Mahir Abdullayevin işi ilə bağlı general Məmməd Beydullayevin dindirildiyi barədə məlumat yayılıb
Fəaliyyət dayanmış Azərbaycan Beynəlxalq Universitetinin (ABU) sabiq rektoru Elşad Abdullayev deputat Nizami Cəfərovla bağlı yayılan məlumatlara aydınlıq gətirib. Elşad Abdullayev Modern.az saytına verdiyi açıqlamada aşağıdakıları bildirib: “Üç video yayılıb, hazıra qədər də Müstəqil Istintaq Komissiyası heç birinə huquqi cavab verməyib.
Azərbaycanda adam oğurluğu ilə məşğul olan mütəşəkkil cinayətkar təşkilatı ifşa etmək əvəzinə, bəzi qəzetçilər xalqı və istintaqı çaşdıran şayiələr yazırlar. Bunlardan biri də guya, mənimlə Sevinc Babayevanı tanış edən parlamentin deputatı, hörmətli professor Nizami Cəfərovdur. Mən, hörmətli professor Nizami Cəfərovu həm Azərbaycan Milli Elmlər Akademiyasında, həm də Bakı Dövlət Universitetində işlədiyim uzun müddətdən tanıyıram, böyük hörmətim var. Bu yazılan məlumat yalandır, mən Sevinc Babayeva ilə keçmiş deputat Gülər Əhmədova vasitəsi ilə tanış olmuşam. Bu tanışlıqdan sonra Sevinc mənimlə Gülər Əhmədova arasında vasitəçilik etməklə məşğul olub.
Keçmiş deputat Gülər Əhmədovanın, Daxil Işlər Nazirliyinin 7-ci Idarəsinin polkovniki Rövşən Abbasquliyevin və məhkəmə sistemində uzun müddət işləmiş Bakı şəhəri Nərimanov payon Məhkəməsinin sabiq sədri Hacı Ağababanın videogörüntülərinə aydınlıq gətirib huquqi qiymət vermək əvəzinə, xalqı caşdıran məlumatları yayan bəzi qəzetçilərin məqsədi əsas cinayətkarları gizlətməkdir”.
Xatırladaq ki, “Bizim yol” qəzeti Sevinc Babayevanı ABU-nun keçmiş rektoru ilə millət vəkili Nizami Cəfərovun tanış etdiyi haqda məlumat yayıb.
“Azpolitika.info” saytı isə məlumat yayıb ki, Elşad Abdullayevin qardaşı Mahir Abdullayevin itkin düşməsi faktı üzrə araşdırmalarda Müdafiə Nazirliyi Inspeksiyasının rəisi, general-mayor Məmməd Beydullayev istintaqa cəlb olunaraq ifadəsi alınıb. Məlumata görə, Məmməd Beydullayev bir neçə gün əvvəl istintaqa çağırılıb və sorğu-sual edilib. Generalın Mahir Abdullayevin itkin düşməsi cinayətinə nə aidiyyəti olduğunu, onun hansı statusla istintaqa ifadə verdiyi bəlli deyil.
