“Özümün və yaxınlarımın həyatına gözlənilən təhlükəni aradan qaldırmağı xahiş edirəm”
Reportyorların Azadlıq və Təhlükəsizlik İnstitutunun əməkdaşı İdrak Abbasov özünə və yaxınlarıma qarşı hansısa aktın həyata keçiriləcəyi ilə bağlı xəbər yayıb. “Musavat.com” xəbər verir ki, jurnalist bu barədə şəxsi “facebook” səhifəsində status yazıb: “Bir neçə gün bundan əvvəl əməliyyat olunduğum üçün bu gün səhər saat 10 radələrində Kliniki Tibbi Mərkəzinə tikişlərimi sökdürməyə getmişdim. Bu zaman mənim ailəmlə birgə Sulutəpə qəsəbəsindəki evimin yanında “90 XG 707” dövlət nömrə nişanlı ağ rəngli “CİP” markalı maşın ilə gələn şəxslər müxtəlif istiqamətdən evimin, evə gələn və gedən yolları, tinlərin şəklini çəkirlərmiş. Bunu təsadüfən həyat yoldaşım Yeganə Abbasova görüb. O həyətə düşüb çəkilişin hansı məqsədlə aparılmağı ilə maraqlananda isə həmin şəxslər qaçaraq bir qədər kənarda saxladıqları, yuxarıda bəhs etdiyim avtomobilə minərək ərazidən uzaqlaşıblar. Bundan başqa mənin Sulutəpə qəsəbəsində yerləşən atama məxsus ev ətrafında da analoji hal qeydə alınıb. Bu hadisə ilə bağlı DİN-in “102” xidmətinə zəng edib həyat yoldaşımla birgə məlumat vermişik”.
Jurnalist bildirib ki, bu ona və yaxınlarıma qarşı planlaşdırılan hansısa aktdan xəbər verdiyindən həyatları təhlükədədir: “Bu səbəbdən Azərbaycan Respublikasının prezidenti cənab İlham Əliyevə, Azərbaycan Respublikası Mili Təhlükəsizlik Naziri cənab Eldar Mahmudova, Baş prokuror, cənab Zakir Qaralova, Daxili işlər naziri cənab Ramil Usubova, KİV rəhbərlərinə, QHT təmsilçilərinə, xarici ölkələrin və qurumların Azərbaycanda akreditə olunmuş missiyalarına müraciət edərək, özümün və yaxınlarımın həyatına gözlənilən təhlükəni aradan qaldırmağa, bizə ölkəmizdə təhlükəsiz yaşayıb – işləməyə şərait yaratmağa yardım etmələrini xahiş edirəm”.
Xatırladaq ki, jurnalist İdrak Abbasov və ailəsinin Sulutəpə qəsəbəsindəki yaşadıqları ev bir müddət əvvəl ARDNŞ-in Təhlükəsizlik İdarəsini Əməkdaşları tərəfindən basqına məruz qalmış, yaranan qarşıdurma nəticəsində həmkarımız vəhşicəsinə döyülərək ölümcül hala salınmışdı.
