Prezident Administrasiyasındakı təyinatlara verilən şərhlər heç bir məntiqə sığmır
Ölkə başçısı Ilham Əliyevin yeni təyinatları ilə bağlı rəsmilər ziddiyyətli açıqlamalar verir. Xüsusilə Prezident Administrasiyasının (PA) rəhbəri Ramiz Mehdiyevə müavinlər təyin edilməsi qeyri-müəyyən şəkildə izah edilir. Məsələn, PA-nın ictimai-siyasi şöbəsinin müdiri Əli Həsənov bu təyinatı kurasiya işinin effektliyini artırmaq məqsədindən irəli gəldiyini deyib(“Qafqazinfo”).
Lakin bu izahatdan aydın şəkildə görünür ki, Əli Həsənov bu məsələyə mövqe xətrinə mövqe bildirib. Məsələ burasındadır ki, Ramiz Mehdiyevə müavin təyin ediləndən dörd şəxsdən ikisi PA-da şöbə müdiri(Zeynal Nağdəliyev və Novruz Məmmədov), ikisi isə prezidentin köməkçisidir(Əli Əsədov və Vahid Əliyev). Onlar Ramiz Mehdiyevə müavinlik etməklə yanaşı əvvəlki vəzifələrini də icra edəcəklər. Bu halda Əli Həsənovun sözlərindən belə çıxır ki, bu adamlar həm də özlərini kurasiya edəcəklər. Məntiq yoxdur.
PA rəhbəri Ramiz Mehdiyevin izahatı da maraqlıdır. “Azərbaycan 2020: Gələcəyə baxış” mövzusunda dünən keçirilən beynəlxalq konfransa qatılan PA rəhbəri jurnalistlərin suallarını cavablandırarkən yeni təyinatları iş həcminin böyük olması ilə izah edib: “Bir tərəfdən qurumun şöbə müdirlərinin statusunun qaldırılması və onların səlahiyyətlərinin genişləndirilməsi prosesi gedir. Eləcə də işin həcminə görə prezident Ilham Əliyev administarsiya rəhbərinin müavinlərini təyin edib. Artıq administrasiya müavinləri məsələsi həll olunub. Ortada başqa heç bir fikir yoxdur, sadəcə olaraq işin çoxluğu və vəzifələrin artırılmasından söhbət gedir”.
Ramiz Mehdiyev əlavə edib, administrasiya rəhbərinin müavini təyin edilən şəxslər administrasiyadakı əvvəlki vəzifələrində də qalırlar.
PA rəhbərinin açıqlamasındakı ziddiyyət açıq-aydın ortadadır. Əgər Ramiz Mehdiyevin söylədiyi kimi adminstrasiyada işin həcmi böyükdürsə, o halda əlavə işçilər cəlb edilə bilərdi. Amma nə baş verib? Bir adama iki iş tapşırılıb. Bununla işin həcmi azaldıla bilər, amma bir adamın iki işi görməsi gözlənilən effekti verə bilməz. Rəsmilər son təyinatlara ağlabatan izahat verməyənə qədər bunun Ramiz Mehdiyevə qarşı yönəlik addım olması barədə ehtimallar qüvvəsində qalır. Ilham Əliyevin bir fərmanı bu ehtimalları bir qədər də qüvvətləndirir.
Söhbət Qaçqınların və Məcburi Köçkünlərin Işləri üzrə Dövlət Komitəsi haqqında Əsasnaməyə dəyişikliklər edilməsi haqqında fərmandan gedir. Fərmana əsasən, Qaçqınların və Məcburi Köçkünlərin Işləri üzrə Dövlət Komitəsində sədr müavinlərinin sayı artırılaraq 2 nəfər olub(APA).
“Qaçqınkom”un rəhbəri Əli Həsənovun Ramiz Mehdiyevə yaxın şəxs olduğunu nəzərə alsaq, son təyinatlardan sonra belə bir fərmanın imzalanması təsadüfi sayılmaya bilər. Ehtimal etmək olar ki, Ilham Əliyev Ramiz Mehdiyevi kompleks şəkildə nəzarətə götürmək istəyir. O zaman PA rəhbərinin nəzarətində olan daha bir qurumda DIN-in də rəhbərliyində dəyişikliklər ediləcəyini güman etmək olar.
Namiq
