Suriyada müxalifətlə hökumət qüvvələri arasında baş verən toqquşmalarda öldürülən Azərbaycan vətəndaşlarından birinin kimliyi bəlli olub.
APA agentliyinin məlumatına görə, Bakı şəhər sakini Kəngərli Araz Ayrım oğlu bu ilin ortalarında bir qrup şəxslə birgə Suriyaya yola düşüb. A. Kəngərli burada müxalifətə yaxın silahlı birləşmələrdə yer alaraq, hökumət qüvvələrinə qarşı keçirilən hərbi əməliyyatlarda yaxından iştirak edib. Təxminən iki ay əvvəl isə döyüşlər zamanı həlak olub.
A.Kəngərlinin anası Larisa Kəngərli APA-ya açıqlamasında oğlunun Suriyada öldüyünü təsdiqləyib. L. Kəngərli bildirib ki, oğlu sentyabr ayında Suriya ərazisində ona məlum olmayan bölgədə gedən döyüşlərdə öldürülüb:
“Onun ölüm xəbərini tanımadığım dostu evə zəng edərək xəbər verib. Mən ondan demək olar ki, imtina etmişdim. O, Allahın övladı idi. Bununla bağlı nə isə danışmaq istəmirəm. Çünki mənə çox ağırdır”.
L. Kəngərli oğlunun Suriyada harada dəfn olunduğu haqda ona məlumat verilmədiyini də qeyd edib.
Qeyd edək ki, 1974-cü il təvəllüdlü Araz Kəngərli cəmiyyətdə “vəhabi”lər kimi tanınan təriqətə mənsub olub və öz çevrəsində “Ömər” və ya “Əsədullah” adları ilə tanınıb.
Araz Kəngərli 2005-2008-ci illər ərzində müxtəlif müddətlərdə İranın Zahidan bölgəsindən Pakistana, oradan isə qanunsuz yolla Əfqanıstana keçərək orada fəaliyyət göstərən qanunsuz hərbi birləşmələrdə təlim keçib və döyüşüb. O, Əfqanıstanda “Taliban” hərəkatının tərkibində yaradılan “Türk camaatı”, “Özbək camaatı”, “Ceyşul-Mehdi” və başqa hərbi birləşmələrdə təlim keçərək əməliyyatlara qatılıb. Adıçəkilən şəxs Azərbaycana qayıtmaq üçün sənədləri qaydasında olmadığı üçün İran-Azərbaycan dövlət sərhədini qanunsuz keçən zaman Sərhəd Qoşunlarının hərbçiləri tərəfindən saxlanıb. Saxlanarkən onların “Əl Qaidə” terror təşkilatı ilə əlaqədə olduqları müəyyən edilib və işin araşdırılması üçün MTN-ə təhvil verilib.
