“Dövlət başçısı atasına pərəstişini xaricə idxal etmək üçün xalqın cibindən misli görünməmiş pullar xərcləyir”
İctimai Palatanın Koordinasiya Şurası Meksikada Heydər Əliyevin heykəli ətrafında yaranmış vəziyyətlə bağlı bəyanat verib. Bəyanatda deyilir:
“Məlum olduğu kimi hazırda Əliyev rejiminin daha bir ölkə – Meksika ilə “heykəl qalmaqalı” baş verməkdədir. Bundan öncə belə bir hadisə Kanadada olmuş, yerli ictimaiyyət tərcümeyi-halı bəlli olan, gələcək nəsillərə örnək olması mümkün sayılmayan bir şəxsin heykəlinin devrilməsini tələb etmiş və devirmişdi.
Beynəlxalq Böhran Qrupu öz hesabatlarından birində qeyd edib ki, Azərbaycanın ideologiyasının əsasını şəxsiyyətə pərəstiş – Heydər Əliyevin guya Azərbaycanı xilas etməsi təşkil edir. Bu səbəbdən onun hakimiyyətə gəlməsi “Qurtuluş günü”, doğum günü isə “Gül bayramı” elan edilib.
H.Əliyevin ölümündən keçən 9 ildə onun adını əbədiləşdirmək üçün çox saylı işlər görülmüş, Azərbaycanın bütün şəhərlərində mərkəzi prospektlərə, küçələrə, parklara, mədəniyət mərkəzlərinə, konsert və idman salonlarına, dağ zirvələrinə, buruqlara, körpülərə, vaqzallara, zavodlara, fabriklərə, xəstəxanalara, məktəblərə, festivallara, orden və medallara, mükafat və təqaüdlərə, kitabxanalara, neft borusuna, beynəlxalq aeroporta onun adı verilmişdir. Rəsmi rəqəmlərə görə bu müddətdə H.Əliyevin adını daşıyan 60-dan çox muzey təsis edilmiş, çoxsaylı mərkəzlər, demək olar ki, bütün müəssisələrdə, hətta bəzi məscidlərdə köşələr yaradılmış, ölkənin bütün ərazisini portretləri və heykəlləri bürümüşdür.
Heydərizm artıq Azərbaycanın xarici siyasətinin də prioritetinə çevrilmişdir. Dövlət başçısı atasına pərəstişini xaricə idxal etmək üçün xalqın cibindən misli görünməmiş pullar xərcləmiş, Türkiyədə, İordaniyada, Gürcüstanda, Macarıstanda, Rusiyada, Qazaxstanda, Ukraynada, Meksikada, Kanadada, Misirdə və digər ölkələrdə heykəllər qoydurmuş və bu kimi təbliğat hərəkətləri həyata keçirmişdir. Hətta bəzi ölkələr rejimin bu zəifliyini görərək öz problemlərini həll etmək üçün “heykəl alverinə” girişmişlər.
Azərbaycan xalqının və ictimaiyyətinin birmənalı qəbul etmədiyi bu ismin təbliği üçün heç bir ictimai razılaşdırma olmadan böyük neft milyonları israf olunmuşdur ki, bu gün bu fəaliyyət artıq Azərbaycannın rüsvayçılığına çevrilməkdədir. Bu gün uzaq ölkələrdəki heykəllər sökülür, beynəlxalq qalmaqallar silsiləsi yaranır, Azərbaycan xalqının dövlətçilik şüuru və mədəni səviyyəsi şübhə altına düşür.
İctimai Palata bəyan edir ki, Əliyev rejimi sövet və ortaçağ şüuru olan bu tendensiyaya son qoymalıdır. Xalqın sərvətini onun özünün böyük ehtiyac, işsizlik və sosial tənəzzül içində olduğu, əhalinin 20 %-dən çoxunun əmək mühacirinə çevrildiyi halda belə qəddarlıqla dağıtmağa, dövlətimizi və xalqımızı dünyada rüsvay etməyə heç bir hakimiyyətin ixtiyarı yoxdur. Mənəvi dəyərlər sistemində “hakimiyət məsuliyyəti” deyilən bir anlayış vardır. Bu məsuliyyəti anlamayan hakimiyyətlər zamanın və xalqın mühakiməsindən yayına bilməyəcəklər.
Ictimai Palata 21-ci əsrdə dövlətin daxili və xarici siyasətinin şəxsiyyətpərəstlik üzərində qurulmasını yolverilməz hesab edir”.
