Vatikan Qüdsə də özəl status istəyir
Noyabrın 29-da BMT Baş Assambleyasında Fələstin Muxtariyyatının bu qurumdakı müşahidəçi statusu artırılıb. Bundan sonra Fələstin Muxtariyyatı BMT-də sadəcə “təşkilat” statusunda deyil, “üzv olmayan dövlət” statusunda iştirak edəcək. Fələstin dövlətinin tanınmasına yaxın olan bu status Assambleyada yekdilliklə qəbul edilib.
BMT-dəki bu qərar Ramallah və başqa fələstin şəhərlərində atəşfəşanlıqla qeyd edilib.
BMT-nin Fələstini “üzv olmayan müşahidəçi dövlət” olaraq tanımasına Vatikandan dəstək gəlib. Bu qərara görə Fələstini təbrik edən Vatikan Qüdsə də xüsusi status verilməsinə çağırıb.
Xatırladaq ki, Vatikan indiyədək BMT-də “üzv olmayan müşahidəçi” statusu ilə təmsil olunan yeganə dövlət olub. Indi ona Fələstin də qoşulub.ÿ
BMT-nin bu qərarını alqışlayan Vatikan Fələstinlə eyni mövqedə ola bilməsi üçün Qüdsə də “beynəlxalq zəmanət altında xüsusi status” verilməsini təklif edib.
Vatikanın bununla bağlı yaydığı müraciətdə bildirilir ki, Qüdsə bu xüsusi statusun verilməsi “dinin və vicdanın qorunması”, “müqəddəs şəhər olaraq Qüdsün mühafizə edilməsi”, “müqəddəs yerlərə sərbəst səyahət imkanlarının təmin edilməsi” üçün vacibdir.
Israil isə Vatikanın bu çağırışına qarşı çıxıb. Israil hökuməti hesab edir ki, Qüds belə bir statusla əldə edə biləcəyi hüquqlara onsuz da sahibdir. Israil Qüds üzərində hər hansı beynəlxalq mandata qarşıdır.
Israil Parlamenti 1980-ci ildə qəbul etdiyi xüsusi qanunla Qüdsü “birləşmiş və əbədi paytaxt” elan edib. Ancaq BMT bu qanunu tanımır və ABŞ da daxil olmaqla, heç bir ölkənin Qüdsdə Israil nümayəndəliyi yoxdur.
Fələstin isə BMT-nin 242 saylı qərarına əsasən, Şərqi Qüdsü özünə paytaxt etmək istəyir.
