilər kimi uğurlu olacaq”.
Müsavat başqanının müavini Gülağa Aslanlı da təmsil olunduğu partiyada hazırlıqların yüksək səviyyədə getdiyini deyir: “Artıq iki həftədir ki, rayon təşkilatlarında sistemli şəkildə genişləndirilmiş Şura iclasları keçirilir. Ayın 8-də Müsavat Partiyasının qərargahında geniş tədbir keçiriləcək. Aksiyanın texniki tərəfləri isə Mitinq Komitəsi tərəfindən müzakirə olunur”.
