Türkiyə Nazirlər Kabineti orta məktəblərdə qız şagirdlərə başlarını örtməyə icazə verən qaydaları təsdiqləyib.
Yeni qaydalara əsasən, dini təmayüllü imam-hatip liselərində qız şagirdlərə məktəbdə türban örtmək sərbəstliyi verilib. Orta məktəb və liselərə aid qaydalarda isə orta məktəb və liselərin qız şagirdlərinə yalnız Quran dərsləri və fakultətiv din kurslarında baş örtüsü istifadə etmək sərbəstliyi verilib. Ancaq qaydalar, yalnız göstərilən dərs saatları üçün keçərli olub, məktəb daxilini nəzərdə tutmur.
Türkiyənin dünyəvi dövlət quruluşunun tərəfdarı olan bəzi təhlilçilər bu qərarın məktəblərdə baş örtüsünə qadağanın tam qaldırılacağına yol açacağından narahatdır.
Dünyəvi təhsil sistemi
Cumhuriyyət Xalq Partiyasından millət vəkili Osman Faruk Loğoğlu “BBC Azərbaycancaya” acıqlamasında bildirib ki, Ədalət və İnkişaf Partiyası iqtidar olduqdan sonra “Türkiyənin dünyəvi dövlət prinsiplərini daraltmaq üçün” əlindən gələn hər şey edir.
“Biz azad yetkin yaşlı insanların başlarını örtməsinə qarşı deyilik. Amma bu qərar təhsil sistemini müasirlikdən uzaqlaşdırır”, millət vəkili etiraz edib.
Yeni qaydaların yalnız dini dərs saatları zamanı qüvvədə olması ilə bağlı xatırlatmaya isə müxalifət təmsilçisi belə cavab verib: “Nə fərq edər ki qız şagird məktəbə daxil olarkən, yoxsa yalnız dərs saatında başını örtəcək?! Bir gün də dindar valideyn “qızım sinifdə başını örtə bilirsə, məktəbə də başıörtülü gedə bilər” istəyində israr edəcək və hökumət də buna əngəl olmayıb yeni qaydalar yaradacaq”.
Parlamentin deputatı Osman Faruk Loğoğlu deyib ki, hökumət uşaqları öz siyasəti üçün alətə çevirib. “Uşaqların din və siyasətə alət edilməsi qədər qeyri-etik və əxaqdan yoxsul davranış ola bilməz”, parlament təmsilcisi tənqid edib.
Dini təhlilçi, Liberal Düşüncə Topluluğu Din və Azadlıq Araşdırmaları Mərkəzinin rəhbəri Bilal Sambura görə isə, bir halda ki, orta məktəblərdə Quran dərslərinin tədrisinə icazə verilib, o halda bu dərslərdə qız şagirdlərin baş örtüyü bağlamasına icazə verilməsinə də normal yanaşmaq lazımdır. “Quran oxunarkən qadınların başlarını örtməsi islami şərtdir. Ona görə də son qərar inqilab və ya dünyəvi dövlət quruluşuna təhdid kimi deyil, normallaşma istiqamətində atılmış addım kimi dəyərləndirilməlidir”, deyə dini təhlilçi bildirib.
Onun sözlərinə görə, artıq Türkiyədə dini sahədə soyuq müharibə dövrü “arxada qalıb”, son 10 ildə insanların dini inanclarına dövlət basqısı olmadan yaşadığı “nəfəsalıcı atmosfer” formalaşıb.
“Cırıq paltar olmaz”
Nazirlər Kabinetinin 27 noyabr tarixli qərarında edilən vacib dəyişikliklərdən biri də bütün məktəblərdə rəhbərlik, müəllim və şagirdlərin geyim qaydalarının “Atatürk İnqilab və prinsiplərini” tərənnüm etməsi fikirlərinin yer almamasıdır. Yeni qaydalarla, ölkə üzrə məktəblərdə vahid geyim forması tələbi də aradan qaldırılıb.
Yeni dərs ilindən qüvvəyə minəcək dəyişikliyə görə, şagirdlər “cırıq və ya dəlikli” stildə, eləcə də şəffaf, “bədən xəttlərini müəyyən edən” şort, tayt, dizdən yuxarı ətək, dərin yırtmaclı ətək, qısa şalvar, qolsuz köynək istisna olmaqla, istədikləri geyimi geyə biləcəklər.
Məktəblərə, valideynlərin ən az 60 fazinin razılığı ilə geyim forması müəyyənləşdirmək sərbəstliyi verilib.
Uzun saçlı qız şagirdlərə “saçlarını hörərək bant vurmaq” tələbi də aradan qaldırılıb.
Türkiyədə ibtidai, orta məktəb və liselərdə şagirdlərin geyimi 31 il əvvəl qəbul olunmuş qaydalarla tənzimlənirdi. Bu sənədə əsasən, orta məktəb şagirdləri vahid məktəbli forması geyinməli və heç bir halda məktəbə başıörtülü gələ bilməzdilər.
İlhamə Qasımlı, Ankara
