Vəfa Quluzadə: «Olduqca ciddi ittihamdır və doğru olarsa, Azərbaycanın nəinki Türkiyə, ABŞ ilə də əlaqələri ciddi xələl görə bilər»
Elxan Şahinoğlu: «Azərbaycanın Rusiyanın Suriyaya dəstək siyasətində iştirakı Türkiyə ilə əlaqələri poza bilər»
ABŞ-ın “Time” jurnalının yaydığı məlumat kifayət qədər ciddi qalmaqala səbəb ola bilər. Jurnal Suriya Xarici Işlər Nazirliyindən hakerlər vasitəsilə oğurlanmış sənədlərə istinad edərək, sensasion məlumat yayıb. Məlumatda bildirilir ki, Rusiya Bəşər Əsəd ordusunu silah-sursatla təmin etmək üçün gizli hava marşrutu seçib və həmin marşrut da Azərbaycandan keçir.
Bir müddət əvvəl isə Moskvadan Azərbaycan vasitəsilə Dəməşqə 240 ton ağırlığında yeni çap olunmuş Suriya valyutası göndərdiyi barədə də məlumat yayılmışdı. Bu məlumat Türkiyə ilə Azərbaycanın münasibətlərinə necə təsir edə bilər.
Bilindiyi kimi, Türkiyə Suriya problemində olduqca sərt mövqe tutub və hazırda Dəməşqə uçan istənilən təyyarəni öz ərazisində yerə enməyə məcbur edir. Belə bir zamanda Azərbaycanın nümayiş etdirdiyi mövqe beynəlxalq qalmaqala belə səbəb ola bilər.
Məsələ ilə bağlı XIN-in mövqeyini öyrənməyə çalışsaq da cəhdlərimiz bir nəticə vermədi.
“Atlas” Araşdırmalar Mərkəzinin rəhbəri Elxan Şahinoğlu hesab edir ki, artıq Azərbaycan vasitəsilə Suriyaya yardımın ötürüldüyünə dair bu ikinci ciddi məlumatdır. Bu məlumatların Qərbdən gəlməsinin də təsadüfi olmadığını düşünən E.Şahinoğlunun fikrincə, rəsmi Bakı bu məlulamtlara münasibət bildirməlidir: “Münasibət bildirilməzsə, susmaq razılıq əlaməti kimi dəyərləndiriləcək. Belə çıxacaq ki, Azərbaycanın üzərindən Suriyaya dəstəklə bağlı hansısa oyunlar oynanılır. Buna Azərbaycan hakimiyyəti münasibət bildirməlidir və bu boş açıqlamalar olmamalıdır. Əks mövqe ortaya qoyulmazsa, deməli, şübhələnməyə yetərincə əsaslar var. Bu məlumatları Qərb mətbuatı dərc edir və olduqca ciddi məsələlərdir”.
Azərbaycanın Suriya ilə əlaqələrinin Türkiyə ilə münasibətlərə xələl gətirməyə başladığını deyən E.Şahinoğlu vurğuladı ki, bu isə o deməkdir ki, Azərbaycan Rusiyanın siyasi oyunlarına qoşulub. Halbuki Rusiyanın özü ilə bu hakimiyyətin əlaqələrini normal saymaq olmaz: “Belə çıxır ki, baş verənlərdən xüsusi oliqarx qrupları qazanc məqsədilə istifadə edir. Suriyaya həm pulun, həm də silahın ötürülməsi dövlət maraqlarına ciddi zərbə vurur. Əslində bu, hakimiyyətin özünə də zərbə endirir. Ona görə bu məsələ ciddi araşdırılmalıdır”.
Politoloq Vəfa Quluzadə isə bildirdi ki, bu olduqca ciddi ittihamdır. Doğru olarsa, Azərbaycanın nəinki Türkiyə, ABŞ ilə də əlaqələri ciddi xələl görə, ölkənin beynəlxalq imicinə zərbə dəyə bilər. Amma informasiyanın doğru olduğuna inanmayan V.Quluzadə hesab edir ki, Azərbaycan hakimiyyəti hazırda Suriya ətrafında baş verənləri nəzərə alaraq belə bir səhvə yol verə bilməz.
Xəyal
